Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 4 2017

Praslin i Seychelles i 1881 a ite ai te tenerara Gordon i ta ’na i pii te ô Edene

Te paradaiso i nia i te fenua, e moemoeâ anei?

Te paradaiso i nia i te fenua, e moemoeâ anei?

Te paradaiso, mea rahi te mau buka rairai nehenehe maitai o te faatianiani mai ia reva i te tahi vahi atea no te tamǎrû e no te haamo‘e i to tatou mau fifi. Ua ite paatoa râ tatou, ua ho‘i ana‘e i te fare, te vai noa ra te fifi o te oraraa mai te taime i faarue ai tatou i te fare!

Noa ’tu râ, eita te taata e faaea i te mana‘o i te paradaiso. E hiti noa mai te mau uiraa mai teie: “E moemoeâ noa anei te paradaiso? Mai te peu e, no te aha te taata e mana‘o noa ’i i te reira? I te hoê mahana, e nehenehe anei tatou e ora i roto i te paradaiso?”

TE PARADAISO I TERA E TERA U‘I

I te roaraa o te tau, ua mana‘o noa iho â te taata i te paradaiso. Te tahi tumu, no ta te Bibilia faahitiraa i “te ô i te pae i te hitia o te râ i Edene.” I muri iho, te na ô atoa ra: “Ua faatupu te Atua ra o Iehova i te mau raau maitatai atoa ia hi‘o, e tei au ei maa, i taua fenua ra.” No te aha te taata e anaanatae ai i tera ô, aore ra aua? No te mea e vahi nehenehe e te au mau. Te mea faahiahia ’tu â, i reira te vai ra “te raau [o te] ora i ropu i taua ô ra.”—Genese 2:8, 9.

Te faaite atoa ra te buka Genese i te i‘oa o na anavai e maha e tahe ra mai roto mai i tera aua. E piti o tei matauhia tae roa mai i teie mahana, te anavai Hidekela e te Eupharate. (Genese 2:10-14) E tahe na anavai na roto atu i te fenua o te parauhia i teie nei o Irakia (tuhaa o Peresia na mua ’‘e) a topa ’tu ai i te ooa no Peresia.

Mai te tau mai â, ua tiaturi te feia no Peresia tei nia i te fenua te paradaiso e ua riro roa te reira ei tuhaa o ta ratou peu tumu. Ua vaiihohia hoê o te mau tao‘a faanehenehe tahua a to Peresia no te mau matahiti 1501 i te fare vairaa taihaa tahito i Philadelphia i te Hau amui no Marite. I nia iho, ua hamanihia te hoho‘a o te tahi ô auahia e te itehia ra i roto e rave rahi raau e tiare. Ia hurihia te ta‘o Peresia no te parau ô auahia, paradaiso ïa te auraa. Te faahoho‘a maitai ra tei hamanihia i nia i tera tao‘a faanehenehe tahua i te faataaraa a te Bibilia no nia i te nehenehe e te ruperupe o te ô i Edene.

Ua faatia-noa-hia te mau aamu no nia i te paradaiso na roto e rave rahi reo i roto i tera e tera nunaa taata na te ao. A haamau ai i to ratou puhapa i tera e tera vahi, ua hopoi atoa te taata i te faatiaraa tumu o te reira. A mairi ai râ te tau, ua anoihia ’tu te mau tiaturiraa e aai o tei taui i te mana‘o o te taata no nia i te paradaiso. Tae roa mai râ i teie tau, e pii te rahiraa i te mau vahi nehenehe roa ei paradaiso.

UA IMI HAERE I TE PARADAISO

Ua parau vetahi feia o tei fano i tera e tera vahi no te imi i te fenua apî, ua itehia ia ratou te paradaiso. A tere ai i te mau taamotu Seychelles i 1881, ua faahiahia roa ino te tenerara o te nuu Beretane o Charles Gordon i te nehenehe e te ruperupe o te tahi vahi piihia Vallée de Mai. Ua parau roa oia o te ô Edene tera vahi. I teie nei, e faa paruruhia te reira. I 1492, ua feruri te ihitai Italia o Christophe Colomb aita anei oia i fatata i te ite mai i te ô Edene i to ’na taeraa i nia i te motu rahi Hispaniola. I teie mahana, e piti tuhaa te vai ra i tera motu, hoê o te piihia Repupirita Dominicaine e te tahi atu o Haïti.

Ua tuuhia hau atu i te 190 hoho‘a fenua no te tau tahito i roto i te tahi buka tuatapapa e e rave rahi o tei faahoho‘a ia Adamu e Eva i roto i te ô Edene. (Mapping Paradise) Mea maere mau hoê o tera mau hoho‘a fenua no roto mai i te papai parauhia Beatus de Liébana no te senekele 13. I nia roa, te vai ra te hoho‘a o te hoê afata nainai, i ropu i te reira o te paradaiso ïa. Mai roto mai e tahe ra e maha anavai, te “Hidekela,” te “Eupharate,” te “Pisona” e te “Gihona” e e maha amaaraa to te anavai taitahi. E au ra ua hinaarohia e faahoho‘a te parareraa o te haapaoraa Kerisetiano i na poro e maha o te fenua. Te faaite ra tera mau hoho‘a noa ’tu aita i itehia teihea te paradaiso i reira Adamu raua Eva i te nohoraa, ua hinaaro noa iho â te taata ia haamana‘ohia te reira i te roaraa o te tau.

