Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TENUARE 2013

 TUMU PARAU MATAMUA

Ia aha oe ia tâu‘a ta oe tamarii ia vetahi ê?

Ia aha oe ia tâu‘a ta oe tamarii ia vetahi ê?

I TE mau mahana atoa e nehenehe iho â te taata e rave i te tahi mea maitai no te tahi atu. E haapao noa râ te rahiraa ia ratou. Ta tatou ïa e ite nei fatata i te mau vahi atoa. E taviri hanoa te taata i te tahi atu, mea tere ia faahoro i te pereoo, oioi atoa i te tuhi e te iria ia vetahi ê.

Eaha te ite-atoa-hia ra i roto e rave rahi utuafare? E haapao noa vetahi ia ratou. Te taa nei te tahi mau hoa faaipoipo no te mea te mana‘o ra te hoê e mâu‘a noa o ’na no to ’na apiti. E faatiatia noa ’toa vetahi mau metua i te tamarii e aita e a‘o nei ia ratou. E mana‘o iho â ïa te tamarii ia ratou na mua roa.

Te vai nei râ te mau metua o te haapii nei i ta ratou mau tamarii ia tâu‘a ia vetahi ê na mua. Mea ohie ïa no teie mau tamarii ia faahoa e ia fana‘o i te taairaa piri e vetahi ê. E mauruuru hanoa ’toa ratou. No te aha? Ia au i te Bibilia: “E rahi a’e te oaoa o tei horoa atu i to tei farii mai.”—Ohipa 20:35, Te Faufaa Api.

Ei metua, ia aha oe ia maitai ta oe mau tamarii? E nafea ia tauturu ratou ia ore e haapao noa ia ratou mai te rahiraa? E hi‘o ana‘e e toru haerea e haapae e e nafea ia na reira.

 1 Faatietie

Te fifi. Ua tapao vetahi feia maimi e mea rahi te taata apî e imi ra i te ohipa ma te mana‘o e e manuïa iho â ratou mai tera noa. No vetahi, e maraa oioi te moni ohipa noa ’tu e mea ma‘ua ratou. No te tahi atu, “o vau teie.” Aita ïa ta vera ma e parau. Ia ore râ vera ma e mana‘o mai ia ratou, e hepohepo roa ïa ratou.

Te tumu. Mea faatietie vetahi mau metua i ta ratou mau tamarii. No te aha? Tau matahiti a‘enei, ua parare te mana‘o e mea maitai ia tiaturi roa te tamarii ia ’na. No reira tera mau metua i mana‘o ai e mea maitai ia haapopou i te tamarii, mea maitai a‘e râ ia faatietie atu. Eiaha ïa te hoê metua e tama‘i i ta ’na tamarii no te tahi hape ta ’na i rave, e toaruaru hoi te tamarii. Ia tama‘i noa ’tu oia ia ’na, e metua ino ïa oia. No reira te mau metua i faaitoitohia ’i eiaha roa ’tu e haapeapea i ta ratou mau tamarii.

No reira e rave rahi papa e mama i faatietie noa ’i i ta ratou mau tamarii noa ’tu e aita ratou i rave i te tahi mea faahiahia. E tupu roa te tamaaraa no te mau ohipa rii atoa ta te tamarii i rave. Ia hape oia, eita oia e a‘ohia. No tera mau metua, ua faatietie ana‘e-hia te tamarii no te maitai ta ’na i rave ma te ore e haapao i ta ’na mau hape, e tiaturi rahi ïa o ’na ia ’na. Te mea faufaa a‘e no ratou, ia oaoa noa te tamarii. E ere râ te haapiiraa ia rave i te mau mea e oaoa ’i ratou.

