Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TENUARE 2015

 TAUTURU NO TE UTUAFARE | NO TE FEIA FAAIPOIPO

E nafea ia ore te mana‘o e tu?

E nafea ia ore te mana‘o e tu?

TE FIFI

Mea taa ê to oe mana‘o i to to hoa faaipoipo no nia te tahi mea. E au ra e toru ravea i mua ia orua:

  1. E onoono ia faaotihia mai ta oe e mana‘o ra.

  2. E farii noa i te hinaaro o to hoa faaipoipo.

  3. E rave orua toopiti i te haapaeraa.

E na ô paha oe, ‘aita vau e au ra ia parauhia e rave i te haapaeraa. E au ra e eita hoê noa ’‘e i roto ia mâua e nehenehe e rave i ta ’na e hinaaro!’

Ia ravehia te haapaeraa tano, e oaoa mau orua. Hou râ a hi‘opoa ’i e nafea ia na reira, a hi‘o na i te tia ia ite.

TE TIA IA ITE

E titauhia ia haa amui. Hou te faaipoiporaa, i matau na paha oe i te faaoti noa no oe. Ua taui râ i teie nei e e titauhia ia haafaufaa na mua oe e to hoa i to orua faaipoiporaa, eiaha râ te hinaaro o te tahi e te tahi. A mana‘o i te mau maitai ia na reira, eiaha râ i te mau fifi. Te na ô ra te tahi vahine o Alexandra te i‘oa, “e nehenehe te mana‘o o na taata e piti e faaite i te ravea maitai a‘e ia faaafaro i te fifi i ta te tahi i mana‘o o ’na ana‘e.”

Eiaha e mana‘o ia oe ana‘e. Ua papai John M. Gottman, taata tauturu i te feia faaipoipo, “e ere te auraa e titauhia ia farii oe i te mau mea atoa ta to hoa e parau aore ra e mana‘o, mea faufaa râ ia ineine i te tâu‘a i to ’na mana‘o.” * Te faataa-atoa-hia ra i roto i tera buka, ia faaite te tahi i to ’na mauruuru ore i ta te hoa faaipoipo e tamata ra i te rave no te tahi fifi, eita te reira e afaro noa ’‘e.

E farii i te mea e maitai ai te tahi. O vai hoi taata e oaoa i te hoa faaipoipo e titau ia rave mai ta ’na e hinaaro aore ra e onoono ta ’na te ravea maitai a‘e! Mea au a‘e ia ineine na hoa faaipoipo i te rave i te mea e maitai ai te tahi. Te na ô ra te vahine ra o June, “i te tahi taime, e faatia vau i te hinaaro o ta ’u tane ia oaoa oia, tera râ, e na reira atoa o ’na no ’u. Mai tera i roto i te faaipoiporaa, mea tia ia horoa ’tu e ia horoahia mai, eiaha râ ia horoa-noa-hia mai.”

 E NAFEA?

To huru na mua roa. Mai te aha to orua huru ia haamata te aparauraa? E pinepine, e faaite atu te pahonoraa i teie uiraa i te tupu i te hopea o te reira. Ia haamata oe i te aparauraa ma te mau parau e haamauiui, e tupu iho â te tatama‘iraa i te pae hopea. A haapao ïa i te a‘oraa Bibilia: “E faaaau aroha noa, e te hamani maitai, e te haehaa, e te mǎrû, e te faaoromai rahi.” (Kolosa 3:12) E nehenehe tera mau huru maitatai e tauturu ia oe e to hoa ia haapae i te tatama‘i e ia ite e nafea ia faaafaro i te fifi.—Aratairaa Bibilia: Kolosa 4:6.

Te mau mea e tu ai te mana‘o. Ia riri oe a tamata ’i orua i te faaafaro i te fifi, e tapao faaite te reira ua haapao noa paha oe e to hoa i te mea e taa ê ai to orua mana‘o. A feruri na râ i te mea e tu ai te mana‘o. No te tauturu ia orua, a tamata i teie:

A tahi, e tapao te tahi e te tahi i te mau mea faufaa no ’na. Te piti, te mau mea ta orua e farii i te haapae no te faaafaro i te fifi. I muri a‘e, a tauaparau no ta te tahi e te tahi i tapao. Peneia‘e, e faaite atu te reira ua tu to orua mana‘o i nia e rave rahi ohipa. Mai te peu tera iho â, mea ohie a‘e ia rave i te haapaeraa. Ia ore râ, e faufaa-noa-hia orua i tei tapaohia. E itehia hoi te mana‘o o te tahi e te tahi e eaha mau na te fifi.

A tauaparau. Mea ohie roa ia faaafaro vetahi fifi, te tahi atu râ e ere ïa. E piri roa ’tu â te tane e te vahine ia aparau raua. Ma te na reira, e ite paha raua i te ravea maitai a‘e i ta raua i mana‘o no te faaafaro i te fifi.—Aratairaa Bibilia: Koheleta 4:9.

A farii i te taui i to mana‘o. Te na ô ra te Bibilia: “E aroha râ te taata atoa i tana iho vahine, mai te aroha ia ’na ihora, e te vahine ra ia auraro oia i tana tane.” (Ephesia 5:33) Ia faaite noa te tahi i te tahi i to ’na here e faatura, e ineine noa na hoa faaipoipo i te haapao i to te tahi atu mana‘o e peneia‘e i te taui i to ’na mana‘o. Te na ô ra te tahi tane faaipoipo o Cameron te i‘oa: “Te vai ra te tahi mau mea ta oe i ore i hinaaro e rave. Auaa râ te hoa i onoono ai, ua au roa oe i te reira i muri a‘e.”—Aratairaa Bibilia: Genese 2:18.

^ par. 12 No roto mai i te buka Hitu aratairaa no te faaipoiporaa. (Beretane)

No te ite atu â

E nafea ia faaea i te tatama‘i?

E pinepine anei orua e to hoa faaipoipo i te tatama‘i? A hi‘o i te mau faaueraa Bibilia e nehenehe e tauturu atu.

E nafea to outou oraraa utuafare e oaoa ’i?

E hi‘oraa te here o Iesu no te mau tane, vahine, metua e tamarii. Eaha ta ’na e haapii maira?