Nghena endzeni

Hundzela eka leswi nga endzeni

Ku Hlakulela Langutelo Leri Kreste A A Ri Na Rona Hi Ku Va Lonkulu

Ku Hlakulela Langutelo Leri Kreste A A Ri Na Rona Hi Ku Va Lonkulu

 Ku Hlakulela Langutelo Leri Kreste A A Ri Na Rona Hi Ku Va Lonkulu

“Mani na mani la lavaka ku va lonkulu exikarhi ka n’wina u fanele ku va mutirheli wa n’wina.”—MATEWU 20:26.

1. Hi rihi langutelo ra misava hi vukulu?

EKUSUHI ni doroba ra khale ra le Egipta leri vuriwaka Tebesi (sweswi ku nga Karnak), kwalomu ka 500 wa tikhilomitara edzongeni wa Cairo, ku ni xifaniso lexi leheke 18 wa timitara xa Faro Amenhotep wa Vunharhu. Munhu u titwa a nga ri nchumu loko a tipimanisa ni xifaniso xolexo lexikulu. Xifaniso lexi, lexi handle ko kanakana a xi endleriwe ku endla leswaku vanhu va chava mufumi, xi kombisa ndlela leyi vanhu va langutaka vukulu ha yona—ku endla munhu a vonaka a ri lonkulu naswona a ri wa nkoka swinene ni ku endla vanhu van’wana va titwa va nga ri nchumu.

2. Hi xihi xikombiso lexi Yesu a xi vekeleke valandzeri vakwe, naswona hi swihi swivutiso leswi hi faneleke hi tivutisa swona?

2 Ringanisa langutelo leri ra ku va lonkulu ni langutelo leri dyondzisiweke hi Yesu Kreste. Hambileswi a a ri “Hosi ni Mudyondzisi” wa valandzeri vakwe, Yesu u va dyondzise leswaku ku va lonkulu swi tisiwa hi ku tirhela van’wana. Esikwini ra yena ro hetelela a ri laha misaveni, Yesu u kombise leswaku a a vula yini hi leswi a swi dyondziseke hi ku hlambisa vadyondzisiwa vakwe milenge. Xexo a ku ri xiendlo xo titsongahata hakunene! (Yohane 13:4, 5, 14) Xana wena u rhandza ku tirhela kumbe u rhandza ku tirheriwa? Xana xikombiso  xa Kreste xi ku susumetela ku titsongahata ku fana na yena? Kutani, a hi kambisiseni langutelo leri Kreste a a ri na rona hi ku va lonkulu leri hambaneke ni leri tolovelekeke ra misava.

Papalata Langutelo Ra Misava Hi Ku Va Lonkulu

3. Hi swihi swikombiso swa le Bibeleni leswi kombisaka vuyelo byo biha lebyi weleke lava a va lava ku vangamisiwa hi vanhu?

3 Ku ni swikombiso swo tala swa le Bibeleni leswi kombisaka leswaku langutelo ra misava hi ku va lonkulu ri yisa eku loveni. Anakanya hi Hamani loyi a a ri ni matimba lamakulu, loyi a a tlakuke ngopfu evuhosini bya Peresiya eminkarhini ya Estere na Mordekayi. Ku navela ka Hamani ku dzunisiwa ku endle leswaku a tsongahatiwa ni ku dlayiwa. (Estere 3:5; 6:10-12; 7:9, 10) Ku vuriwa yini hi Nebukadnetsara lowo tikukumuxa, la xupuriweke hi ku pengisiwa a ri emaninginingini ya mfumo wakwe? Langutelo rakwe ro biha hi ku va lonkulu ri vonaka eka marito lawa: “Xana loyi a hi yena Babilona Lonkulu, loyi ndzi n’wi akeke a va yindlu ya vuhosi hi ntamu wa matimba ya mina ni xindzhuti xa vukulukumba bya mina?” (Daniyele 4:30) Kutani ku na Heroda Agripa wo Sungula la tikukumuxeke, a pfumela ku vangamisiwa swi nga fanelanga ematshan’weni yo vangamisa Xikwembu. U ‘dyiwe hi swivungu kutani a timeka.’ (Mintirho 12:21-23) Ku tsandzeka ku tlangela langutelo leri Yehovha a nga na rona hi ku va lonkulu swi endle leswaku vavanuna lava va herisiwa.

