Mea maitai te mau varua atoa ta Iehova i poiete. Ua riro râ te hoê melahi ei varua ino. O Satani ïa te Diabolo taua melahi ra. Ua hinaaro o Satani ia haamori te mau taata ia ˈna, eiaha râ ia Iehova. Teie hoi te ohipa tei tupu.

I roto i te ô i Edene, mea rahi te mau tumu raau e horoa na i te hotu maitai ia amu. Ua parau maira o Iehova ia Adamu e ta ˈna vahine o Eva, e nehenehe raua e amu i te hotu o taua mau tumu raau atoa ra. Te vai ra râ te hoê tumu raau ta te Atua i opani ia amu i te hotu. Ua na ô atura oia e ia amu raua i to taua hotu ra, e pohe iho â raua.—Genese 2:9, 16, 17.

I te hoê mahana, ua paraparau te hoê ophi ia Eva. O Eva anaˈe ïa i taua taime ra. Papu maitai iho â ïa e, e ere te ophi tera e paraparau ra. Ua ohipa râ te Diabolo o Satani ia manaˈohia o te ophi tera e paraparau ra. Ua na ô maira o Satani ia Eva e ia amu oia i te hotu opanihia, e noaa ïa ia ˈna te paari mai to te Atua ra. Ua na ô atoa oia e e ore roa ˈtu Eva e pohe. Mea haavare hoi teie mau parau. Noa ˈtu râ, ua tiaturi o Eva ia Satani e ua amu oia i taua hotu ra. I muri aˈe, ua horoa oia i taua hotu ra ia Adamu e ua amu atoa maira oia.—Genese 3:1-6.

Maoti teie aamu mau, te ite ra tatou e mea orure hau mau e e mea haavare o Satani. Ua parau mai oia ia Eva e ia ore oia e auraro i te Atua, e ore oia e pohe. E parau haavare hoi te reira. Inaha, ua pohe mau o ˈna, oia atoa o Adamu. Aita o Satani i pohe, e pohe râ oia no te mea ua hara oia.  A tiai noa ˈtu ai, te ora noâ nei oia e te tamau nei oia i te haafifi i te huitaata. Te haavare noa nei â oia e te hinaaro nei oia ia ofati te taata i te ture a te Atua.—Ioane 8:44.

I muri aˈe, ua ino te tahi atu mau melahi. Ua ite ratou i te mau vahine nehenehe mau i nia i te fenua nei e ua hinaaro ratou e taoto i taua mau vahine ra. Ua haere maira ratou i nia i te fenua nei e ua rave aˈera i te tino tane. E inaha, ua rave aˈera i taua mau vahine ra ei vahine na ratou. E ere roa ˈtu hoi tera ta te Atua i opua.—Genese 6:1, 2; Iuda 6.

Ua haafifi atoa te reira i te huitaata. Ua fanau maira te mau vahine a taua mau melahi nei i te tamarii, e ere râ i te mau tamarii mai tei matauhia. Ua paari maira ratou e ua riro mai ei mau aito rahi ino mau. I te mea e ua î roa te fenua i te ino, ua opua ihora Iehova i te haamou roa i te mau taata iino na roto i te hoê diluvi rahi. O te taata parau-tia o Noa e to ˈna utuafare tei ora mai i taua diluvi ra.—Genese 6:4, 11; 7:23.

Ua hoˈi aˈera râ te mau melahi iino i te ao varua. Aita ratou i pohe. Tera râ, ua faautuahia ratou. Aita ratou i farii-faahou-hia i roto i to te Atua utuafare o te mau melahi parau-tia. E aita aˈera o Iehova i faatia faahou ia ratou ia rave i te tino taata. E ei hopearaa, e pohe ratou ia tupu te haavaraa rahi.—Petero 2, 2:4; Iuda 6.

I 1914, ua tupu te hoê tamaˈi i te raˈi. Te faataa ra te buka Bibilia o te Apokalupo i te ohipa i tupu: “Tupu ihora te tamaˈi i nia i te raˈi: aro atura Mikaela [o Iesu Mesia tei faatiahia mai] e ta ˈna mau melahi [maitai] i te teni [Satani], aro atoa maira te teni e ta ˈna mau melahi [iino], aita râ ratou i upootia. Aita ˈtura e parahiraa faahou to ratou i te raˈi. Hurihia ihora i raro te teni rahi, te ophi i tahito ra tei piihia te Diabolo e Satani, o te haavare nei i to te ao atoa nei, ua hurihia mai ïa i raro i te fenua, e ua hurihia mai ta ˈna mau melahi [iino] i raro na muri ia ˈna.”

Eaha ïa te faahopearaa? Te na ô ra te irava: “No reira, a oaoa outou e ora ra i nia i te raˈi!” E nehenehe mau â te mau melahi maitai e oaoa no te mea aita faahou o Satani e ta ˈna mau melahi aore ra varua iino i te raˈi. Teie râ, eaha ïa te tupu no te mau taata i nia i te fenua? Te parau ra te Bibilia: “Ua ati râ to te fenua e to te miti, no te mea ua haapouhia te Diabolo ia outou ma te riri rahi, ua ite hoi o ˈna e e taime poto to ˈna e toe ra.”—Apokalupo 12:7-9, 12.

Oia mau, te haavare nei o Satani e to ˈna mau hoa ino i te taata i nia i te fenua. No reira te taata e ite ai i te ati. E parauhia taua mau melahi iino ra, e mau demoni. E mau enemi ratou no te Atua. Mea ino ratou pauroa.