Nghena endzeni

Hundzela eka leswi nga endzeni

Vanhu Lava Hlaseriweke Hi Xidzedze eMyanmar Va Kume Mpfuno

Vanhu Lava Hlaseriweke Hi Xidzedze eMyanmar Va Kume Mpfuno

 Vanhu Lava Hlaseriweke Hi Xidzedze eMyanmar Va Kume Mpfuno

HI May 2, 2008, Xidzedze lexi vuriwaka Nargis xi hlasele tiko ra Myanmar naswona swi nga si ya kwihi se a ku vulavuriwa ha xona emahungwini emisaveni hinkwayo. * Ku vikiwe leswaku vanhu va kwalomu ka 140 000 va file kumbe va nyamalarile endzhaku ka loko xidzedze xa matimba xi pfindluse mati ya lwandle kutani ma khubumeta ndhawu leyi nambu wa Irrawaddy wu hlanganaka kona ni lwandle.

Lexi tsakisaka, ku hava Mbhoni ni yin’we ya Yehovha leyi tshamaka kwalaho leyi vavisekeke. Ti ponile hileswi hi nkarhi wa xidzedze ti balekeleke eTiholweni ta Mfumo leti akiweke kahle. Endhawini yin’wana, Timbhoni ta 20 ni vaaki van’wana va 80 va tshame elwangwini ra Holo ya Mfumo ku ringana tiawara ta kaye hileswi mati ya mpfula a ma tlakuke hi timitara ta kwalomu ka ntlhanu. Hinkwavo ka vona va ponile. Lexi vavisaka, vanhu va 300 emugangeni wolowo va dyiwe hi mati. Emigangeni yo tala, miako leyi nga khukhuriwangiki hi mati a ku ri Tiholo ta Mfumo ntsena.

Endzhaku ka masiku mambirhi xidzedze xi hundzile, rhavi ra Timbhoni ta Yehovha leri nga edorobeni ra Yangon ri rhumele ntlawa wa vaphalari evandlheni leri nga emugangeni wa Bothingone, laha nambu wu hlanganaka kona ni lwandle. Ntlawa lowu wu hetelele wu fikile eBothingone ni nhundzu leyikulu ya rhayisi, makaroni, mati ni makhandlhela, endzhaku ko hundza hi le tindhawini leti hlaseriweke swinene hi xidzedze ni laha a ku ri ni mintsumbu ya vanhu leyi a yi sungula ku bola naswona wu ri karhi wu ringeta ku papalata vanhu lava nga wu tekelaka swilo swa wona. A ku ri ntlawa wo sungula wa vaphalari lowu fikeke endhawini yoleyo. Endzhaku ka loko ntlawa wa vaphalari wu nyike Timbhoni ta kwalaho swilo leswi a ti swi lava, wu nyikele tinkulumo ta Bibele leswaku wu ti khutaza naswona wu ti siyele Tibibele ni tibuku tin’wana leti sekeriweke eBibeleni tanihi leswi swilo swa tona hinkwaswo a swi khukhuriwe hi mati.

 Langutelo ra Timbhoni leti lahlekeriweke hi swilo swa tona hi nkarhi wa xidzedze a ri hlamarisa hakunene. Mbhoni yin’wana ya le vandlheni leri nga endhawini ya Irrawaddy yi te: “Hinkwaswo leswi a hi ri na swona swi khukhuriwile. Tiyindlu ta hina hinkwato ti onhakile. Swilo leswi a hi swi byarile swi khukhuriwile. Mati hinkwawo ma thyakisiwile hikwalaho ka ndhambi. Hambiswiritano, vamakwerhu a va kharhatekanga ku fana ni vanhu van’wana. Hikuva va tshembela eka Yehovha swin’we ni nhlengeletano yakwe. Hi ta landzela nkongomiso wun’wana ni wun’wana lowu hi nga ta wu kuma, ku nga khathariseki leswaku hi lerisiwa ku tshama emugangeni lowu kumbe ku rhurhela kun’wana.”