4. I mani la hlohlotelaka moya wa misava wa ku tikukumuxa?

4 I swinene leswaku hi lwela ku tirhisa vutomi bya hina hi ndlela leyi nga ta endla leswaku hi fundzhiwa ni ku xiximiwa. Kambe, Diyavulosi u tirhisa ku navela loku hi ku khutaza moya wa ku tikukumuxa, lowu fambisanaka ni leswi yena a swi navelaka. (Matewu 4:8, 9) U nga tshuki u rivala leswaku hi yena “xikwembu xa mafambiselo lawa ya swilo,” naswona u tiyimisele ku byala tidyondzo takwe emisaveni. (2 Vakorinto 4:4; Vaefesa 2:2; Nhlavutelo 12:9) Leswi Vakreste va tivaka lomu tidyondzo teto ti humaka kona, va papalata langutelo ra misava hi ku va lonkulu.

5. Xana ku fikelela swo karhi, ku va ni ndhuma ni rifuwo swa wu tisa ntsako hilaha ku nga heriki? Hlamusela.

5 Dyondzo yin’wana leyi Diyavulosi a yi hlohlotelaka i ya ku va ni xikhundlha lexi tlakukeke emisaveni, ku dzunisiwa hi vanhu ni ku vona onge rifuwo ri tisa vutomi lebyi tsakisaka. Xana sweswo i ntiyiso? Xana ku fikelela swo karhi, ku va ni ndhuma ni rifuwo swi tisa vutomi lebyi enerisaka? Bibele ya hi lemukisa leswaku hi nga tshuki hi hambukisiwa hi tidyondzo to tano. Hosi Solomoni wo tlhariha u tsarile: “Mina ndzi wu vonile ntirho hinkwawo wa matimba ni vutshila hinkwabyo entirhweni, leswaku swi vula ku kwetlembetana exikarhi ka vanhu; leswi na swona i vuhava ni ku hlongorisa mheho.” (Eklesiasta 4:4) Vanhu vo tala lava tinyiketeleke leswaku va kuma rifuwo emisaveni leyi, va nga tiyisekisa leswaku leswi Bibele yi swi vulaka i ntiyiso. Xikombiso xin’wana i xa wanuna loyi a pfuneteke eku mpfampfarhutiweni, eku akiweni ni le ku kambeleni ka xibamubamu lexi vanhu va yeke ha xona en’wetini. U te: “Ndzi tirhe hi matimba ni ku va ni vutshila lebyikulu eka leswi ndzi swi endleke. Kambe a ku ri swa hava, a swi ndzi tiselanga ntsako lowu nga heriki ni ku rhula ka mianakanyo.” * Ndlela leyi misava yi langutaka ku va lonkulu ha yona, ku nga khathariseki  leswaku hi le mabindzwini, emintlangwini kumbe eka vuhungasi, a yi tisi ntsako lowu tshamaka hilaha ku nga heriki.

Ku Va Lonkulu eNtirhweni Lowu Susumetiwaka Hi Rirhandzu

6. I yini lexi kombisaka leswaku Yakobo na Yohane a va ri ni langutelo leri hoxeke malunghana ni ku va lonkulu?

6 Xiendlakalo lexi humeleleke evuton’wini bya Yesu xi kombisa leswi ku va lonkulu swi katsaka swona. Yesu ni vadyondzisiwa va yena a va kongome eYerusalema ku ya tlangela Paseka ya 33 C.E. Loko va ri endleleni, maxaka mambirhi ya Yesu, kumbexana lawa a ma ri vamuzala wakwe, Yakobo na Yohane, va kombise langutelo leri hoxeke malunghana ni ku va lonkulu. Va rhume mana wa vona leswaku a ya endla xikombelo lexi landzelaka eka Yesu: ‘Vula rito ra leswaku hi tshama emfun’weni wa wena, un’wana evokweni ra wena ra xinene un’wanyana eka lera ximatsi.’ (Matewu 20:21) Eka Vayuda, ku tshama evokweni ra xinene kumbe eka ra ximatsi a swi tekiwa swi ri swa nkoka swinene. (1 Tihosi 2:19) Yakobo na Yohane a va navela ku kuma swikhundlha leswi tlakukeke ngopfu. A va lava ku kuma swikhundla leswi swa vulawuri. Yesu a a swi tiva leswi nga etimbilwini ta vona naswona u tirhise nkarhi lowu ku lulamisa langutelo ra vona leri hoxeke malunghana ni ku va lonkulu.

