Nghena endzeni

Hundzela eka leswi nga endzeni

Hlayisa “Rirhandzu Leri A Wu Ri Na Rona Eku Sunguleni”

Hlayisa “Rirhandzu Leri A Wu Ri Na Rona Eku Sunguleni”

 Hlayisa “Rirhandzu Leri A Wu Ri Na Rona Eku Sunguleni”

“Tama u khoma swi tiya leswi u nga na swona.”—NHLAV. 3:11.

1, 2. U titwe njhani loko u sungula ku khorwiseka leswaku leswi a wu swi dyondza hi Yehovha a ku ri ntiyiso?

XANA wa ha tsundzuka ro sungula loko u twa hi xitshembiso xo hlamarisa lexi Yehovha a xi tshembisaka vanhu lava yingisaka? Loko u tshame u nghena kereke yo karhi, xana u titwe njhani loko u hlamuseriwa swikongomelo swa Xikwembu leswi nga eMatsalweni kumbe loko u hlamuseriwa tidyondzo leti a swi nga olovi ku ti twisisa? Kumbexana u swi xiyile leswaku a wu nga dyondzisiwanga ntiyiso malunghana ni Xikwembu. Kambe sweswi wa tsaka leswi se u tivaka ntiyiso! Loko u kurisiwe hi vatswari lava nga Vakreste, xana wa ha tsundzuka ndlela leyi u titweke ha yona loko u sungula ku khorwiseka leswaku leswi u swi dyondzaka hi Yehovha i ntiyiso, kutani u tikarhatela ku hanya ha swona?—Rhom. 12:2.

2 Vamakwerhu vo tala evandlheni va ta ku byela leswaku leswi Yehovha a va kokeke va titwe va tsakile naswona va ri ekusuhi na yena. (Yoh. 6:44) Ntsako wa vona wu va susumetele ku hlanganyela emintirhweni ya Vukreste. A va khapa-khapa ntsako lerova a va lava ku byela van’wana ndlela leyi a va titwa ha yona. Xana swi ve tano ni le ka wena?

3. Xiyimo a xi ri njhani evandlheni ra le Efesa loko Yesu a ri rhumelela rungula?

 3 Loko Yesu a vulavula ni Vakreste va le vandlheni ra le Efesa eka lembe-xidzana ro sungula, u vulavule na vona hi ‘rirhandzu leri a va ri na rona eku sunguleni.’ Vaefesa a va ri ni timfanelo to tala letinene, kambe a va nga ha n’wi rhandzi ngopfu Yehovha. Hikwalaho Yesu u va byele leswi: “Ndzi tiva swiendlo swa wena, ni ntirho ni ku tiyisela ka wena, ni leswaku a wu swi koti ku tiyiselela vanhu vo biha, naswona u ringa lava tivulaka vaapostola, kambe va nga ri vona, kutani u va kume va ri vahembi. Nakambe u kombisa ku tiyisela, u kondzelerile hi mhaka ya vito ra mina naswona a wu karhalanga. Nilokoswiritano, ndzi ni mhaka na wena, ya leswaku u lahle rirhandzu leri a wu ri na rona eku sunguleni.”—Nhlav. 2:2-4.

4. Ha yini rungula ra Yesu leri yaka eka Vaefesa ri ri ra nkoka namuntlha?

4 Ndzayo ya Yesu leyi yaka eka Vaefesa ni le mavandlheni man’wana lawa a vulavuleke ha wona ebukwini ya Nhlavutelo, a yi fanela hikuva yi fambisana kahle ni leswi xiyimo a xi ri xiswona ku ringana nkarhi wo karhi exikarhi ka Vakreste lava totiweke, ku sukela hi 1914 ku ya emahlweni. (Nhlav. 1:10) Ninamuntlha Vakreste van’wana va nga ha ‘lahla rirhandzu leri a va ri na rona eku sunguleni’ hi Yehovha ni hi ntiyiso. Hi ri na sweswo emianakanyweni, a hi kambisiseni ndlela leyi ku tsundzuka ni ku anakanyisisa hi mintokoto ya hina vini swi nga hi pfunaka ha yona leswaku hi tiyisa ndlela leyi a hi rhandza Xikwembu ni ntiyiso ha yona hi tlhela hi wu hisekela naswona hi tirhela Xikwembu hi ku hiseka.

I Yini Lexi Ku Khorwiseke Leswaku U Dyondze Ntiyiso?

5, 6. (a) I yini lexi Mukreste un’wana ni un’wana a faneleke a tikhorwisa ha xona? (b) I yini lexi ku khorwiseke leswaku Timbhoni ta Yehovha ti dyondzisa ntiyiso? (c) I yini lexi nga pfunaka munhu ku vuyetela rirhandzu leri a ri na rona eku sunguleni?