Ntlawa wa Timbhoni ta 30 leti na tona ti lahlekeriweke hi swilo swa tona hinkwaswo, ti yimbelele tinsimu ta Mfumo hi ntsako loko ti teka riendzo leri tekeke tiawara ta khume ku ya laha ntlawa wa vaphalari a wu ti vekele swakudya, swiambalo ni ku tilunghiselela ndhawu yo tshama. Loko ti nga si fika laha a ti ya kona, ti twe leswaku edorobeni rin’wana leri nga ekusuhi a ku khomiwe nhlengeletano ya xifundzha ya Timbhoni ta Yehovha. Ti hlawule ku rhanga ti ya enhlengeletanweni yoleyo leswaku ti kuma xikhutazo lexi humaka eBibeleni ni ku tiphina hi xinakulobye ni Timbhoni-kulobye.

Endhawini hinkwayo leyi hlaseriweke hi xidzedze, tiyindlu ta 35 ta Timbhoni ti onhakile kasi ta 125 ni Tiholo ta Mfumo ta nhungu ti onhake katsongo. Lexi tsakisaka, miako ya rhavi ra Timbhoni ta Yehovha a yi onhakanga ngopfu.

Eku sunguleni, xidzedze xi endle leswaku vanhu va nga swi koti ku ya kumbe ku huma erhavini hikwalaho ka leswi mirhi leyikulu a yi wile kutani yi pfala magondzo lama nga ekusuhi na rona. Endzhakunyana ka tiawara ti nga ri tingani loko xidzedze xi yimile, swirho leswi tlulaka 30 leswi tirhaka erhavini swi hlanganyele eku suseni ka mirhi yoleyo hi mavoko. Loko swi ri karhi swi tirha, vanhu a va yime va swi langutile hi ku hlamala. Swi nga si ya kwihi, ku fike ntlawa wa Timbhoni ta xisati leti a ti khome swo tima torha ni mihandzu leswaku ti ta nyika vatirhi ni vaakelani lava a va nga swi tshembi leswi a va swi vona. Loko mutsari un’wana wa phepha-hungu a vone leswi a swi humelela, u vutise a ku, “I vamani vanhu lava tirhaka hi nkhinkhi swonghasi?” Endzhaku ko byeriwa leswaku i Timbhoni ta Yehovha, u te: “Ndzi navela onge vanhu vo tala va nga va ni moya lowu fanaka ni wa Timbhoni ta Yehovha!”

Timbhoni ti hatle ti simeka tikomiti timbirhi ta xilamulela-mhangu etindhawini to hambana-hambana etikweni leswaku ti yisa swilo leswi lavekaka eka Vakreste-kulobye lava tshamaka etindhawini leti weriweke hi mhangu. Vatirhi va ku tirhandzela va madzana va tirhe swin’we ni mintlawa leyi phalalaka vanhu. Ku nga si hela masiku ma nga ri mangani, Timbhoni leti a ti nga ha ri na tiyindlu se a ti akeriwe tiyindlu letintshwa. Loko ntlawa wun’wana wa vaphalari wu fika leswaku wu ta akela Mbhoni yin’wana yindlu leyintshwa, muakelani wa yona u sale a hlamarile. Muakelani un’wana u te: “Mbhoni leyi ya xisati yi tlhele yi akeriwa yindlu ya yona hi swirho swa kereke ya yona. Ku hava ni un’we wa vanghana va mina lava ndzi nghenaka na vona kereke ya Vubudha loyi a teke ku ta ndzi pfuna. A ndzi fanele ndzi pfumerile ku va Mbhoni hi nkarhi lowu yi teke yi ta ndzi chumayela!”

Loko vatirhi vo aka ni va komiti yo phalala va kambele yindlu yin’wana eThanlyn leyi a ku sele katsongo leswaku yi mbundzumuka, va hlamale ngopfu loko ndyangu lowu nga Timbhoni wu va byela leswi: “A ku onhakanga nchumu. Yindlu ya hina ya ha ri kahle. A ku na xiphiqo—hi nga tshama eka yona! Timbhoni tin’wana ti pfumala ni ndhawu yo veka nhloko. Fambani mi ya pfuna tona!”

