Nghena endzeni

Hundzela eka leswi nga endzeni

“Ndza Ku Tiva Swinene Ku Vava Loku Va Ku Twaka”

“Ndza Ku Tiva Swinene Ku Vava Loku Va Ku Twaka”

 Tshinela Eka Xikwembu

“Ndza Ku Tiva Swinene Ku Vava Loku Va Ku Twaka”

Eksoda 3:1-10

“WA KWETSIMA, wa kwetsima, wa kwetsima Yehovha.” (Esaya 6:3) Marito wolawo lama huhuteriweke ma kombisa leswaku Yehovha Xikwembu u basile a tlhela a tenga hi ndlela leyi nga pimanisiwiki na nchumu. U nga ha tivutisa: ‘Xana ku kwetsima kakwe ku n’wi endla a nga khathali naswona a nga tshineleleki? Xana Xikwembu xo tano lexi kwetsimaka xa khathala ha mina hakunene—munhu loyi a nga mudyohi tlhelo loyi a nga hetisekangiki?’ A hi kambisiseni marito lama chavelelaka lawa Xikwembu xi ma byeleke Muxe, hilaha ma tsariweke hakona eka Eksoda 3:1-10.

Siku rin‘wana loko Muxe a ri karhi a risa tinyimpfu, u vone nchumu lowu a wu nga tolovelekanga nikatsongo—xihlahla xa mitwa a xi pfurha kambe “a xi nga tshwi.” (Ndzimana 2) Leswi a a lava ku tiva leswaku ha yini sweswo swi endleka, u tshinerile leswaku a ta xi vona kahle. Yehovha u tirhise ntsumi ku vulavula na Muxe a ri exikarhi ka ndzilo a ku: “U nga tshineli laha. Hluvula maphaxani ya wena, hikuva ndhawu leyi u yimeke eka yona i misava yo kwetsima.” (Ndzimana 5) Wa nga ehleketa—leswi xihlahla xa mitwa lexi pfurhaka a xi kombisa leswaku Xikwembu a xi ri kwalaho hi ndlela yo fanekisela, misava hi yoxe yi ve leyi kwetsimaka!

Xikwembu lexi kwetsimaka a xi ri ni xivangelo xo vulavula na Muxe. Xi te: “Entiyisweni ndzi vone ku xaniseka ka vanhu va mina lava nga aEgipta, naswona ndzi twe xirilo xa vona hikwalaho ka lava va va sindzisaka ku tirha; hikuva ndza ku tiva swinene ku vava loku va ku twaka.” (Ndzimana 7) Xikwembu a xi yi vona ndlela leyi vanhu va xona a va xaniseka ha yona; naswona xi va twile loko va kombela mpfuno eka xona. Kutani a swi fana ni loko xi twa ku vava loku a va ku twa. Xiya leswaku Xikwembu xi te: “Ndza ku tiva swinene ku vava loku va ku twaka.” Loko buku yin’wana yi vulavula hi marito lama nge, “Ndza ku tiva swinene,” yi ri: “Xiga lexi xi vula leswaku Xikwembu a xi twa ku vava loku Vaisrayele a va ku twa.” Marito lawa Yehovha a ma byeleke Muxe ma kombisa leswaku wa khathala swinene.

Xana Xikwembu a xi ta endla yini? A xi lo va languta ntsena kumbe ku twa swirilo swa vona ivi swi helela kwalaho. Leswi swi xi susumetele ku teka goza. Xi tibyele leswaku xi ta kutsula vanhu va xona xi va humesa aEgipta kutani xi va yisa “etikweni leri khulukaka ntswamba ni vulombe.” (Ndzimana 8) Leswaku xi endla tano, xi lerise Muxe xi ku: “Humesa vanhu va mina. . . aEgipta.” (Ndzimana 10) Muxe u yingise leswi Xikwembu xi n’wi byeleke swona kutani a rhangela Vaisrayele loko va huma aEgipta hi 1513 B.C.E.

Yehovha a nga hundzukanga. Vagandzeri vakwe namuntlha va nga tiyiseka leswaku wa swi vona swiphiqo swa vona naswona wa va twa loko va khongela eka yena va lava mpfuno. U ku twisisa kahle ku vava loku va ku twaka. Kambe Yehovha a ngo ma twela vusiwana ntsena malandza yakwe lama tinyiketeleke. Xikwembu xa rirhandzu xi susumeteleka ku ma pfuna “hikuva xa [ma] khathalela.”—1 Petro 5:7.

Ntwela-vusiwana wa Xikwembu wu hi nyika xivangelo xo va ni ntshembo. Hi mpfuno wa xona, hina vanhu lava nga hetisekangiki hi nga ringeta ku hanya hi milawu ya xona yo lulama ni leyi baseke kutani hi va lava amukelekaka eka xona. (1 Petro 1:15, 16) Wansati un’wana loyi a nga Mukreste loyi a a ri ni ntshikilelo wa miehleketo naswona a a hele matimba, u chaveleriwe hi rungula leri vulavulaka hi Muxe loko a ri exihlahleni xa mitwa. U ri: “Loko Yehovha a kota ku endla leswaku misava yi kwetsima, kumbexana a nga endla leswaku na mina ndzi va munhu loyi a kwetsimaka. Mhaka leyi yi ndzi pfune swinene.”

Xana u lava ku dyondza swo tala hi Yehovha, Xikwembu lexi kwetsimaka? U nga swi kota ku va ni vuxaka lebyikulu na yena, hikuva “u ku tiva kahle ku vumbeka ka hina, wa tsundzuka leswaku hi ntshuri.”—Pisalema 103:14.