5 Un’wana ni un’wana loyi a tinyiketelaka eka Yehovha u fanele a rhanga a “tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.” (Rhom. 12:1, 2) Xin’wana lexi katsekaka i ku dyondza ntiyiso wa le Bibeleni. Leswi khorwisaka munhu un’we leswaku Timbhoni ta Yehovha ti dyondzisa ntiyiso, a swi nge fani ni leswi nga ta khorwisa munhu un’wana. Van’wana va tsundzuka leswaku langutelo ra vona ri cince loko va dyondza hi vito ra Xikwembu eBibeleni, kumbe loko va twisisa xiyimo xa lava feke. (Ps. 83:18; Ekl. 9:5, 10) Lexi kokeke van’wana i rirhandzu leri va ri voneke exikarhi ka vanhu va Yehovha. (Yoh. 13:34, 35) Kasi van’wana va tsakisiwe hi ku tiva leswaku swi vula yini ku nga vi xiphemu xa misava. Va swi xiyile leswaku Vakreste va ntiyiso a va fanelanga va hlanganyela eka madzolonga ya tipolitiki kumbe eka tinyimpi ta tiko rihi na rihi.—Esa. 2:4; Yoh. 6:15; 17:14-16.

6 Eka vo tala, swivangelo leswi ni swin’wana hi swona leswi va endleke leswaku va rhandza Xikwembu hi ndlela leyi a va xi rhandza ha yona eku sunguleni. Tinyike nkarhi wo tsundzuka leswi ku kokeleke entiyisweni. Munhu un’wana ni  un’wana u ni swiyimo leswi hambaneke ni swa van’wana, kutani swivangelo swa wena swa xisekelo swa ku va u rhandza Yehovha ni ku tshemba switshembiso swakwe a swi fani ni swa van’wana. Kambe swivangelo leswi hinkwaswo i swa nkoka hilaha a swi ri hakona loko u dyondza ha swona ro sungula. Ntiyiso a wu cincanga. Hikwalaho ku swi tsundzuka ni ku anakanyisisa ha swona swi nga vuyetela ndlela leyi a wu wu rhandza ha yona ntiyiso.—Hlaya Pisalema 119:151, 152; 143:5.

Tiyisa Rirhandzu Ra Wena Ro Sungula

7. Ha yini hi fanele hi tiyisa ndlela leyi a hi wu rhandza ha yona ntiyiso eku sunguleni, naswona leswi hi nga swi endla njhani?

7 Kumbexana ku ni swilo swo tala leswi nga cinca evuton’wini bya wena ku sukela loko u tinyiketerile eka Yehovha. Ndlela leyi a wu wu rhandza ha yona ntiyiso eku sunguleni a yi ri ya nkoka, kambe loko nkarhi wu ri karhi wu famba, swi lave leswaku u tiyisa rirhandzu rero leswaku u ta kota ku langutana ni miringo yin’wana leyi ringaka ripfumelo ra wena. Hambiswiritano, Yehovha u ku pfunile. (1 Kor. 10:13) Xisweswo, leswi humeleleke eka wena emalembeni lama hundzeke na swona i swa risima eka wena. Swi ku pfune leswaku u tiyisa rirhandzu leri a wu ri na rona eku sunguleni, naswona i ndlela yin’wana leyi u nga tiyisekaka ha yona hi ku rhandza ka Xikwembu loku nga kunene ni loku amukelekaka.—Yox. 23:14; Ps. 34:8.

8. Xana Yehovha u tihlamusele njhani eka Muxe, naswona Vaisrayele va n’wi tive njhani ku antswa?

8 Hi xikombiso, ehleketa hi xiyimo lexi Vaisrayele va tikumeke va ri eka xona loko Yehovha a va byela xitshembiso xakwe xa ku va kutsula evuhlongeni le Egipta. Xikwembu xi humelele eka Muxe xi ku: “Ndzi ta tikombisa ndzi ri lexi ndzi nga ta tikombisa ndzi ri xona.” (Eks. 3:7, 8, 13, 14) Kahle-kahle Yehovha a a vula leswaku u ta tiendla hinkwaswo leswi lavekaka leswaku a kutsula vanhu va yena. Eka swiendlakalo leswi landzeleke, Vaisrayele va vone Yehovha a kombisa vumunhu byakwe hi tindlela to hambana-hambana, a va Lowa Matimba Hinkwawo, Muavanyisi, Murhangeri, Mukutsuri, Nhenha ni Muwundli, loko swiyimo swi lava leswaku a va tano.—Eks. 12:12; 13:21; 14:24-31; 16:4; Neh. 9:9-15.

