Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Tenuare 2014

 TAUTURU NO TE UTUAFARE | NO TE FEIA FAAIPOIPO

E nafea ia faaroo maite?

E nafea ia faaroo maite?

TE FIFI

“Aita iho â oe e faaroo ia ’u!” ta ta oe ïa vahine e parau. I roto râ ia oe, te mana‘o ra ïa oe “Oia hoi.” E au ra e, mea ê roa ta oe i taa i tei parauhia ’tu. E tatama‘i ïa te hopearaa.

E nafea râ ia ore te reira ia tupu faahou? Na mua, mea faufaa ia ite i te tumu i ore ai oe i taa i ta to hoa faaipoipo i parau atu noa ’tu e no oe, te faaroo atura oe.

TE TUMU

Tei te vahi ê to feruriraa e ua rohirohi atoa paha. Te tutuô ra te tamarii, mea puai te afata teata e te feruri ra oe i te fifi i tupu i te ohipa. I tera taime, paraparau mai nei ta oe vahine no te mau taata e haere atu i te fare i teie po. Aita paha oe i tâu‘a maitai i ta ’na i parau, tairi noa ’tu râ oe i to upoo no te faaite e te “e” atura oe! Ua faaroo mau anei râ oe i tei parauhia ’tu? Aita paha.

E mana‘o ino oe. Te mana‘o ra oe e e ohipa to muri mai i te mau parau atoa a ta oe vahine. Ma te na reira, te faatupu ra ïa oe i te fifi. Ei hi‘oraa, ia parau atu oia: “Mea rahi te hora hau ta oe i rave i teie hebedoma.” Mana‘o ino a‘era oe ma te na ô: “Eaha, no ’u ïa te hape? O oe hoi tera e hue noa ra ta tâua moni!” Pahono mai nei ta oe vahine ma te parau: “Aita hoi vau e faahapa ra ia oe!” Ta to hoa i hinaaro e parau i te omuaraa, ia tamǎrû ïa orua i teie hopea hebedoma, tia ra ’tu ai.

Oioi noa oe i te imi i te ravea. Te na ô ra Marcie *: “I te tahi taime, ta ’u noa e hinaaro, ia faaroo mai ïa Mike. E parau noa mai râ o ’na e nafea ia faaafaro i te fifi. E ere tera ta ’u e hinaaro, ia ite râ o ’na i to ’u mau mana‘o. Oti atu ai!” Te fifi râ, oioi noa Mike i te imi i te ravea, aita râ i faaroo maite i ta Marcie i parau.

Noa ’tu eaha te fifi, e nafea ia faaroo maite?

 E NAFEA ÏA?

A haapao maite i te parauhia ’tura. Mea faufaa te parau ta ta oe vahine e hinaaro e faaite atu, ua ineine anei oe i te faaroo? Peneia‘e, aita. I tera taime, te feruri ra paha oe i te tahi mea, eiaha ïa e faahua faaroo. Ia nehenehe, a vaiiho i te ohipa ta oe e rave ra e a faaroo atu. Eita ana‘e, a ani atu ia tiai maa taime iti.—Aratairaa Bibilia: Iakobo 1:19.

Ia paraparau te tahi, a faaroo atu. Eiaha e tâpû i te parau aore ra e faaite e aita oe e farii ra i to ’na mana‘o. E tae iho â i te taime e nehenehe oe e paraparau. I tera râ taime, a faaroo noa.—Aratairaa Bibilia: Maseli 18:13.

A aniani atu. Ma te na reira e taa roa ’i paha oe i ta to hoa faaipoipo i parau atu. Ua na ô Marcie tei faahitihia ’tu na: “Mea au roa na ’u ia aniani mai ana‘e Mike. E tapao faaite ïa e ua tâu‘a o ’na i ta ’u i parau atu.”

A feruri i ta ’na i hinaaro e parau. A haapao i to ’na huru, hoho‘a mata e toparaa reo. Ia ani atu oe eaha to ’na huru, i te toparaa o to ’na reo, e taa ia oe e mea maitai anei aore ra eita. Ia na ô atu o ’na: “Aita roa oe e tauturu maira ia ’u,” ta ’na i hinaaro e parau, e au ra e no ’na, aita oe e tâu‘a ra ia ’na. Noa ’tu e aita o ’na i parau atu, tera râ te poroi ta ’na e hinaaro ia taa oe. No reira, eiaha ïa e tatama‘i no tei parauhia, e feruri râ i te auraa o tei parauhia.

A faaroo noa. A tâu‘a i te parauhia ’tura e noa ’tu e eita oe e au ra i te reira, eiaha e taie. E nafea oe ia faahapa ’tu to hoa? Te na ô ra Gregory tei faaipoipohia hau atu e 60 matahiti: “A faaroo noa, a haapao maite i ta to hoa e parau atura. Te faaite ra ïa oe e taata paari oe. O oe iho â te maitai i muri a‘e.”—Aratairaa Bibilia: Maseli 18:15.

A tâu‘a mau i to hoa faaipoipo. Ia faaroo ana‘e oe, te faaite ra ïa oe i to here. Ia tâu‘a mau oe i to oe hoa, e hinaaro noa iho â ïa oe e faaroo i ta ’na e parau. Ma te na reira, te pee ra ïa oe i teie a‘oraa a te Bibilia: “Eiaha hoi te taata atoa e haapao i ta ’na ana‘e ihora, e haapao atoa râ i to vetahi ê ra maitai.”—Philipi 2:4.

^ par. 9 Ua tauihia te mau i‘oa.