Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Eperera 2017

Te faaite ra anei oe i te huru o Iehova no nia i te parau-tia?

Te faaite ra anei oe i te huru o Iehova no nia i te parau-tia?

“E faaite . . . au i te i‘oa o Iehova . . . e Atua parau mau [aore ra haapao maitai], e te ino [aore ra hape] ore.”—DEUT. 32:3, 4.

HIMENE: 110, 2

1, 2. (a) Ua roohia Nabota e ta ’na nau tamaiti i teihea ohipa parau-tia ore? (b) Eaha na huru maitatai e piti ta tatou e hi‘opoa mai i roto i teie tumu parau?

UA PARI e piti taata haerea ino i te hoê tane i te raveraa i te hoê ohipa ino mau. E haavare ta raua. Tera râ, ua faautuahia teie tane e e haapohehia oia. A feruri na i te huru o te taata o tei haafaufaa i te parau-tia a hi‘o noa ’i i teie tane hapa ore e ta ’na nau tamaiti e pehihia i te ofai a pohe roa ’tu ai ratou! E ere te reira i te hoê noa aamu. Ua tupu iho â te reira no te hoê tavini taiva ore a Iehova, o Nabota te i‘oa, o tei ora a arii ai Ahaba i nia ia Iseraela.—Arii 1, 21:11-13; Arii 2, 9:26.

2 I roto i teie tumu parau, e hi‘opoa mai tatou i tei tupu no Nabota. E hi‘opoa atoa mai tatou i te hape ino mau ta te hoê matahiapo taiva ore i rave i roto hoê o te mau amuiraa Kerisetiano matamua. E faaite mai teie na hi‘oraa e piti e mea faufaa te haehaa e te ineineraa i te faaore i ta vetahi ê hapa  ia hinaaro tatou e pee i to Iehova huru no nia i te parau-tia.

TE HOÊ OHIPA PARAU-TIA ORE PEAPEA MAU

3, 4. Mai te aha te huru o Nabota e no te aha oia i patoi ai i te hoo i ta ’na ô vine i te arii Ahaba?

3 Ua vai taiva ore Nabota ia Iehova i te hoê taime a pee ai te rahiraa o te mau Iseraela i te hi‘oraa ino o te arii Ahaba e ta ’na vahine, te arii vahine ino o Iezebela. Ua haamori ratou ia Baala te atua haavare, e aita ratou i faatura ia Iehova aore ra i ta ’na mau ture. Ua haafaufaa râ Nabota i to ’na auhoaraa e o Iehova hau atu i to ’na iho ora.

4 A taio i te mau Arii 1, 21:1-3. A hinaaro ai Ahaba e hoo mai i te ô vine a Nabota aore ra e horoa ’tu na ’na te hoê ô vine maitai a‘e ei monoraa, ua patoi Nabota. No te aha? Ua faataa oia ma te faatura: “Ia tapea mai Iehova ia ’u eiaha vau e horoa ’tu i te fenua ai‘a tupuna na oe.” Ua patoi Nabota i ta Ahaba aniraa no te mea aita te reira i tano i ta Iehova ture no te mau Iseraela ia hoo faariro roa i ta ratou faufaa tupuna. (Lev. 25:23; Num. 36:7) Mea papu, ua auraro Nabota ia Iehova.

5. Eaha ta Iezebela i rave ia noaa mai te ô vine a Nabota?

5 I to Nabota patoiraa i te hoo i ta ’na ô vine, ua rave te arii Ahaba e ta ’na vahine i te ohipa ino mau. Ia noaa ia raua te ô vine, ua faaue te arii vahine Iezebela i e piti taata ia pari ia Nabota i te raveraa i te hoê ohipa ino, o ta ’na i ore roa ’tu i rave. Eaha tei itehia? Ua haapohehia Nabota e ta ’na nau tamaiti. Eaha ta Iehova i rave no teie ohipa parau-tia ore peapea mau?

TE PARAU-TIA A TE ATUA

6, 7. (a) Mea nafea Iehova i te faaiteraa e mea au na ’na i te parau-tia? (b) No te aha te reira i riro ai ei tamahanahanaraa no te utuafare o Nabota e to ’na mau hoa?

6 Ua tono oioi Iehova ia Elia no te tia ’tu i mua ia Ahaba. Ua parau atu Elia ia Ahaba e taparahi taata oia e te eiâ atoa. Eaha ta Iehova i faaoti? E haapohehia Ahaba, ta ’na vahine e ta ’na nau tamaiti, mai tei tupu i nia ia Nabota e ta ’na na tamaiti.—Arii 1, 21:17-25.