9, 10. I xiyimo xa njhani lexi nga pfunaka munhu leswaku a tiva Xikwembu, naswona ha yini swi ri swa nkoka ku tsundzuka mintokoto yoleyo?

9 Xiyimo xa wena a xi fani ni lexiya xa Vaisrayele va khale. Hambiswiritano, na wena u ve na yona mintokoto leyi ku khorwiseke leswaku Xikwembu xa ku rhandza, ku nga swona leswi tiyiseke ripfumelo ra wena. Kumbexana Yehovha u tikombise a ri Muwundli, Muchaveleri kumbe Mudyondzisi eka wena. (Hlaya Esaya 30:20b, 21.) Kumbe u nga ha va u xiye nhlamulo leyi nga erivaleni ya xikhongelo xa wena. Swi nga endleka a wu ri eka xiyimo xo tika, kutani makwerhu un’wana a ku pfuna. Kumbe eka dyondzo ya wena n’wini u kume Matsalwa lama fambisanaka ni xiyimo xa wena.

10 Loko a wu fanele u hlamusela van’wana mintokoto yoleyo, a hi hinkwavo lava a yi ta va tsakisa ku fana na wena. Phela mintokoto yoleyo a yi nga ri mahlori. Kambe u yi teka yi ri ya nkoka. Ina, Yehovha u tikombise a ri leswi a a fanele a va swona eka wena. Anakanya hi malembe lawa u ma heteke u ri entiyisweni. Xana swi kona swiendlakalo leswi u swi tsundzukaka laha u voneke nkhathalelo wa Yehovha evuton’wini bya wena? Loko swi ri tano, ku tsundzuka swiendlakalo swoleswo ni ndlela leyi u titweke ha yona swi nga ku phyuphyisa mbilu hilaha swi veke hakona eku sunguleni loko u vona nkhathalelo wa Yehovha. Swi tlangele swinene swiendlakalo swoleswo. Anakanyisisa ha swona, hikuva i vumbhoni bya leswaku Yehovha wa ku rhandza, naswona ku hava ni un’we la nga ku tshikisaka ku kholwa mhaka yoleyo.

Tikambisise

11, 12. Loko Mukreste a nga ha wu hisekeli ntiyiso, xana sweswo swi nga ha va swi vangiwa hi yini, naswona hi yihi ndzayo leyi Yesu a yi nyikeleke?

11 Loko ndlela leyi a wu rhandza Xikwembu ni ntiyiso ha yona swi cincile a swi vuli swona leswaku ku na leswi nga cinca eka xona. Yehovha a nga cinci. (Mal. 3:6; Yak. 1:17) A a ku rhandza, naswona ninamuntlha wa ha ku rhandza. Kambe ku vuriwa yini loko ku ri leswaku ku na leswi nga cinca eka vuxaka bya wena na Yehovha? Xana swi nga endleka leswaku hileswi u titwaka u tshikilelekile swinene naswona u karhatekaka ngopfu hi mivilelo ya vutomi? Kumbexana enkarhini lowu nga  hundza a wu khongela hi mbilu hinkwayo, u hisekela ku dyondza swinene u anakanyisisa nkarhi na nkarhi. Xana a a wu hisekela nsimu naswona u nga xwi eminhlanganweni ya vandlha ku tlula sweswi?—2 Kor. 13:5.

12 Swi nga ha endleka u nga xiyi ku cinca ko karhi, kambe loko se ri horile rirhandzu ra wena, i yini lexi ri endleke ri hola? Xana swivangelo leswi twalaka swo tanihi ku khathalela ndyangu wa wena, ku khathalela rihanyo ra wena kumbe swin’wana swi endle leswaku u nga ha vi na mhaka ngopfu ni siku ra Yehovha leri tshineleke? Yesu u byele vaapostola va yena a ku: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi, kutani hi xitshuketa siku rero ri mi wela hi xihatla ku fana ni ntlhamu. Hikuva ri ta wela hinkwavo lava tshamaka emisaveni hinkwayo. Kutani, hitekani nkarhi hinkwawo mi endla xikombelo leswaku mi ta humelela loko mi balekela swilo leswi hinkwaswo leswi nga ta humelela.”—Luka 21:34-36.