7. Xana Yesu u yi hlamusele njhani ndlela leyi Mukreste wa ntiyiso a vaka lonkulu ha yona?

7 Yesu a a swi tiva leswaku emisaveni leyi tikukumuxaka, munhu la tekiwaka a ri lonkulu hi loyi a lawulaka ni ku lerisa vanhu van’wana naswona hi ku copeta ka tihlo, ku nga endliwa leswi a swi lavaka. Kambe eka valandzeri va Yesu, ku endla ntirho wa le hansi hi kona ku nga endlaka leswaku munhu a va lonkulu. Yesu u te: “Mani na mani la lavaka ku va lonkulu exikarhi ka n’wina u fanele ku va mutirheli wa n’wina, naswona mani na mani la lavaka ku va wo sungula exikarhi ka n’wina u fanele ku va hlonga ra n’wina.”—Matewu 20:26, 27.

8. Xana swi vula yini ku va mutirheli, naswona hi swihi swivutiso leswi hi nga tivutisaka swona?

8 Rito ra Xigriki leri hundzuluxeriweke va ku “mutirheli” eBibeleni ri kombetela eka munhu loyi hi vutlhari ni hi ku phikelela a tikarhatelaka ku tirhela van’wana. Yesu a a dyondzisa vadyondzisiwa va yena dyondzo ya nkoka: Ku lerisa vanhu leswaku va endla swilo swo karhi a swi endli munhu a va lonkulu; ku tirhela van’wana hi ku susumetiwa hi rirhandzu swi ku endla u va lonkulu. Tivutise: ‘Xana a ndzi ta va ndzi angurise ku yini loko a ndzo va Yakobo kumbe Yohane? Xana a ndzi ta va ndzi swi xiyile leswaku munhu loyi a nga lonkulu hakunene hi loyi a susumetiwaka hi rirhandzu ku tirhela van’wana?’—1 Vakorinto 13:3.

9. Hi xihi xikombiso lexi Yesu a xi vekeke loko a tirhisana ni van’wana?

 9 Yesu u kombise vadyondzisiwa va yena leswaku langutelo ra misava ra ku va lonkulu a hi rona leri Kreste a a ri na rona hi ku va lonkulu. A a nga ehleketi hi ku va ni langutelo ra ku va lonkulu eka vanhu lava a a va tirhela kumbe ku endla leswaku va titwa va nga ri nchumu. Vanhu va tinxaka hinkwato—vavanuna, vavasati ni vana, swigwili, swisiwana ni lava nga ni vulawuri, hambi ku ri vadyohi lava tivekaka—a va titwa va ntshunxekile loko va ri na yena. (Marka 10:13-16; Luka 7:37-50) Hakanyingi vanhu a va swi koti ku va lehisela mbilu vanhu lava tsaneke. Yesu a a nga ri tano. Hambiloko minkarhi yin’wana vadyondzisiwa va yena va endla swilo va nga ehleketanga naswona va holova, a a va lehisela mbilu loko a va dyondzisa, a va kombisa leswaku hakunene wa titsongahata naswona u ni moya wo rhula.—Zakariya 9:9; Matewu 11:29; Luka 22:24-27.

10. Xana ndlela leyi Yesu a a hanya ha yona yi swi kombise njhani leswaku ku tirhela van’wana i swa nkoka?

10 Xikombiso xo pfumala vutianakanyi lexi vekiweke hi N’wana la tlakukeke swinene wa Xikwembu xi kombise ndlela leyi ha yona ku va lonkulu swi vulaka swona hakunene. Yesu a a nga telanga ku tirheriwa emisaveni kambe a a tele ku ta tirhela van’wana, ku hanyisa “mavabyi yo hambana-hambana” ni ku ntshunxa vanhu leswaku va nga lawuriwi hi madimona. Hambileswi a a pfa a karhala ni ku lava nkarhi wo wisa, minkarhi hinkwayo a a rhangisa swilaveko swa van’wana eka swa yena, a tikarhatela ku va chavelela. (Marka 1:32-34; 6:30-34; Yohane 11:11, 17, 33) Rirhandzu rakwe ri n’wi susumetele ku pfuna vanhu hi tlhelo ra moya, a a famba mpfhuka wo leha emapatwini ya ritshuri leswaku a ya chumayela mahungu lamanene ya Mfumo. (Marka 1:38, 39) A swi kanakanisi leswaku Yesu a a teka ku tirhela van’wana ku ri ka nkoka swinene.