7 Ua oto roa te utuafare o Nabota e to ’na mau hoa no te mau ohipa iino ta Ahaba i rave. Ua ite râ Iehova i teie ohipa parau-tia ore e ua haa oioi oia. Eita e ore e ua tamahanahana te reira ia ratou. Tera râ, peneia‘e ua tamatahia to ratou haehaa e tiaturi ia Iehova i te mau ohipa o tei tupu i muri iho.

Ua parau atu Elia ia Ahaba e no te mea ua faahaehaa oia ia ’na, eita Iehova e faautua ia ’na

8. Ua aha Ahaba a faaroo ai oia i te poroi a Iehova e eaha tei tupu?

8 A faaroo ai Ahaba i ta Iehova i faaoti no ’na, “ua hahae ihora oia i tana ahu, ua tuu a‘era i te ahu paau i nia ia ’na, e ua haapae ihora i te maa, taoto ihora i roto i taua ahu paau ra, e ua hahaere noa ihora ma te oto.” Ua faahaehaa Ahaba ia ’na! Eaha tei itehia? Ua parau atu Iehova ia  Elia: “No te mea ua faahaehaa mai oia i mua ia ’u nei, e ore au e hopoi vave mai i taua ino nei i to ’na nei anotau; ia tae râ i to te tamaiti ra anotau, e hopoi mai ai au i taua ino nei i nia i to ’na ra utuafare.” (Arii 1, 21:27-29; Arii 2, 10:10, 11, 17) Ua aroha-hamani-maitai-hia Ahaba e Iehova, te Atua “tei tamata [aore ra hi‘opoa] i te aau,” o te nehenehe e ite o vai mau tatou.—Mas. 17:3.

E PARURU MAI TE HAEHAA

9. No te aha te haehaa e nehenehe ai e riro ei paruru no te utuafare o Nabota e to ’na mau hoa?

9 A faaroo ai te utuafare o Nabota e to ’na mau hoa e eita te utuafare o Ahaba e faautuahia e tae roa ’tu i muri a‘e i te poheraa o Ahaba, ua tamatahia paha to ratou faaroo i te Atua. E nehenehe râ te haehaa e tauturu ia ratou ia paruru i to ratou faaroo. No te aha? Mai te peu e mea haehaa ratou, e tamau ïa ratou i te haamori ia Iehova ma te tiaturi e eita roa ’tu te Atua e haa ma te parau-tia ore. (A taio i te Deuteronomi 32:3, 4.) No a muri a‘e, e fana‘o te utuafare o Nabota i te haamaitairaa i te iteraa i te feia tei herehia e ratou i te tia-faahou-raa. E ohipa parau-tia roa te tupu no Nabota e ta ’na nau tamaiti. (Ioba 14:14, 15; Ioa. 5:28, 29) Ua ite te hoê taata haehaa “e hopoi . . . te  Atua i te mau parau atoa i te haavaraa, e te mau mea moe atoa ra, te maitai e te ino atoa ra.” (Koh. 12:14) Ua ite Iehova i te mau mea ta tatou e ore e ite. No reira, e paruru mai te haehaa ia ore tatou e ere i to tatou faaroo ia Iehova.

E paruru mai te haehaa ia ore tatou e ere i to tatou faaroo ia Iehova

10, 11. (a) Eaha te mau tupuraa o te tamata i ta tatou huru hi‘oraa i te parau-tia? (b) Nafea te haehaa e paruru ai ia tatou?

10 Eaha to oe huru ia rave te mau matahiapo i te hoê faaotiraa o ta oe e ore e taa aore ra o ta oe e ore e farii? Ei hi‘oraa, eaha ta oe e rave ia ere oe aore ra te hoê taata ta oe e au, i te hoê hopoia i roto i te taviniraa a Iehova? E ia tiavaruhia to oe hoa faaipoipo, ta oe tamaiti, tamahine aore ra hoa piri e aita oe i mauruuru i te faaotiraa a te mau matahiapo? Eaha ta oe e rave ia tiaturi oe e ua hape te mau matahiapo i te faaiteraa i te aroha hamani maitai i te hoê taata o tei hara? E nehenehe teie mau tupuraa e tamata i to tatou faaroo ia Iehova e i ta ’na huru faanahoraa i te amuiraa i teie mahana. E nafea te haehaa e paruru ai ia oe ia tamata hoê o teie mau tupuraa ia oe? E hi‘o mai tatou e piti ravea.