Endhawini yin’wana ya le Yangon, vanhu van’wana va ringete ku ya eka yin’wana ya tikereke leswaku va ya tumbela eka yona hi nkarhi wa xidzedze. Hambiswiritano, nyangwa ya kereke yoleyo a yi lotleriwile naswona a ku ri hava ni munhu ni un’we loyi a a ta kota ku nghena. Vanhu a va hlundzuke swinene lerova va lava ni ku tshova nyangwa ya kereke. Ku hambana ni sweswo, Timbhoni ta Yehovha ti pfune vanhu vo tala leswaku va kuma ndhawu yo tumbela eka yona eTiholweni ta Mfumo hi nkarhi wa xidzedze. Hi xikombiso, eHolweni ya Mfumo ya le dorobeni ra Dala, vatekani vambirhi lava nga Timbhoni va amukele vaakelani va vona va 20 lava balekeleke kwalaho leswaku va kuma vutumbelo. Nimixo, vanhu volavo a va nga ha ri na tona tiyindlu leti a va fanele va tlhelela eka tona, naswona xivambalana a xi buba. Nuna wa kona u kume munhu loyi a a xavisa rhayisi hiloko a xava leyi a yi ta ringana vanhu hinkwavo.

Swirho swin’wana swa ndyangu wun’wana wa le Yangon i Timbhoni ta Yehovha kasi leswin’wana swi  nghena tikereke tin’wana. Endzhaku ka xidzedze, ndyangu hinkwawo wu ye eminhlanganweni eHolweni ya Mfumo. Ha yini? Xirho xin’wana xa ndyangu wolowo xi ri: “Swirho swa kereke ya hina swi vule leswaku swi ta ta swi ta hi endzela endzhaku ka xidzedze kambe a swi tanga. I Timbhoni ntsena leti teke. Mi hi nyike rhayisi ni mati. A mi fani ni swirho swa tikereke letin’wana!” Swirho swa ndyangu leswi nga riki Timbhoni swi xi tsakele ngopfu xihloko xa Xihondzo xo Rindza lexi a xi ri ni nhloko-mhaka leyi nge “Yehovha Wa Xi Yingisa Xirilo Xa Hina Loko Hi Kombela Mpfuno” naswona swi nyikele ni tinhlamulo to tala.

Wansati un’wana loyi a a hlaya Bibele ni Timbhoni u ye eminhlanganweni ya vandlha endzhaku ka vhiki ra xidzedze. Loko minhlangano yi ya emahlweni, ku hlayiwe papila leri humaka erhavini, ri hlamusela leswi endliweke ku pfuna vanhu lava poneke xidzedze ni ku vula mintokoto ya vona. Loko papila ri ri karhi ri hlayiwa, wansati yoloye u sungule ku rila. A a hlamale ngopfu a tlhela a tsaka loko a twa leswaku Timbhoni hinkwato ti kumiwile naswona ti hlayisekile. Endzhaku ka sweswo, u nyikiwe swilo swin’wana leswi a a swi lava naswona ku dzimiwe tende etlhelo ka yindlu yakwe. U vule leswaku Timbhoni ti n’wi khathalele swinene.

Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Nakambe mudyondzisiwa Yakobo u kandziyise leswaku ripfumelo ra xiviri ri fambisana ni mintirho leyinene. (Yakobo 2:14-17) Timbhoni ta Yehovha ti ma tekela enhlokweni marito wolawo naswona ti hisekela ku kombisa rirhandzu rolero hi ku pfuna ni ku seketela lava lavaka mpfuno.

[Nhlamuselo ya le hansi]

^ par. 2 Buku yin’wana yi ri: “Ematikweni lama nga ekusuhi ni Lwandle ra Atlantic ni ra Kharibiya, mimoya leyi hakanyingi yi vitaniwa swidzedze, kasi ematikweni ya le vupela-dyambu bya Lwandle ra Pacific ni ra Chayina yi vitaniwa moya wa thayifuni.”—Encyclopædia Britannica.

[Marito lama tshahiweke exihlokweni lama nga eka tluka 11]

Bibele yi vula leswaku ripfumelo ra xiviri ri fambisana ni mintirho leyinene