Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TENUARE 2013

 UIUIRAA MANA‘O | PAOLA CHIOZZI

Te faataa ra te hoê aivanaa ihiora i to ’na faaroo

Te faataa ra te hoê aivanaa ihiora i to ’na faaroo

Ua hau atu i te 20 matahiti to te taote ra Paola Chiozzi ohiparaa ei aivanaa ihiora i te haapiiraa teitei o Ferrara i Italia. I roto i teie A ara mai na! ua uiuihia o ’na no nia i ta ’na ohipa e to ’na faaroo.

A faatia mai na i to oe oraraa na mua ’‘e.

E taata hamani tiaa to ’u papa e e vahine faaapu to ’u mama. O vau râ, ua hinaaro ïa e riro ei aivanaa. Ua faahiahia vau i te nehenehe o te mau tiare, manu e manumanu e haaati ra i to ’u fare. E ere na te taata i hamani i teie mau mea, na te hoê râ e paari hau ê to ’na.

Ua tiaturi noa na iho â anei oe i te hoê Atua Poiete?

Aita. Ua haamata hoi au i te feaa no nia i te Atua a tamariirii ai au. No te hoê ma‘i mafatu, ua pohe taue noa to ’u papa, e ua na ô vau ‘No te aha te Atua Poiete o teie mau mea nehenehe mau i vaiiho ai ia mauiui e ia pohe te taata?’

Ua pahono anei te ihi i ta oe uiraa?

I te haamataraa, aita. I to ’u riroraa mai ei aivanaa ihiora i haamata ’i au i te rave i te mau maimiraa no nia i te pohe. Te pohe-natura-raa o te mau tao‘a tahi ora o to tatou tino. Mea taa ê hoi i te pohe-taue-raa o te mau tao‘a tahi ora o te faatupu i te ma‘i haapê e te ma‘i aai. Noa ’tu e e faanahoraa faufaa tera no to tatou ea, tau matahiti noa i muri a‘e to te mau aivanaa tâu‘araa i te reira.

No te aha mea faufaa ’i ia pohe te tao‘a tahi ora?

E miria e miria tao‘a tahi ora to te tino. E pohe iho â e e monohia mai te rahiraa o te reira. E ora maoro a‘e te tahi tao‘a tahi ora i te tahi atu. E monohia te tahi tau hebedoma e te tahi atu tau matahiti i muri a‘e. Ia maitai noa to tatou tino, mea faufaa ia faito noa te poheraa e te faaapîraa o te mau tao‘a tahi ora.

Eaha te fifi e nehenehe e tupu?

Ia au i te tahi mau hi‘opoaraa, aita ana‘e te mau tao‘a tahi ora e pohe i te taime faataahia, e  tupu ïa te ma‘i rumati aore ra te ma‘i mariri ai taata. I te tahi a‘e pae, ia pohe te mau tao‘a tahi ora na mua ’‘e, e tupu mai ïa te mau ma‘i Parkinson aore ra Alzheimer. Ta ’u ohipa, o te maimiraa ïa i te mau ravea rau no te rapaau i tera mau ma‘i.

Eaha te faahopearaa o ta oe ohipa i nia ia oe?

Ua haafifi te reira i to ’u feruriraa. Mea papu e i opuahia ’i teie faanahoraa faahiahia, no te hinaaro ïa ia maitai noa to tatou tino. Ua uiui noa râ vau, No te aha te taata e mauiui e e pohe ai? Aita râ i itea te pahonoraa.

Ua farii râ oe e e mea opuahia tera faanahoraa ia pohe te tao‘a tahi ora.

E. Mea faahiahia mau te huru fifi o te taatoaraa o tera faanahoraa, e faaite mai râ te au-maite-raa o te reira i te tahi paari taa ê. Te tiaturi nei au e o te paari ïa o te Atua. Te faaohipa nei au i te mau hi‘o faarahi no te hi‘opoa i te mau ravea rau a te tino ia tere maitai noa tera faanahoraa. Ia titauhia, e ravea ta te tino no te haapohe i te mau tao‘a tahi ora i roto tau tetoni noa. Na te mau tao‘a tahi ora iho â e haapohe ia ratou. Ua faahiahia roa vau i teie faanahoraa hamani-maitai-hia!

I te mea e e tamau noa te rahiraa o to tatou mau tao‘a tahi ora i te monohia, mea papu ïa te ora mure ore

I uiui na râ oe no nia i te Atua e te tumu e mauiui ai te taata. Mea nafea oe i te iteraa i te pahonoraa?

E piti taurearea Ite no Iehova 16 e 17 matahiti tei haere mai i to ’u fare i 1991. Ua ani atu vau ia raua no te aha tatou e pohe ai. Ua faaite mai raua i ta te Bibilia e pahono ra: “No te taata hoê ra i ô mai ai te ino i te ao nei, e no te ino hoi te pohe.” (Roma 5:12) Ahiri na taata matamua i faaroo i te Atua, e ora ïa te taata e a muri noa ’tu. Ua papu a‘era ia ’u e te tano ra teie mau parau i ta ’u i ite maoti ta ’u mau maimiraa. Aita iho â te Atua i opua ia pohe te taata. I te mea e e tamau noa te rahiraa o to tatou mau tao‘a tahi ora i te monohia, mea papu ïa te ora mure ore.

No te aha oe i tiaturi ai e e Parau na te Atua te Bibilia?

Ua haapii au i ta te Bibilia e parau ra no nia i te Atua i roto i te Salamo 139:16: “Ua ite to mata ia ’u i to ’u vai-oti-ore-raa ra; e ua oti to ’u mau melo atoa ra i te papaihia i roto i te buka na oe.” Ei aivanaa ihiora, ua imi au i te mau haamaramaramaraa no nia i te tapao tupuna i roto i to tatou mau tao‘a tahi ora. Mea nafea te papai salamo i te iteraa i te reira? Rahi atu â vau i te haapii i te Bibilia, rahi atu â vau i te tiaturi e mea faaurua te reira.

Mea nafea oe i te tautururaahia ia taa i ta te Bibilia e haapii ra?

Ua haapii au i te Bibilia e te hoê Ite no Iehova. I te pae hopea ua taa ia ’u no te aha te Atua e vaiiho ai ia mauiui te taata. Mai ta te Bibilia e faataa ra, ua haapii atoa vau e na Iehova “e haamou roa i te pohe e a muri noa ’tu.” (Isaia 25:8) I tera taime, e ohipa to tatou tino ma te maitai roa. E mea ohie ïa i to tatou Atua Poiete ia haafana‘o ia tatou i te ora mure ore.

Mea nafea oe i te faaohiparaa i to oe ite i te Bibilia no te tauturu ia vetahi ê?

Ua riro mai au ei Ite no Iehova i 1995, e mai reira mai ua tufa vau ia vetahi ê i ta ’u i haapii i roto i te Bibilia. Ei hi‘oraa, ua hepohepo roa hoê o to ’u mau hoa a haapohe ai to ’na taeae ia ’na iho. Te haapii ra ta ’na haapaoraa e eita roa ’tu te Atua e faaore i te hara e haapohe ia ’na iho. Ua faaite atu râ vau i te tiaturiraa Bibilia o te tia-faahou-raa. (Ioane 5:28, 29) Ua itoito roa oia i te iteraa e te tâu‘a ra te Atua ia tatou. I tera mau taime, ua mauruuru rahi a‘e vau i te tufaraa i te pue parau mau Bibilia ia vetahi ê i te raveraa i ta ’u mau maimiraa i te pae o te ihi.