Tekelela Ku Titsongahata Ka Kreste

11. Hi tihi timfanelo leti langutiwaka eka vamakwerhu lava hlawuriwaka ku va valanguteri evandlheni?

11 Eku heleni ka va-1800, langutelo lerinene leri valanguteri lava nga Vakreste va faneleke va ri hlakulela ri kandziyisiwile loko ku hlawuriwa vavanuna lava faneleke ku va vayimeri lava famba-fambaka leswaku va pfuna vanhu va Xikwembu. Hi ku ya hi Zion’s Watch Tower ya September 1, 1894, a ku laveka vavanuna lava “titsongahataka—leswaku va nga tshuki va tikurisa . . . , vavanuna lava nga riki na moya wa ku tikukumuxa lava a va nga lavi ku tiendlela vito, kambe a va ta vulavula hi Kreste—lava a va nga ta dyondzisa leswi laviwaka hi vona, kambe a va ta dyondzisa Rito rakwe hi ndlela yo olova ni hi ku hiseka.” Swi le rivaleni leswaku Vakreste va ntiyiso a va fanelanga va lava vutihlamuleri leswaku va ta enerisa ku navela ka vona vini kumbe leswaku va va ni ndhuma, matimba ni ku lawula van’wana. Mulanguteri la titsongahataka a nga rivali leswaku vutihlamuleri bya yena i “ntirho lowunene,” ku nga ri xikhundlha lexi tlakukeke lexi a tidzunisaka ha xona. (1 Timotiya 3:1, 2) Vakulu hinkwavo ni malandza ya vutirheli va fanele va endla hinkwaswo leswi va nga swi kotaka leswaku va tirhela van’wana hi ku titsongahata ni ku rhangela entirhweni wo kwetsima, va vekela van’wana xikombiso lexinene leswaku va xi tekelela.—1 Vakorinto 9:19; Vagalatiya 5:13; 2 Timotiya 4:5.

12. Hi swihi swivutiso leswi lava tikarhatelaka ku kuma malunghelo evandlheni va faneleke ku tivutisa swona?

 12 Makwerhu un’wana ni un’wana loyi a tikarhatelaka ku kuma malunghelo yo karhi u fanele a tivutisa: ‘Xana ndzi lava tindlela to tirhela van’wana, kumbe xana ndzi ni mboyamelo wo lava ku tirheriwa? Xana ndzi tiyimiserile ku pfuneta hi mintirho leyi vanhu van’wana va nga hatliki va yi xiya?’ Hi xikombiso, jaha ro karhi ri nga ha va ri tiyimiserile ku nyikela tinkulumo evandlheni ra Vukreste kambe ri nga ha va ri kanakana ku pfuna vanhu lava kuleke. Ri nga ha va ri swi tsakela ku bula ni vavanuna lava nga ni vutihlamuleri evandlheni kambe ri kokela endzhaku loko ri fanele ri ya entirhweni wo chumayela. Jaha rolero ri fanele ri tivutisa swivutiso leswi: ‘Xana ndzi nyikela nyingiso swinene eka timhaka ta ntirho wa Xikwembu leti endlaka leswaku ndzi va ni ndhuma ni ku dzunisiwa? Xana ndzi lwela ku va ni ndhuma?’ Hakunene moya wo lava ku dzunisiwa a hi wona lowu Kreste a a ri na wona.—Yohane 5:41.

13. (a) Xana xikombiso xa ku titsongahata xa mulanguteri xi nga va khumba njhani van’wana? (b) Ha yini ku nga vuriwaka leswaku Mukreste wa boheka leswaku a titsongahata?