Eaha to oe huru ia faaara mai te mau matahiapo e ua ravehia te tahi faaotiraa o ta oe e ore e farii? (A hi‘o i te paratarafa 10, 11)

11 A tahi, mai te peu e taata haehaa tatou, e farii tatou e aita tatou i ite i te mau haamaramaramaraa atoa. Noa ’tu e mana‘o tatou e ua ite tatou i te mau mea atoa te tia ia ite no nia i te hoê tupuraa, o Iehova ana‘e tei ite eaha to roto i te aau o te hoê taata. (Sam. 1, 16:7) Ia haamana‘o tatou i te reira, ma te haehaa e farii tatou e ua taotiahia tatou e e tia ia taui i to tatou huru feruriraa. Te piti, mai te peu e ohipa parau-tia ore ta tatou i ite aore ra tei ravehia i nia ia tatou, e tauturu mai te haehaa ia auraro, ia faaoromai e ia tiai na Iehova e faaafaro i tera tupuraa. Te na ô ra te Bibilia: “E maitai to te feia i mǎta‘u i te Atua.” Te parau atoa ra te Bibilia: “Aita râ o te paieti ore e maitai, e ore hoi o ’na pue mahana e haamaorohia.” (Koh. 8:12, 13) Ia vai haehaa noa tatou, e faufaahia tatou e te mau taata atoa i roto i taua tupuraa ra.—A taio i te Petero 1, 5:5.

TE HOÊ TUPURAA HAAVAREVARE I ROTO I TE AMUIRAA

12. Eaha te aamu ta tatou e hi‘opoa mai i teie nei, e no te aha?

12 Ua farerei te mau Kerisetiano o te senekele matamua i Anetiohia i Suria i te hoê tupuraa o tei tamata i to ratou haehaa e oia atoa, i to ratou ineineraa i te faaore i te hapa. E hi‘o e e faaohipa ana‘e i tera aamu no te hi‘opoa i to tatou huru feruriraa no nia i te faaoreraa i te hapa. E tauturu mai te reira ia taa no te aha Iehova e nehenehe ai e faaohipa i te taata tia ore ma te ore e faaiti i ta ’na mau ture aveia.

13, 14. Eaha te mau hopoia a te aposetolo Petero, e mea nafea oia i te faaiteraa e e taata itoito oia?

13 E matahiapo te aposetolo Petero o ta te rahiraa o te mau Kerisetiano o te senekele matamua i matau maitai. E hoa piri oia no Iesu e ua horoahia ia ’na te tahi mau hopoia faufaa. (Mat. 16:19) Ei hi‘oraa, i te matahiti 36, ua tonohia Petero no te poro ia Korenelio e te feia atoa i  roto i to ’na fare. No te aha mea taa ê ai te reira? No te mea e ere Korenelio i te ati Iuda, e taata nunaa ê peritome-ore-hia oia. A fana‘o ai Korenelio e te feia i roto i to ’na fare i te varua mo‘a, ua taa ia Petero e e nehenehe ratou e bapetizohia ei Kerisetiano. Ua parau oia: “Ua noaa i teie mau taata te varua mo‘a mai ia matou atoa, e tia anei ïa i te tahi taata ia tapea ia ratou ia ore ia bapetizohia i te pape?”—Ohi. 10:47.

14 I te matahiti 49, ua putuputu te mau aposetolo e te mau matahiapo no Ierusalema no te faaoti e mea titauhia anei ia peritomehia te mau Kerisetiano no te mau nunaa ěê. I tera putuputuraa, ua haamana‘o atu Petero ma te itoito i te mau taeae e ua ite oia i te feia no te mau nunaa ěê peritome-ore-hia i te fana‘oraa i te varua mo‘a. Na teie tupuraa ta Petero i ite i tauturu i te tino aratai ia rave i ta ratou faaotiraa. (Ohi. 15:6-11, 13, 14, 28, 29) Eita e ore e ua mauruuru roa te mau Kerisetiano ati Iuda e te mau Kerisetiano nunaa ěê i to Petero faaiteraa ma te itoito i te mau haamaramaramaraa. Eita e ore ua riro ei mea ohie no tera mau Kerisetiano o te senekele matamua ia tiaturi i teie taata taiva ore e te feruriraa paari atoa!—Heb. 13:7.

15. Eaha te hape ta Petero i rave i Anetiohia i Suria? (A hi‘o i te hoho‘a matamua.)

15 I muri iti noa ’‘e i te putuputuraa i Ierusalema, ua haere Petero i Anetiohia i Suria. I reira, ua faataa oia i te taime e to ’na mau taeae no te mau nunaa ěê. E nehenehe tatou e feruri e ua au roa ratou i te haapii mai i to Petero ite rahi. Tera râ, ua maere roa paha ratou e ua mauiui atoa paha no to Petero faaearaa i te tamaa e o ratou. Ua turai Petero i te tahi atu mau Kerisetiano ati Iuda, oia atoa ia Baranaba, ia na reira. No te aha teie matahiapo Kerisetiano feruriraa paari i rave ai i teie huru hape ino mau o te nehenehe e faaamahamaha i te amuiraa? Te mea faufaa roa ’tu â, eaha ta tatou e nehenehe e haapii mai i te hape a Petero o te tauturu mai ia haamauiuihia tatou e te tahi mau parau aore ra haaraa a te hoê matahiapo?

