E faaore roa Iehova i te mau mea iino atoa ta Satani i faatupu. Ua faaarii Iehova ia Iesu no te faatere i te fenua atoa nei. I raro aˈe i ta ˈna faatereraa, e faarirohia te fenua ei paradaiso.—Daniela 7:13, 14; Luka 23:43.

Teie ta Iehova i fafau:

• E PUE TE MAA: “Ei reira e hotu rahi mai ai te fenua; e na te Atua, na to tatou iho Atua, e haamaitai mai ia tatou nei.” “E riro hoi e maa sitona tei te fenua i nia i te tupuai o te mau mouˈa ra, e tei tupu ra, e ahehe ïa mai te mau raau e tupu i Lebanona ra; e ruperupe to te oire ra mai te raau o te fenua nei.”—Salamo 67:6; 72:16.

• EITA E TAMAˈI FAAHOU: “A haere mai na, a hiˈo i ta Iehova i rave! te pau ta ˈna i rave i te fenua nei! Ua faaore oia i te tamaˈi e tae roa aˈenei i te hopea fenua! ua ofati oia i te fana, e ua tapǔpǔ i te mahae; e ua tahuhia te mau pereoo tamaˈi ra i te auahi.”—Salamo 46:8, 9.

•  EITA E TAATA IINO: “E riro hoi te feia hamani ino ra i te tâpû-ê-hia . . . No parahirahi aˈe te paieti ore, e aita ra; oia â ïa, e hiˈo â oe i to ˈna vahi, e aita nei.”—Salamo 37:9, 10.

• EITA E MAˈI, E OTO E E POHE: “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra: e pǔpû mai hoi te pape na te medebara, e te pape tahe i te fenua mǎrô ra.”—Isaia 35:5, 6.

  “Ei pihai iho te Atua ia ratou. E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:3, 4.

Taa ê atu ia Satani e te mau demoni, e ore roa ˈtu Iehova e haavare. E tupu iho â ta ˈna mau parau fafau atoa. (Luka 1:36, 37) Mea here na Iehova ia outou e te hinaaro nei oia ia ora outou i roto i te paradaiso ta ˈna e faatupu. No reira, a ani i te mau Ite no Iehova ia haapii atu hau atu â no nia i te parau mau faahiahia roa e itehia i roto i te Parau a te Atua. Ia faaohipa outou i te parau mau i roto i to outou oraraa, e faatiamâ te reira ia outou i te marei o te haavare, o te mau peu tahutahu e o te ite ore. I muri aˈe, e faatiamâ-roa-hia outou i te hara e te pohe. Mai ta Iesu i parau: “E ite outou i te parau mau e na te parau mau e faatiamâ ia outou.”—Ioane 8:32.