KU ŴAKUTORANA
1: Ŵikanipo Mtima
IVYO MUKWENERA KUMANYA
Mfumu na muwoli ŵakwenera kuwona nthengwa yawo kuti njaumoyo wose. Ichi chingaŵawovwira kuti nthengwa yawo yilutilire kuŵa yakukhora. Ndipo waliyose wakumanya kuti munyake wamunthengwa walutilirenge kuŵa wakugomezgeka visuzge viti wuli.
Ŵanji ŵakukhumba kumazga nthengwa yawo, kweni ŵakulutilira kukhala munthengwa chifukwa cha kuchichizgika na ŵanyawo. Kweni chitemwa na ntchindi vingawovwira kuti ŵakutorana ŵaŵikepo mtima kuti nthengwa yawo yileke kumara.
FUNDO YA MU BAIBOLO: “Mfumu wangamulekanga yayi muwoli wake.”—1 Ŵakorinte 7:11.
Micah wakati: “Para wamunthu waŵikapo mtima kuti nthengwa yileke kumara ukukhuŵara luŵiro yayi, ndipo chikuŵa chipusu kugowokera panji kuphepiska. M’malo mwakuchimbilira kumazga nthengwa yinu sangani nthowa yakumazgira masuzgo agho mukusangana nagho.”
CHIFUKWA WULI NTCHAKUZIRWA KUTI NTHENGWA YILUTILIRE?
Kanandi usange ŵakutorana ŵandaŵikepo mtima kuti nthengwa yawo yileke kumara chikuŵa chipusu kuyowoya kuti, ‘Tili ŵakwenelerana yayi,’ ndipo ŵakusanga nthowa za umo ŵangamazgira nthengwa yawo.
Jean wakati: “Ŵanthu ŵanyake ŵakunjira munthengwa uku ŵakumanya kuti para vyasuzga ŵamufumamo. Para munthu wakunjira munthengwa na maghanoghano agha, wamanyirethu kuti nthengwa yingakhora yayi.”
IVYO MUNGACHITA
JISANDANI
Usange mwambana . . .
-
Kasi mukudandawura kuti mukatoleranachi na munyinu wamunthengwa?
-
Kasi pa nyengo iyi mukughanaghana za munthu munyake uyo ni mfumu panji muwoli winu yayi?
-
Kasi mukuyowoya mazgu nga ghakuti, “nikulekenge” panji “nisangenge munyake uyo tingakolerana”?
Usange mwazgora kuti enya pa fumbo limoza panji ghanandi, ipo mukwenera kukhozga nthengwa yinu.
DUMBISKANANI NA MUNYINU WAMUNTHENGWA
-
Kasi chitemwa chithu chamba kuchepa? Usange enya, chifukwa wuli?
-
Kasi tingachita wuli kuti tikhozge nthengwa yithu?
IVYO VINGAMOVWIRANI
-
Mulemberani munyinu wamunthengwa kuti mukumutemwa
-
Ŵikani vithuzi vya munyinu wamunthengwa pa malo agho mukugwilira ntchito kulongora kuti mukumutemwa
-
Zuŵa lililose para muli ku ntchito panji para mwafumapo muyimbirani foni munyinu wamunthengwa
FUNDO YA MU BAIBOLO: “Icho Chiuta wagumanya pamoza munthu waleke kupatura.”—Mateyu 19:6.
