Eaha to roto?

Tapura tumu parau

Aita te mau varua i ora a‘enei e i pohe i te fenua nei

Aita te mau varua i ora a‘enei e i pohe i te fenua nei

Te vai mau ra te mau varua! I roto i te ao varua, te vai ra te mau varua maitai e te mau varua ino. E mau taata anei ratou tei ora a‘enei e tei pohe i nia i te fenua nei?

Eita, eita roa ’tu. Ia pohe te hoê taata, eita oia e haere i te ao varua, mai ta te rahiraa o te taata e tiaturi nei. Nafea hoi tatou e nehenehe ai e ite i te reira? No te mea te haapapu mai ra te Bibilia i te reira. E buka parau mau te Bibilia no ǒ mai i te Atua mau ra, o Iehova. Na Iehova i poiete i te taata. Ua ite maitai o ’na eaha te ohipa e tupu i nia ia ratou ia pohe ratou.—Salamo 83:18; Timoteo 2, 3:16.

No te repo mai o Adamu, e ho‘i â oia i te repo

Te parau ra te Bibilia e ua poiete te Atua i te taata matamua ra o Adamu ma te faaohipa “i te repo fenua.” (Genese 2:7) Ua tuu a‘era te Atua ia ’na i roto i te paradaiso, oia hoi i roto i te ô i Edene. Ahiri Adamu i auraro i te ture a Iehova, eita roa ’tu ïa oia e pohe. E ora noâ oia i nia i te fenua nei i teie mahana. Ua ofati râ Adamu i te ture a te Atua e ua na ô maira te Atua ia ’na: “E ho‘i noa ’tu oe i raro i te repo, no reira mai hoi oe; e repo hoi oe, e e ho‘i faahou atu â oe i te repo.”—Genese 3:19.

Eaha ïa te auraa? Teihea o Adamu hou Iehova i poiete ai ia ’na maoti te repo fenua? Aita roa ’tu hoi o Adamu. Aita atoa oia i te ra‘i ei varua fanau-ore-hia. Aita hoi oia i vai na. No reira, ia parau Iehova ia Adamu e “e ho‘i oia i raro i te repo,” te hinaaro ra ïa Oia e parau e e pohe o Adamu. Eita oia e haere i te ao varua. Ia pohe oia, e ere ïa o Adamu i te ora. Te pohe, o te ereraa ïa i te ora.

 Eaha râ no te tahi atu mau taata tei pohe? Ua ere-atoa-hia anei ratou i te ora? Te pahono ra te Bibilia:

  • “Te haere nei [te taata e te animara] i te vahi otahi; no te repo ana‘e ratou e te ho‘i ana‘e nei i te repo â.”—Koheleta 3:20.

  • “Aita râ a te feia i pohe ra e parau itea.”—Koheleta 9:5.

  • “To ratou aroha e to ratou riri, e to ratou feii, ua mou ana‘e ïa.”—Koheleta 9:6.

  • “Aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.”—Koheleta 9:10.

  • “Te ho‘i nei [te taata] i to ’na ra repo; mou roa ’tura ta ’na i opua i taua mahana ra.”—Salamo 146:4.

O te feia ora ana‘e te nehenehe e rave i teie mau ohipa

Mea fifi anei na outou ia farii i teie mau irava? Mai te peu e e, ia feruri na ïa outou i teie hi‘oraa: i roto e rave rahi utuafare, na te tane e imi i te moni no te aupuru i to ’na utuafare. Ia pohe  te tane, e fifi ïa te utuafare taatoa. I te tahi taime, eita ta ’na vahine e ta ’na mau tamarii e navai maitai i te moni no te hoo mai i te maa. Peneia‘e e hamani ino te mau enemi o te metua tane ia ratou. I teie nei, a ui na: ‘Mai te peu e te ora ra teie taata i roto i te ao varua, no te aha ïa aita oia e tamau ai i te aupuru i to ’na utuafare? No te aha aita oia e paruru ai i to ’na utuafare i te mau taata iino?’ No te mea mea tano te mau irava Bibilia: ua erehia taua taata ra i te ora e eita ’tura ta ’na e nehenehe e rave i te tahi noa ’‘e ohipa.—Salamo 115:17.

Eita te feia pohe e nehenehe e tauturu i te feia e poia ra aore ra e paruru i te mau taata e hamani-ino-hia ra

Te auraa anei ïa e eita roa ’tu te feia pohe e ora faahou mai? E ere roa ’tu. E faahiti tatou i te parau no nia i te tia-faahou-raa i muri iho. Papu maitai, aita te feia pohe e ite ra i te ohipa ta outou e rave ra. Aita ratou e nehenehe e ite, e faaroo aore ra e paraparau ia outou. Aita ïa e faufaa ia mǎta‘u ia ratou. Eita ratou e nehenehe e tauturu e e hamani ino ia outou.—Koheleta 9:4; Isaia 26:14.