Ua riro noa iho â o Satani e te mau demoni ei mau varua ino mau e te atâta. I tahito ra, ua haapohe o Satani i te pue animara e tae noa ˈtu i te mau tavini a te taata taiva ore ra o Ioba. I muri iho, ua haapohe oia i na tamarii hoê ahuru a Ioba ma te faatupu “i te mataˈi uˈana” no te tairi i te fare tei reira ratou. I muri aˈe i te reira, ua tairi atura o Satani ia Ioba “i te maˈi mai te tapuaˈe avae e tae noa aˈera i te tupuai upoo.”—Ioba 1:7-19; 2:7.

I te tau o Iesu, ua haa te mau demoni ia ore te tahi mau taata e paraparau faahou e ia po to ratou mata. (Mataio 9:32, 33; 12:22) Ua haamauiui ratou i te hoê taata e ua turai aˈera ia ˈna ia otioti ia ˈna iho i te ofai. (Mareko 5:5) Ua turai atoa ratou i te hoê tamaiti iti ia tuô haere noa, ma te taora ia ˈna i raro i te repo “ia iriti roa oia.”—Luka 9:42.

I teie mahana, mea taparahi taata roa ˈtu â Satani e te mau demoni. Inaha, ua uˈana ta ratou ohipa iino mai te taime i hurihia ratou mai te raˈi mai. Te haapapu ra te mau parau faataa na te ao atoa nei e mea ino rahi ratou. Te tairi nei ratou i te taata i te maˈi.  Te haapeapea nei ratou ia vetahi i te po ma te faahuehue i to ratou taotoraa aore ra ma te faatupu i te mau moemoeâ riaria mau. Te rave atoa nei ratou i te mau hamani-ino-raa i te pae o te mau peu taotoraa tia ore i nia i te tahi atu. Te turai atoa nei ratou i te tahi atu ia rave i te mau ohipa maamaa, i te ohipa taparahi taata aore ra ia haapohe ia ratou iho.

Te faatia ra o Lintina, e ora ra i Suriname, e ua haapohe roa te hoê demoni, aore ra varua ino, 16 mero o to ˈna utuafare. Ua hamani ino te demoni ia ˈna i te pae tino e i te pae feruriraa 18 matahiti i te maoro. Ia au i ta ˈna i faaruru, ua nehenehe oia e parau e: “Mea au roa [na te mau demoni] ia haamauiui i te feia i raro aˈe i to ratou mana e pohe noa ˈtu ratou.”

E nehenehe râ ta Iehova e paruru i ta ˈna mau tavini i te mau aroraa a Satani.—Maseli 18:10.