Swivutiso Swa Vahlayi

Xana Xikwembu Xi Teka Vana Leswaku Va Ya Va Tintsumi eTilweni?

Loko n’wana a fa, vanghana va ndyangu lowu feriweke va nga ha ringeta ku wu chavelela hi ku vula leswi: “Xikwembu a xi lava ntsumi yin’wana etilweni.” Xana sweswo swa twisiseka eka wena?

Loko a ku ri ntiyiso leswaku Xikwembu xi dlaya vana hileswi xi lavaka tintsumi leti engetelekeke etilweni, sweswo a swi ta vula leswaku a xi khathali naswona xi ni nsele. Bibele yi vula leswi hambaneke ni sweswo. (Yobo 34:10) Tatana loyi a nga ni ntwela-vusiwana a nge tshuki a tekela vatswari van’wana n’wana wa vona hikwalaho ka leswi a lavaka ku ndlandlamuxa ndyangu wakwe. Kambe ku hava mutswari wa nyama loyi a nga ni ntwela-vusiwana ku tlula Yehovha, loyi mfanelo yakwe leyikulu ku nga rirhandzu. (1 Yohane 4:8) Leswi a nga ni rirhandzu lerikulu a nge pfuki a endle nsele wo tano.

Tivutise, ‘Xana Xikwembu xi lava tintsumi leti engetelekeke etilweni?’ Bibele yi vula leswaku mintirho hinkwayo ya Xikwembu i yinene naswona yi hetisekile. (Deteronoma 32:4) Ntirho wa xona wo va xi tivumbela tintsumi ta timiliyoni xi wu endle wu hetiseka naswona a ti nga kayiveli. (Daniyele 7:10) Xana swi nga endleka leswaku Xikwembu a xi nga yi hlayanga kahle nhlayo ya tintsumi leti a xi ti lava? Doo! Entiyisweni, Xikwembu xa Matimba Hinkwawo a xi nga ta xi endla xihoxo xo tano. I ntiyiso leswaku Yehovha u hlawule vanhu vo karhi laha misaveni leswaku va ya va swivumbiwa swa moya etilweni leswaku va ta fuma na Yesu Kreste eMfun’weni wakwe, kambe a va nga ri vana loko va fa.—Nhlavutelo 5:9, 10.

Xivangelo xin’wana lexi endleke leswaku Xikwembu xi nga teki vana laha misaveni leswaku va ya va tintsumi etilweni hileswaku a swi nga ta fambisana ni xikongomelo xa xona xo sungula hi vana. Entangeni wa Edeni, Xikwembu xi byele Adamu na Evha xi ku: “Tswalanani mi andza, mi tata misava, mi yi fuma.” (Genesa 1:28) Vana i nyiko leyi humaka eka Xikwembu naswona xi endle leswaku vanhu va kota ku va ni vana leswaku xikongomelo xa xona xo sungula xa leswaku misava yi tatiwa hi vanhu vo lulama xi hetiseka. A ku nga ri xikongomelo xa xona leswaku vana va fa ni leswaku va hundzuka swivumbiwa swa moya. Bibele yi swi veka erivaleni leswaku vana i “ndzhaka leyi humaka eka Yehovha.” (Pisalema 127:3) Xana Yehovha, Xikwembu xa rirhandzu, a nga tlhela a teka nyiko leyi a yi nyikeke vatswari? Nikatsongo!

Ku fa ka n’wana hi xitshuketa swi endla leswaku vatswari va va ni gome lerikulu ni ku twa ku vava. Kutani hi wihi ntshembo lowu vatswari lava feriweke hi vana va nga na wona? Bibele yi tshembisa leswaku Xikwembu xi ta pfuxa vanhu va timiliyoni eparadeyisini laha misaveni. Ehleketa loko vana lava pfuxiweke lava hanyeke kahle emirini va tlhela va hlanganisiwa ni vatswari va vona. (Yohane 5:28, 29) I ku rhandza ka Xikwembu leswaku vana va kula, va tiphina hi vutomi ni ku dyondza ha xona ni xikongomelo xa xona hi misava. Xisweswo, vana lava feke a hi tintsumi etilweni kambe va rindzele ku pfuxeriwa eparadeyisini laha misaveni. Hi nkarhi wolowo, ehansi ka nkhathalelo wa rirhandzu wa Muvumbi wa hina Yehovha Xikwembu, lavatsongo ni lavakulu va ta tiphina hi ku n’wi gandzela hilaha ku nga heriki.