Te pahonoraa a te Bibilia

 Na mua ˈˈe te feia mana e haamau ai i ta ratou mau faatureraa no nia i te faaipoiporaa, ua horoa ê na to tatou Atua poiete i te mau aratairaa papu no nia i te faaipoiporaa. Te na ô ra te buka matamua o te Bibilia: “No reira te hoê tane e faarue ai i to ˈna metua tane e to ˈna metua vahine, a ati atu ai i ta ˈna vahine faaipoipo, e e riro raua ei hoê.” (Genese 2:24) I muri aˈe, ua haapapu atoa Iesu o “te tane e te vahine” anaˈe te nehenehe e taati na roto i te faaipoiporaa.—Mataio 19:4.

 No reira, ua opua te Atua ia riro te faaipoiporaa ei faanahoraa tamau, eiaha râ no te hoê taime poto. No te aha? Ia nehenehe te hoê here taa ê e tupu i rotopu i te tane e ta ˈna vahine faaipoipo. Mea taa ê te hamaniraa o te tane, mea taa ê te hamaniraa o te vahine. Eaha te tumu? Ia nehenehe raua e riro ei tauturu au no te tahi e te tahi i te pae aau e te pae taatiraa a nehenehe atu ai raua e fanau i te tamarii.