Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Tenuare 2014

 IA AU I TE BIBILIA

Te faaipoiporaa

Te faaipoiporaa

E parau faaau noa anei te faaipoiporaa?

“Ta te Atua i taati ra, eiaha te taata e faataa ê atu.”—Mataio 19:6.

TA TE BIBILIA E PARAU RA

No te Atua, e ere te faaipoiporaa i te hoê noa parau faaau i rotopu i te tane e te vahine, e mea mo‘a râ. Te na ô ra te Bibilia: “Area i te matamua ra, i te hamaniraa i te mau mea atoa nei, i hamani ihora te Atua i te taata i te tane hoê, e te vahine hoê. E faarue ai te tane i tana metua tane e tana metua vahine, a ati atu ai i tana vahine; e e riro hoi raua ei hoê . . . ta te Atua i taati râ, eiaha te taata e faataa ê atu.” *Mareko 10:6-9; Genese 2:24.

Te mau parau “ta te Atua i taati [aore ra, tahoê],” e ere te auraa e na te Atua e faaoti o vai te tano maitai ei hoa faaipoipo no te tahi taata. Te faaite ra râ te reira e o to tatou Atua Poiete te Tumu o te faaipoiporaa. Ia au i te Bibilia, e ere te reira i te ohipa hauti. Mai te peu e no na hoa faaipoipo e mea mo‘a e tamau to raua taairaa, e haafaufaahia ïa te faaipoiporaa. E tutava ïa raua i te vai piri noa. Ia haapao raua i ta te Bibilia e faaue ra i te tane e te vahine, e rahi atu â ïa te oaoa.

 Eaha ta te Bibilia e faaue ra i te tane?

“O te tane hoi to te vahine ra upoo.”—Ephesia 5:23.

TA TE BIBILIA E PARAU RA

Ia oaoa te utuafare, e mea tia e na te hoê e rave i te faaotiraa hopea. Ia au i te Bibilia, ua horoahia tera hopoia i te tane. E ere râ te auraa e e nehenehe ta ’na e haavî, e faahepo e e imi i te otoheraa no te ore e amo i ta ’na hopoia. Ia na reira oia, e teimaha ta ’na vahine e eita faahou ïa e faatura ’tu. Te titau ra te Atua i te tane ia rave i te ohipa no te haapao i ta ’na vahine e ia faatura ia ’na mai to ’na hoa piri e papu roa ’‘e. (Timoteo 1, 5:8; Petero 1, 3:7) Te na ô ra te Ephesia 5:28: “E aroha atoa te mau tane i ta ratou iho mau vahine e tia ’i mai ta ratou i aroha i to ratou iho tino ra. O tei aroha i tana iho vahine ua aroha ïa ia ’na iho.”

Ma te here, e farii te tane e mea maramarama e aravihi atoa ta ’na vahine. Mai te peu e e ravehia te tahi faaotiraa i taaihia i to raua utuafare, ma te faatura, e tâu‘a te tane i to ’na mana‘o. Eita tera tane e titau ia haapao-noa-hia to ’na hinaaro no te mea o ’na te upoo o te utuafare. A ore ai Aberahama i faaroo i te a‘o tano a ta ’na vahine, ua na ô atu Iehova: “E faaroo oe i te reo o Sara.” (Genese 21:9-12) Ma te haehaa, ua farii to te Atua tavini taiva ore ra o Aberahama i te reira. Ua haamaitai atu ïa te Atua, ua tahoê e ua vai hau noa to ’na utuafare.

Eaha ta te Bibilia e faaue ra i te vahine?

“E te mau vahine, e auraro maite i ta outou mau tane.”—Petero 1, 3:1.

TA TE BIBILIA E PARAU RA

Hou a poiete ai i te hoê vahine no te tane matamua, ua na ô te Atua: “E ere ïa i te mea maitai ia parahi noa Adamu oia ana‘e ra; e hamani au i te tahi tauturu au na ’na.” (Genese 2:18) Ia haa amui ïa te tane e te vahine e tia ’i. I muri iho, ua hamani te Atua i te vahine eiaha no te haru i te tiaraa o te tane aore ra no te tatau e o ’na, no te tauturu atu râ. Ma te ohipa amui, e nehenehe raua e fanau e e faaî i te fenua i ta raua mau tamarii mai ta te Atua i faaue atu.—Genese 1:28.

Ia nehenehe te vahine e amo i ta ’na hopoia, ua horoa ’tu te Atua i te tino, feruriraa faahiahia e huru maitatai. Ia faaohipa oia i te reira ma te paari e te here, e oaoa raua e e tiaturi papu atu ïa ta ’na tane. No te Atua, e mea tia ia haamaitai i taua vahine ra. *Maseli 31:28, 31.

^ par. 5 E farii te Bibilia i te faataaraa ia faaturi hoê.—Mataio 19:9.

^ par. 14 E au roa te feia faaipoipo i te mau mana‘o tauturu no nia i te faaipoiporaa e oraraa utuafare i roto te mau tumu parau “Tauturu no te utuafare” o te A ara mai na!