Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TENUARE 2013

 IA AU I TE BIBILIA

Paradaiso

Paradaiso

Eaha te paradaiso?

TA TE TAATA E PARAU RA

E aai noa te paradaiso. Aore ra e moemoeâ noa i reira te taata maitatai e fana‘o ai i te ora mure ore a oaoa noa ’i i ta ratou e rave.

TA TE BIBILIA E PARAU RA

Ua faahitihia te ta‘o “paradaiso” no te faataa i te ô i Edene te nohoraa o na taata matamua. (Genese 2:7-15) Ia au i te Bibilia ua parahi raua i roto i te hoê aua aita e ma‘i e e pohe i reira. (Genese 1:27, 28) No to raua râ faaroo ore i te Atua i ere ai raua i te paradaiso. Te tohu nei râ te Bibilia e e oaoa noa te taata i roto i te hoê paradaiso a muri a‘e.

FAUFAARAA IA ITE OE

No te mea e aroha te Atua, e haamaitai iho â oia i te feia e haamori ra ia ’na ma te taiva ore i te hoê oraraa maitai i roto i te paradaiso. E faaite iho â oia i te taata eaha te rave ia mauruuru oia, ia noaa ïa te ite no nia ia ’na e ia faaohipa i ta ’na mau faaueraa. Ia na reira oe, e mauruuru oia ia oe. Ta te Bibilia ïa e parau ra.—Ioane 17:3; Ioane 1, 5:3.

“Ua ô hoi te Atua ra o Iehova i te ô . . . i Edene ra, e ua tuu ihora oia i te taata ta ’na i hamani ra i reira.”—Genese 2:8.

 Ihea te paradaiso e vai ai?

TA TE TAATA E PARAU RA

Tei te ra‘i te paradaiso. Aore ra e haamauhia te reira i te fenua a muri a‘e.

TA TE BIBILIA E PARAU RA

Tei te fenua te paradaiso i te matamua ra. Ua haapapu te Atua e e noho te taata i te fenua nei e a muri noa ’tu. Te parau ra te Bibilia e ua hamani oia i te fenua ia vai e a tau a hiti noa ’tu. (Salamo 104:5) Te na ô atoa ra te Salamo 115:16: “Te mau ra‘i ra, na Iehova ïa . . . area te fenua nei, ua horoa mai oia i te reira na te tamarii a te taata.”

No reira te Bibilia e faaite ai i te hoê parau fafau o te paradaiso i te fenua. I reira te Atua e haamaitai ai i te huitaata i te ora mure ore. E rahi te hau e te auhoêraa i reira. E mou roa te oto e te mauiui. I reira ïa te taata e fana‘o roa ’i i te mau mea nehenehe e te rau o te fenua.—Isaia 65:21-23.

“Inaha tei ǒ te taata ra te sekene o te Atua, . . . e e ore roa te pohe, e te oto, e te mihi, e te mauiui.”—Apokalupo 21:3, 4.

O vai te ora i roto i te paradaiso?

TA TE TAATA E PARAU RA

O te feia maitatai ana‘e te parahi i te paradaiso. Mea rahi te haapaoraa e haapii ra i te reira. Aita e rave rahi e taa ra eaha te rave ia fariihia ratou ei taata maitatai. No vetahi, e navai noa ia haere i te mau oroa faaroo e ia pure.

TA TE BIBILIA E PARAU RA

Te haapii ra te Bibilia e o “te feia parau-tia” te ora i roto i te paradaiso. O vai te feia parau-tia i te aro o te Atua? E ere te taata haere pure aita e rave ra i to ’na hinaaro. Te na ô ra te Bibilia: “Tei te tusia taauahi e te mau tusia atoa to Iehova mauruuru, mai tei te faaroo i te parau a Iehova ra? inaha, e maitai rahi tei te haapao i tei te tusia.” (Samuela 1, 15:22) O te feia ïa e haapao i te mau faaueraa a te Atua i roto i te Bibilia “te feia parau-tia” e ora e a muri noa ’tu i roto i te paradaiso.

TA OE E RAVE

Te haapaoraa i te mau faaueraa a te Atua, e ere i te haere-noa-raa i te pureraa. Ua taaihia râ i to oe haerea i te mau mahana atoa. Tei te huru o to oe haerea e mauruuru ai te Atua ia oe aore ra eita. A haapii maite i te Bibilia e ite ai oe eaha ta te Atua e farii. E ere i te mea fifi. Te na ô ra te Bibilia: “E ere hoi ta ’na parau i te mea teimaha.” (Ioane 1, 5:3) Te tiai ru nei te Atua i te haamaitai ia oe no to oe faaroo ia ’na i te oraraa i roto i te paradaiso.

“E parahi te feia parau-tia i nia i te fenua, e parahi tamau â ratou i reira.”—Salamo 37:29.