Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Tenuare 2013

 TAUTURU NO TE UTUAFARE | NO TE METUA

E nafea ia tauaparau e ta oe tamarii?

E nafea ia tauaparau e ta oe tamarii?

TE FIFI

A tamarii ai, e parau mai oia i te mau mea atoa, a taurearea ’i râ, eita faahou ïa. Ia tamata oe i te aparau atu, mea potopoto ta ’na mau pahonoraa aore ra e imi oia i te ravea e tupu ai te tatama‘iraa.

E nehenehe oe e haapii i te paraparau i ta oe tamarii. Na mua râ, e hi‘o ana‘e e piti tumu e riro ai paha te reira ei fifi. *

TE TUMU

Te hinaaro ia rahi atu â te tiamâraa. Mai te taata e hi‘o noa e haapii i te riro mai ei taata faahoro pereoo, e titauhia ia haapiipii te taurearea e nafea oia e riro ai ei taata feruriraa paari. E hinaaro iho â te tahi mau taurearea ia rahi atu â to ratou tiamâraa. I te tahi a‘e pae, aita te mau metua e horoa roa ra i te tiamâraa. E faatupu te reira i te peapea i rotopu i te metua e te taurearea. Te parau ra Brad, 16 matahiti: “Te tamata nei to ’u mau metua i te faatere i te mau tuhaa atoa o to ’u oraraa.” * “Ia ore raua e horoa mai i to ’u tiamâraa, ia tiahia to ’u 18 matahiti, e ume au!”

Taa-ê-raa o te mana‘o. Mea ohie te mana‘o o te tamarii apî. No ratou mea tano aore ra mea hape te tahi mea. No te taurearea râ, te taa ra ratou i te fifi o te tahi tuhaa o te oraraa. A paari ai ratou, e tauturu te reira ia ratou ia faataa i te mea maitai i te mea ino. Ei hi‘oraa: No te faataa i te mea tano, e na ô te tamarii apî: ‘Ua horoa mai mama hoê afa momona na ’u e hoê afa momona na to ’u teina.’ No ’na, mea tia tera opereraa. No te mau taurearea râ, e ere mai tera roa. I te tahi taime, e mana‘o ratou e e ere te mea tia i te mea tano, e te mea tano ra e ere ïa i te mea tia. E haapii te taurearea e nafea ia faaruru i te fifi e ia rave i ta ’na iho mau faaotiraa. Eaha râ te fifi? Eita to ’na mana‘o e tu e to to ’na metua.

 E NAFEA?

Ia nehenehe, a paraparau ma te au. A haafaufaa i te mau taime e nehenehe ai e na reira. Ei hi‘oraa, ua itea ia vetahi metua e mea ohie a‘e no te feia apî ia paraparau a rave ai ratou i te ohipa aore ra a tere ai na nia i te pereoo tei pihaiiho ana‘e te hoê o raua ia ratou eiaha râ i te taime mârôraa.—Faaueraa tumu: Deuteronomi 6:6, 7.

Eiaha ia rahi te parau. Eiaha e faariro i tera mau taime ei tatama‘iraa hau ore. A faaite râ i te mana‘o . . . ua oti ana‘e, a mamû. E “faaroo” te taurearea i te rahiraa o te poroi i muri a‘e, a vai ai o ’na ana‘e e a feruri ai oia i ta outou parau. A vaiiho i te taime no ’na.—Faaueraa tumu: Maseli 1:1-4.

A faaroo e a faaau ohie atu. A faaroo maitai atu, eiaha e tâpû i te parau, ia nehenehe oe e ite i te hohonuraa o te fifi. Ia pahono oe, a faatano i te parau. Ia etaeta roa oe, e imi ta oe tamarii i te hororaa. Te parau ra te buka Staying Connected to Your Teenager: “E tupu te reira mai te peu e e piti huru oraraa to te tamarii. E parau o ’na i ta te metua e hinaaro e faaroo, e rave râ o ’na mai ta ’na e hinaaro aita ana‘e te mau metua i pihaiiho ia ’na.”—Faaueraa tumu: Philipi 4:5.

Eiaha e riri vave. Te parau ra te taurearea vahine ra o Kari: “Aita ana‘e to mâua mana‘o e tu, e riri hanoa to ’u mama. E inoino vau e e riro oioi te tauaparauraa ei aimârôraa.” Mai tera ana‘e te tupuraa, a faaite i ta oe tamarii e te tâu‘a ra oe ia ’na. Ei hi‘oraa, eiaha e parau atu: “E ere te reira i te mea fifi roa!” a na ô atu râ, “Te ite ra vau e te peapea ra oe.”—Faaueraa tumu: Maseli 10:19.

Ia nehenehe, a aratai, eiaha e haavî. E titauhia ia mataro ta oe tamarii i te faaohipa i to ’na feruriraa. No reira, ia fifihia o ’na, eiaha e faaoti no ’na. Ia tauaparau orua no tera fifi, a vaiiho ia ’na ia imi i te mau ravea no te tatara i te reira. I muri a‘e, a parau atu: “O te tahi noa mau ravea tera. A rave i te taime no te feruri â e i muri a‘e, e nehenehe tâua e aparau faahou no nia i ta oe faaotiraa e te tumu i na reira ’i oe.”—Faaueraa tumu: Hebera 5:14.

^ par. 5 Noa ’tu e i roto i teie tumu parau no te taurearea tane te parau, e tano atoa tera mau faaueraa tumu no te taurearea vahine.

^ par. 7 Ua tauihia te i‘oa.