Ta te Bibilia e parau ra. Ia au i te Bibilia mea maitai ia haapopou i te tahi ia tano. (Mataio 25:19-21) Aita ana‘e râ, e hape ïa te mana‘o o te tamarii no nia ia ratou. No reira te Bibilia e parau ai: “Ia manao noa atu te tahi e, e taata rahi oia, ’e e taata faufaa ore hoi oia, ua vare ïa oia iana iho.” (Galatia 6:3, Te Faufaa Api) Te na ô ra hoi te Bibilia i te mau metua: “Eiaha e haamairi i te a‘o i te tamaiti.” *Maseli 23:13.

Ta oe e rave. A a‘o i ta oe tamarii ia titauhia e a haapopou atu ia tano. Eiaha e haapopou hanoa ia ratou. Ia au i te hoê buka, e tiaturi te hoê taata ia ’na ia rahi atu â to ’na aravihi e to ’na ite, eiaha râ ia faatietie noa vera ma ia ’na.—Generation Me.

“Eiaha ia hau te mana‘o ia ’na iho, i tei au ia ’na ia mana‘o.”—Roma 12:3

 2 Paruru roa ino

Te fifi. E au ra e aita e rave rahi taata apî i ineine i te faaruru i te fifi ia imi ratou i te ohipa. E ma‘e‘e roa vetahi ia faahapa-rii-hia ratou. Area te tahi atu, mea maiti roa ïa i te ohipa. Ia au i te hoê taata papai buka, o Joseph Allen te i‘oa, ua parau te hoê taata apî e eita o ’na e au i te ohipa mea haumani. E au ra e aita oia i ite e e tuhaa haumani iho â to te mau ohipa atoa. E 23 hoi matahiti to ’na.—Escaping the Endless Adolescence.

Te tumu. Tau matahiti a‘enei, ua mana‘o e rave rahi metua e mea maitai ia paruru i ta ratou tamarii i te mau fifi rau. Ia fifi ta ratou tamahine i te hoê hi‘opoaraa a te haapiiraa, e farerei ratou i te orometua haapii. Ia papaihia ta ratou tamaiti e te mutoi, na ratou e aufau i te utua. Ia faaruehia ta ratou tamaroa, e faahapehia ïa te potii.

Mea tano iho â ia paruru i te tamarii. Ia paruru-roa-hia râ ratou, e ô mai te mana‘o e aita e faufaa ia amo i te hopoia no ta ratou e rave. Ia au i te hoê buka, ia ore ratou e haapii i te faaoromai i te mauiui e te inoino e ia ore e huti mai i te haapiiraa, e paari mai ïa teie mau tamarii ma te mana‘o noa ia ratou. E ma te tiaturi i te metua e ia vetahi ê ia noaa mai ta ratou e hinaaro.—Positive Discipline for Teenagers.

Ta te Bibilia e parau ra. Te faaite ra te Koheleta 9:11 e e fifi iho â tatou paatoa, te feia maitai atoa. Ei hi‘oraa ua faaruru te aposetolo Paulo e rave rahi fifi i te roaraa o ta ’na taviniraa. Ua huti mai râ oia i te haapiiraa. Ua papai oia: “Ua ite hoi au i te faaoroma’i i te mau mea atoa . . . Ua haamātauhia vau i te ora ma te paia ’e ma te poia, ma te navai ’e ma te navai ore.”—Philipi 4:11, 12, Te Faufaa Api.

Ta oe e rave. Ia au i te Galatia 6:5, na te taata iho e amo i ta ’na hopoia. A tutava i te pee i teie aratairaa Bibilia ia au i te faito matahiti o te tamarii. Ia papaihia ta oe tamaiti e te mutoi, mea maitai a‘e e na ’na iho e aufau i te utua i ta ’na moni. Ia fifi ta oe tamahine i te hoê hi‘opoaraa a te haapiiraa, e nehenehe te reira e haaferuri ia ’na a faaineine maitai atu ai no to mua ’tu hi‘opoaraa. Ia faaruehia ta oe tamaroa e te hoê potii, a tamahanahana ’tu. E i te taime tano, a tauturu ia ’na ia feruri i teie uiraa, ‘Te vai ra anei te tahi mea ta ’u e nehenehe e haamaitai?’ Ia faaruru te mau tamarii i to ratou mau fifi, e haapii ratou eaha te rave, a tiaturi atu ai ratou ia ratou. Mai te peu e e paruru roa ino te metua ia ratou, eita te tamarii e ite e nafea.