13. Yakobo u fanise Rito ra Xikwembu na yini?

13 Yakobo mutsari wa Bibele la huhuteriweke u khutaze vapfumeri-kulobye leswaku va tikambisisa hi ku tshembeka hi ku tirhisa Rito ra Xikwembu. U tsarile a ku: “Vanani vaendli va rito, mi nga vi vatwi ntsena, lava tixisaka hi mianakanyo ya mavunwa. Hikuva loko un’wana ni un’wana a ri mutwi wa rito, kambe a nga ri muendli, yena u fana ni munhu loyi a langutaka xikandza xakwe xa ntumbuluko exivonini. Hikuva wa tilanguta, kutani a famba, hi ku hatlisa a rivala leswaku i munhu wa muxaka muni. Kambe loyi a kambisisaka nawu lowu hetisekeke lowu fambisanaka ni ntshunxeko ni loyi a phikelelaka eka wona, munhu yoloye, leswi a nga vangiki mutwi loyi a rivalaka, kambe a veke muendli wa ntirho, u ta tsaka eku wu endleni kakwe.”—Yak. 1:22-25.

14, 15. (a) Bibele yi nga ku pfuna njhani leswaku u antswisa vuxaka bya wena na Yehovha? (b) Hi swihi swivutiso leswi u nga anakanyisisaka ha swona?

14 Munhu a nga ha tirhisa xivoni ku vona loko a languteka. Hi xikombiso, loko wanuna a tilanguta kutani a vona leswaku thayi yakwe a yi tshamanga kahle wa yi lunghisa. Loko wansati a tilanguta kutani a vona leswaku misisi yakwe a yi tshamisekanga kahle wa yi lunghisa. Hilaha ku fanaka, Matsalwa ma hi pfuna leswaku hi tikambisisa leswi hi nga swona. Loko hi tiringanisa ni leswi Bibele yi vulaka leswaku hi fanele hi va swona, swi vula leswaku hi yi tirhisa tanihi xivoni. Kambe a swi nge hi pfuni nchumu loko hi tilangutisa exivonini, kutani hi nga lulamisi xihoxo lexi hi xi vonaka. Hi ta va hi tlharihile loko hi teka goza hi ku ya hileswi hi swi vonaka eka “nawu lowu hetisekeke” wa Xikwembu, hi va “vaendli” va wona. Hikwalaho, un’wana ni un’wana la swi xiyaka leswaku a nga ha n’wi rhandzi ngopfu Yehovha ni ntiyiso ku fana ni le ku sunguleni, u fanele a anakanyisisa hi swivutiso leswi landzelaka: ‘Hi yihi mintshikilelo leyi ndzi langutaneke na yona evuton’wini, naswona ndzi angurisa ku yini eka yona? Xana ndzi angurise ku yini enkarhini lowu hundzeke? Xana ku na leswi nga cinca?’ Endzhaku ko tikambela, loko u vona ku tsana ko karhi u nga ku bi hi makatla. Loko ku laveka mindzulamiso, yi endle hi ku hatlisa hilaha u nga kotaka hakona.—Hev. 12:12, 13.

15 Ku anakanyisisa hi ndlela yoleyo swi nga tlhela swi ku pfuna leswaku u tivekela tipakani leti nga ta ku pfuna ku tlhela u endla nhluvuko hi tlhelo ra moya. Muapostola Pawulo u nyike Timotiya, mutirhi-kulobye ndzayo leyi huhuteriweke leswaku a antswisa ntirho wa yena wo  chumayela. Pawulo u khutaze jaha leri a ku: “Anakanyisisa hi swilo leswi; u dzika eka swona, leswaku ku ya emahlweni ka wena ku vonaka eka vanhu hinkwavo.” Na hina hi fanele hi anakanyisisa hi laha hi faneleke hi antswisa kona, hi tirhisa Rito ra Xikwembu.—1 Tim. 4:15.

16. Loko u ri karhi u tikambisisa hi ku tirhisa Matsalwa, hi rihi khombo leri u faneleke u ri tsundzuka?

16 Loko u tikambela hi ku tshembeka, u ta vona laha u tsaneke kona. Sweswo swi nga ha ku heta matimba, kambe u nga swi pfumeleli swi ku tsanisa. Phela, xikongomelo xa ku tikambisisa i ku vona laha hi nga antswisaka kona. Ina, Sathana yena u lava leswaku Mukreste a titwa a ri xikangalafula hikwalaho ka ku nga hetiseki kakwe. Kahle-kahle u vule leswaku Xikwembu a xi ma tlangeli matshalatshala lawa hi ma endlaka ya ku xi tirhela. (Yobo 15:15, 16; 22:3) Wolawo i mavunwa ya rihlaza lawa Yesu a ma kaneteke swinene; Xikwembu xi teka un’wana ni un’wana wa hina a ri wa nkoka. (Hlaya Matewu 10:29-31.) Ku tiva laha u tsaneke kona swi fanele swi ku endla u titsongahatela ku tiyimisela ku antswisa hi mpfuno wa Yehovha. (2 Kor. 12:7-10) Loko ku ri leswaku mavabyi kumbe ku dyuhala swi ku sivela ku endla leswi nga ematimbeni ya wena, tivekele tipakani leti u nga kotaka ku ti fikelela, kambe u nga heli matimba kumbe u pfumelela rirhandzu ra wena ri hola.