Ua matauhia John Milton te tahi rohipehe Beretane tei fanauhia i 1608 no ta ’na buka iti Ua mo‘e te paradaiso (Beretane). Ua faaohipa oia i te faatiaraa a te Genese  no nia i te hara a Adamu e te tiahiraahia raua i rapae i te ô Edene. I roto, ua haafaufaa oia i te parau e horoa-faahou-hia i te taata te ora mure ore i nia i te fenua. Ua na ô oia: “E riro hoi te fenua taatoa ei paradaiso.” Ua papai atoa Milton i muri a‘e i te buka iti E haamau-faahou-hia te paradaiso (Beretane).

UA TAUI TE MANA‘O NO NIA I TE PARADAISO

Te taa-maitai-hia ra ua riro te paradaiso i nia i te fenua ei tumu parau feruri-noa-hia e te taata mai te tau mai â. No te aha ïa te taata e mana‘o ai i teie mahana tei nia i te ra‘i te paradaiso? Te parauhia ra i roto i te buka tuatapapa faahitihia na mua ’tu: “Ua maiti te feia maimi i te pae faaroo . . . i te haafaufaa ore tei nia i te fenua te paradaiso.”

E haapiihia i te rahiraa o te feia haere pure tei te ra‘i to ratou faaearaa hopea, eita ’tura e parau-faahou-hia e ora te taata i roto i te paradaiso i nia i te fenua. Area te Bibilia, te parau ra ïa i roto i te Salamo 37:29: “E parahi te feia parau-tia i nia i te fenua, e parahi tamau â ratou i reira.” I te mea e ere roa ’tu to tatou oraraa mai i roto i te paradaiso, e nehenehe anei e tiaturi e tupu tera parau fafau i te hoê mahana? *

E ERE I TE MOEMOEÂ!

Ua fafau te Atua ra o Iehova e riro faahou te fenua ei paradaiso mai ta ’na i opua i te haamataraa. Eaha ta ’na ravea? A haamana‘o na ua haapii mai Iesu ia pure: “Ia tae mai ta oe Faatereraa arii. Ia tupu to oe hinaaro i te fenua nei, mai i te ra‘i atoa na.” (Mataio 6:10) O Iesu Mesia te Arii o tera faatereraa e na ’na e faaore i te mau faatereraa a te taata. (Daniela 2:44) I raro a‘e i te aratairaa a tera Faatereraa arii, e faatupuhia te hinaaro o te Atua e e riro faahou te fenua ei paradaiso.

Te mauiui nei râ te taata no te mau peapea e fifi i te pae o te ea, te imiraa faufaa, te oraraa utuafare, no te au-ore-raa i tera e tera nunaa taata, no te taa-ê-raa o te haapaoraa, no te haaviiviiraa fenua e te vai ra ’tu â. I raro a‘e i te aratairaa a te varua mo‘a o te Atua, ua faaite te peropheta Isaia mai te aha te huru o te oraraa i roto i te paradaiso. E faaorehia te mau mea atoa o te haamauiui nei i te taata! (Isaia 11:6-9; 35:5-7; 65:21-23) No reira, te faaitoito ra matou ia oe ia rave maa taime no te taio i tera mau irava i roto i ta oe iho Bibilia. E tamahanahanahia oe ia ite i te mau haamaitairaa rahi ta te Atua i faaineine no te feia e faaroo ia ’na. O ratou hoi te fana‘o i ta Adamu raua Eva i ere, te hoê oraraa oaoa i roto i te paradaiso e te farii maitai a te Atua!—Apokalupo 21:3.

Na te aha e haapapu ra e ere te oraraa i roto i te paradaiso i nia i te fenua i te moemoeâ? Na te Bibilia, te na ô ra hoi: “Te mau ra‘i ra, na Iehova ïa mau ra‘i; area te fenua nei, ua horoa mai oia i te reira na te tamarii a te taata nei.” Te tiaturiraa e ora i roto i te paradaiso i nia i te fenua, na “te Atua, te ore e nehenehe e haavare, i fafau mai tahito mai â.” (Salamo 115:16; Tito 1:2) Auê te faahiahia, te haapapu mai ra te Bibilia e riro te fenua ei paradaiso e a muri noa ’tu!

^ par. 15 A hi‘o atoa na i te parauhia ra i roto i te Coran, te buka Al-Anbiya [Te mau peropheta] i te pene 21 e te irava 105: “E parahi te taata parau-tia i rotopu i ta ’u mau tavini i nia i te fenua.”