“E hi‘opoa maite na râ te taata atoa i ta ’na ihora ohipa, e riro tana oaoaraa ia ’na iho i reira.”—Galatia 6:4

 3 Faatiatia noa

Te fifi. I te uiuiraahia vetahi feia apî, e 81 i nia i te hanere tei parau e ta ratou fa matamua “ia monihia ïa ratou.” To muri roa te tautururaa ia vetahi ê. Eita râ te tutavaraa ia onahia e faaoaoa. Ia au i te tahi mau maimiraa, e hepohepo roa te taata ia tapi i te mau tao‘a materia. Mea rahi te ma‘ihia e te ino te feruriraa.

Te tumu. Ua paari mai vetahi tamarii i roto i te mau utuafare nounou tao‘a. Ia au i te hoê buka, te hinaaro nei te mau metua ia oaoa ta ratou tamarii. E taihaa râ ta ’na e hinaaro. E hoo mai ïa te metua i te reira. E oaoa râ te tamarii maa taime noa. E titau mai â o ’na i te tahi atu taihaa.—The Narcissism Epidemic.

No te mau poroi faatianiani e hiaai noa ’i te taata e hoo mai. “Mea maitai a‘e tera no oe” e “Tano maitai tera no oe.” Ua vare e rave rahi taata apî i tera mau poroi. I teie nei, mea rahi ta ratou tarahu eita e pee ia aufau.

Ta te Bibilia e parau ra. Te faaite ra te Koheleta 7:12 e e hinaaro iho â tatou i te moni. Te faaara atoa maira râ te Bibilia e ‘o te nounou moni te tumu o te mau ino atoa, i te titau-noa-raa i te reira ua patiatia pupu roa te tahi pae ia ratou iho i te oto e rave rahi.’ (Timoteo 1, 6:10) Eiaha ïa tatou e tapi i te mau mea materia, ia mauruuru râ i tei hinaaro-mau-hia. Ta te Bibilia ïa e faaitoito maira.—Timoteo 1, 6:7, 8.

“Area te feia e mârô e ia rahi te tao‘a, e roohia ïa i te ati, e te marei, e te nounou maamaa e rave rahi, e ino ai te taata.”—Timoteo 1, 6:9

Ta oe e rave. Ei metua, a feruri eaha to oe mana‘o i te moni e te mau mea ta oe e hoo mai. A tapi i te mea faufaa a‘e no oe e a haapii i ta oe mau tamarii ia na reira ’toa. Ia au i te hoê buka, e nehenehe te metua e haaferuri i ta ’na tamarii ia hoo mai i te tahi mea i te tau hoo-mâmâ-raa. Ia uiui te tamarii e tera mau anei ta ratou e hinaaro aore ra eita. Aore ra mea mâmâ iho â anei tera mea. E no te aha ratou i hoo mai ai i te reira. Peneia‘e na vera i parau atu.—The Narcissism Epidemic.

Eiaha roa e hoo mai i te tahi “taihaa” no te haamoe i te hoê fifi utuafare e titauhia ia faaafaro. Ia au i te hoê buka, e ere i te hooraa mai i te tiaa e te pute e afaro ai te fifi. Mea maitai râ ia mana‘o, ia feruri maite e ia taa i to vetahi ê huru.—The Price of Privilege.

^ par. 11 Aita te Bibilia e parau ra ia hamani ino e ia haamauiui i te tamarii. (Ephesia 4:29, 31; 6:4) Ia a‘o te metua, no te haapii, e ere râ no te haamâha i to ’na riri.