KU ŴACHINYAMATA
12: Kuŵa na Vilato
IVYO MUKWENERA KUMANYA
Vilato ni maloto waka yayi, ni vinthu ivyo vingachitika nadi. Munthu wakwenera kunozgekera, kusintha vinthu vinyake kweniso kuŵikapo mtima kuti wafiske vilato vyake.
Vilato vinyake vikuŵa vichokovichoko ivyo vingatora mazuŵa panji masabata ghachoko waka kuti uvifiske. Ndipo vinyake vingatora myezi, chaka, panji kujumphirapo. Kuti munthu wafiske vilato vikuruvikuru, wakwenera kufiska dankha vilato vichokovichoko.
CHIFUKWA WULI NTCHAKUZIRWA?
Para wamunthu ukufiska vilato vyako ukuŵa wakukondwa, ukuŵa paubwezi na ŵanyako kweniso ukujikayikira yayi.
Kujikayikira yayi: Para mwajiŵikira vilato vichokovichoko na kufiska, mujikayikirenge yayi kuti mungatondeka kufiska vilato vinyake vikuruvikuru. Kweniso mukuŵa na chikanga para mukulimbana na masuzgo gha zuŵa na zuŵa nga nkhuchichizgika na ŵanyinu kuchita viheni.
Kuŵa paubwezi: Ŵanthu ŵakutemwa kuŵa paubwezi na awo ŵali na vilato ndipo ŵakuŵikapo mtima kuti ŵavifiske. Nakuti kanandi ubwezi ukukhora para ukugwira na munthu uyo vilato vyake vikuyana na vyako.
Kukondwa: Para wamunthu wajiŵikira vilato na kuvifiska ukuŵa wakukondwa.
Christopher wakati: “Nkhutemwa kujiŵikira vilato. Ntheura nkhuŵikapo mtima kuti nivifiske. Ndipo para wafiska chilato chako ukujipulika makora, ndipo ungati ‘Aa, nafiska nadi! Ivyo nakhumbanga vyafiskika.’”
FUNDO YA MU BAIBOLO: “Uyo wakulaŵilira mphepo waseŵenge yayi mbuto, ndipo uyo wakulaŵiska pa mabingu wavunenge kanthu chara.”—Mupharazgi 11:4.
IVYO MUNGACHITA
Yezgani masachizgo agha kuti mufiske vilato vinu.
Sankhani. Lembani vilato vinu na kuviŵika mu ndondomeko, manyani icho mwambirenge kufiska pakwamba, pachiŵiri, pachitatu, kweniso na vinyake.
Nozgekerani. Pa chilato chilichose, chitani vinthu ivi:
-
Lembani deti ilo mukukhumba kuti mufiskire chilato chinu.
-
Lembani ivyo muchitenge kuti mufiske.
-
Lembani masuzgo agho mukuwona kuti mungakumana nagho na umo mungaghatondera.
Yambanipo. Lekani kulindilira kuti vyose vyende dankha makora ndipo mwambepo. Jifumbani kuti, ‘Kasi ntchivichi chakwamba icho ningachita kuti nifiske chilato chane?’ Para mwachimanya, chitani. Wonani umo mwachitira pa chigaŵa chilichose.
FUNDO YA MU BAIBOLO: “Maghanoghano gha munthu wachitatata ghakovwira kuti vinthu vyende makora.”—Zintharika 21:5.
Panji Mungatemwa Kuŵerengaso Nkhani Izi
IVYO ŴANYINU ŴAKUYOWOYA
Cameron Wakakondwa Chomene.
Kasi ukukhumba kuti ukondwenge? Tegherezga ivyo vikachitikira Cameron apo wakaluta ku malo ghachilendo ndipo wakakondwa chomene.
IVYO ŴACHINYAMATA ŴAKUFUMBA
Kasi Ningasanga Wuli Munthu Wankharo Yiwemi Uyo Ningatolerako?
Munthu uyo wasankha kuti utolereko nkharo yake yiwemi wangakovwira kugega masuzgo, kufiska ivyo ukukhumba, kweniso kuti vinthu vikwendere makora. Kweni kasi ni njani uyo ukwenera kutolerako?