Eaha te huru o te mau Kerisetiano no te mau nunaa ěê o ta Petero i haamauiui, i mua i teie ohipa parau-tia ore?

16. Mea nafea Petero i te faaafaro-raa-hia e eaha te mau uiraa e hiti mai?

16 A taio i te Galatia 2:11-14. Ua mǎta‘u Petero i te taata. (Mas. 29:25) Ua ite Petero i to Iehova mana‘o no nia i te feia no te mau nunaa ěê. Ua mǎta‘u râ oia i ta te mau Kerisetiano ati Iuda peritomehia o tei haere mai mai Ierusalema, e mana‘o ia amuimui oia e te mau Kerisetiano no te mau nunaa ěê. Ua parau te aposetolo Paulo ia Petero e e taata haavarevare oia. No te aha? Ua faaroo Paulo ia Petero i te patururaa i te feia no te mau nunaa ěê i te putuputuraa i Ierusalema i te matahiti 49. (Ohi. 15:12; Gal. 2:13) Eaha te huru o te mau Kerisetiano no te mau nunaa ěê o ta Petero i haamauiui? Ua vaiiho anei ratou i te reira e faaturori ia ratou? Ua ere anei Petero i ta ’na mau hopoia no ta ’na hape?

 A FAAORE I TE HAPA

17. Mea nafea Petero i faufaahia ’i i to Iehova faaoreraa i te hapa?

17 E taata haehaa Petero e ua farii i te a‘oraa a Paulo. Aita te mau Papai e parau ra e ua ere Petero i ta ’na mau hopoia. Inaha, ua aratai te Atua ia ’na i muri a‘e ia papai e piti rata o tei riro mai ei tuhaa o te Bibilia. I roto i te piti o ta ’na na rata, ua faahiti atoa oia ia Paulo mai “to tatou taeae here.” (Pet. 2, 3:15) Eita e ore e ua haamauiui ta Petero hape i te mau Kerisetiano no te mau nunaa ěê. Tera râ, ua tamau noa Iesu, te upoo o te amuiraa, i te faaohipa ia ’na. (Eph. 1:22) E ravea ta te mau taeae e tuahine o te amuiraa no te pee i te hi‘oraa o Iesu e o to ’na Metua ma te faaore i ta Petero hapa. Mea maitai aita te hape a te hoê taata tia ore i faaturori hoê noa ’‘e taata.

18. I teihea taime e titauhia paha ia pee tatou i te huru o Iehova no nia i te parau-tia?

18 Aita e matahiapo tia roa i roto i te amuiraa o te senekele matamua, aita atoa e matahiapo tia roa i roto i te amuiraa Kerisetiano i teie mahana. Te parau ra te Bibilia: “E turori hoi tatou paatoa e rave rahi taime.” (Iak. 3:2, nota.) Mea ohie ia ite i te reira, tera râ, eaha ta tatou e rave mai te peu e o tatou te faaruru ra i te huru tia ore o te hoê taeae? E pee anei tatou i te huru o Iehova no nia i te parau-tia? Ei hi‘oraa, eaha to oe huru ia faahiti te hoê matahiapo i te hoê parau e au ra e e mana‘o oti noa te reira? Ia faahiti te hoê matahiapo i te mau parau feruri-ore-hia e inoino aore ra e mauiui ai oe, e vaiiho anei oe i te reira e faaturori ia oe? E tiaturi anei oe ia Iesu, te upoo o te amuiraa, ma te ore e mana‘o oioi e eita ta teie taeae e nehenehe e riro mai ei matahiapo? E haamana‘o anei oe i te rahiraa matahiti taviniraa taiva ore a teie taeae ma te ore e haapao i te hape ta ’na i rave? Mai te peu e te tamau noa ra te hoê taeae, o tei hara ia oe, i te tavini ei matahiapo aore ra te fana‘o ra oia hau atu â hopoia, e oaoa anei oe no ’na? Mai te peu e ua ineine oe i te faaore i te hapa, te pee ra ïa oe i te huru o Iehova no nia i te parau-tia.—A taio i te Mataio 6:14, 15.

19. Eaha ta tatou i faaoti papu i te rave?

19 No te mea, mea au na tatou te parau-tia, te tiai ru nei tatou i te mahana e faaore roa ’i Iehova i te mau ohipa parau-tia ore atoa o ta Satani e ta ’na ao ino e faatupu noa ra. (Isa. 65:17) A tiai noa ’tu ai, ia faaruru tatou i te hoê ohipa parau-tia ore, e farii ana‘e ma te haehaa e aita tatou i taa maitai pauroa te haamaramaramaraa, e e faaore noa ana‘e i te hara ta te feia i rave ia tatou. Ma te na reira, e pee ïa tatou i te mana‘o o Iehova no nia i te parau-tia.