Swilo Swo Tala Leswi U Nga Swi Tlangelaka

17, 18. Hi byihi vuyelo lebyi hi nga byi kumaka loko hi tiyisa rirhandzu leri a hi ri na rona eku sunguleni?

17 Loko u hambeta u tiyisa rirhandzu leri a wu ri na rona eku sunguleni u ta kuma vuyelo lebyikulu. U nga hambeta u va ni vutivi lebyi engetelekeke hi Xikwembu ni ku tlangela nkongomiso wa xona wa rirhandzu. (Hlaya Swivuriso 2:1-9; 3:5, 6.) Mupisalema u te: “Ku swi hlayisa [swiboho swa vuavanyisi swa Yehovha] swi ni hakelo leyikulu.” “Xitsundzuxo xa Yehovha xa tshembeka, xi tlharihisa la nga riki na ntokoto.” Ku tlula kwalaho, “va tsaka lava pfumalaka xihoxo endleleni ya vona, lava fambaka enawini wa Yehovha.”—Ps. 19:7, 11; 119:1.

18 U ta pfumela leswaku ku ni swilo swo tala leswinene leswi hi faneleke hi swi tlangela. Wa swi twisisa leswaku ha yini ku humelela swilo leswi endlekaka emisaveni namuntlha. Wa vuyeriwa eka malunghiselelo hinkwawo ya moya lawa Xikwembu xi ma nyikaka vanhu va xona namuntlha. A swi kanakanisi leswaku wa swi tlangela swinene leswi Yehovha a ku kokeleke enhlengeletanweni ya yena ya misava hinkwayo, nileswi a ku nyikeke lunghelo ra ku va Mbhoni yakwe. Tlangela swilo leswinene leswi u nga na swona evuton’wini! Loko a wo swi tsala ehansi, nxaxamelo wa kona a wu ta leha ngopfu. A swi kanakanisi leswaku loko u tshama u ri karhi u tlangela swilo leswi u nga na swona swi ta ku pfuna leswaku u tirhisa xitsundzuxo lexi nge: “Tama u khoma swi tiya leswi u nga na swona.”—Nhlav. 3:11.

19. Handle ko anakanyisisa hi vuxaka bya wena ni Xikwembu, i yini swin’wana swa nkoka leswi nga ku pfunaka leswaku u hlayisa vumoya bya wena?

19 Ku anakanyisisa hi ndlela leyi ripfumelo ra wena ri kuleke ha yona malembe lawa hinkwawo, ko va xin’wana xa leswi u nga swi endlaka leswi nga ku pfunaka leswaku u swi khoma swi tiya leswi u nga na swona. Magazini lowu hi ku phindha-phindha wu vulavule hi swilo swin’wana swa nkoka leswi nga ku pfunaka leswaku u tshama u ri ni vuxaka lebyinene ni Xikwembu. Swin’wana swa swona i xikhongelo, ku va kona eminhlanganweni ya Vukreste ni ku hlanganyela eka yona ni ku hisekela ntirho wo chumayela. Swilo leswi swi nga ku pfuna leswaku u hambeta u pfuxeta ni ku tiyisa rirhandzu leri a wu ri na rona eku sunguleni.—Efe. 5:10; 1 Pet. 3:15; Yudha 20, 21.

U Nga Hlamula Njhani?

• Xana swilo leswi ku endleke u rhandza Yehovha swi nga ku khutaza njhani sweswi?

• Ku anakanyisisa hi mintokoto ya wena ya malembe lama hundzeke swi nga ku endla u khorwiseka hi yini?

• Ha yini u fanele u kambisisa ndlela leyi u rhandzaka Xikwembu ha yona?

[Swivutiso Swa Dyondzo]

[Xifaniso lexi nga eka tluka 23]

I yini lexi endleke leswaku u khorwiseka leswaku leswi u swi dyondzaka i ntiyiso lerova u wu rhandza?

[Xifaniso lexi nga eka tluka 25]

Xana ku ni swilo leswi u vonaka swi lava ku lulamisiwa eka wena n’wini?