13 Loko hi tikarhatela ku tekelela ku titsongahata ka Kreste, hi susumeteleka ku tirhela van’wana. Xiya xikombiso xa mufamberi wa marhavi loyi a a kambela ndlela leyi ntirho wu fambisiwaka ha yona erhavini rin’wana ra Timbhoni ta Yehovha. Hambileswi a a ri ni ntirho wo tala swinene ni vutihlamuleri lebyikulu, mulanguteri loyi u yimile a pfuna makwerhu un’wana loyi a a khome xo tika hi ku lunghisa muchini wo khomisa swibukwana. Makwerhu loyi u te: “Swi ndzi hlamarisile! U ndzi byele leswaku u tshame a tirha hi muchini lowu fanaka eBethele loko a ha ri jaha, naswona wa ha tsundzuka ndlela leyi a swi tika ha yona ku tirhisa muchini lowu. Hi hete nkarhi wo lehanyana ha ha kambisisa muchini lowu hambileswi a ri ni swilo swo tala swa nkoka leswi a a fanele a swi endla. Hakunene sweswo swi ndzi khumbile.” Makwerhu yoloye, loyi sweswi a nga mulanguteri eka rhavi rin’wana ra Timbhoni ta Yehovha, wa ha xi tsundzuka xiendlo xexo xa ku titsongahata. Hi nga tshuki hi titwa hi ri lava tlakuke ngopfu lerova hi nga lavi ku endla swilo swa xiyimo xa le hansi kumbe hi titwa hi ri va nkoka swinene lerova hi nga lavi ku endla swintirhwana leswi nga nyawuriki. Ematshan’weni ya sweswo, hi fanele ku va ni “mianakanyo yo titsongahata.” Swa hi boha. I xiphemu xa “vumunhu lebyintshwa” lebyi Mukreste a faneleke a byi ambala.—Vafilipiya 2:3; Vakolosa 3:10, 12; Varhoma 12:16.

Ndlela Yo Va Ni Langutelo Leri Kreste A A Ri Na Rona Hi Ku Va Lonkulu

14. Xana ku anakanyisisa hi vuxaka bya hina na Xikwembu na vanhu-kulorhi ku nga hi pfuna njhani leswaku hi hlakulela langutelo lerinene hi ku va lonkulu?

14 Xana hi nga ri kuma njhani langutelo lerinene hi ku va lonkulu? Ndlela yin’wana i ku anakanyisisa hi vuxaka bya hina na Yehovha Xikwembu. Vukulu bya yena, matimba ni vutlhari swi n’wi endla a va ehenhla ngopfu, vanhu va vonaka va nga ri nchumu. (Esaya 40:22) Ku anakanyisisa hi vuxaka bya hina ni vanhu-kulorhi swi tlhela swi hi pfuna ku hlakulela ku titsongahata. Hi xikombiso, swi nga ha endleka hi va tlula van’wana eka mintirho yo karhi, kambe vona va nga ha hi tlula eka timhaka tin’wana ta vutomi leti nga ta nkoka swinene, kumbe vamakwerhu lava nga Vakreste va nga ha va va ri ni timfanelo tin’wana leti hi nga riki na tona. Kahle-kahle, vanhu vo tala lava nga va risima emahlweni ka Xikwembu a va dumanga hikwalaho ka leswi va titsongahataka.—Swivuriso 3:34; Yakobo 4:6.

15. Xana ku tshembeka ka vanhu va Xikwembu ku swi kombisa njhani leswaku a nga kona munhu loyi a nga ni xivangelo xo titwa a tlakukile eka van’wana?

15 Mintokoto ya Timbhoni ta Yehovha leti ringiweke hikwalaho ka ripfumelo ra tona yi yi kombisa kahle yinhla leyi. Hakanyingi vanhu lava misava yi va tekaka va ri lava tolovelekeke hi vona lava tshameke va tshembekile eka Xikwembu loko va ri emiringweni leyikulu. Ku anakanyisisa hi swikombiso  swo tano swi nga hi pfuna leswaku hi tshama hi titsongahatile ni ku hi dyondzisa leswaku ‘hi nga tiehleketeleli ku tlula mpimo lowu hi faneleke ku tiehleketelela ha wona.’—Varhoma 12:3. *

16. Xana vanhu hinkwavo evandlheni va nga ku hlakulela njhani ku va lonkulu xisweswo va tekelela ntila lowu vekiweke hi Yesu?

16 Vakreste hinkwavo, lavatsongo ni lavakulu, va fanele ku hlakulela ku va ni langutelo leri Kreste a a ri na rona hi ku va lonkulu. Evandlheni ku ni mintirho yo hambana-hambana leyi faneleke yi endliwa. U nga hlundzuki loko u komberiwa leswaku u endla swilo leswi vonakaka swi nga nyawuli. (1 Samuwele 25:41; 2 Tihosi 3:11) Vatswari, xana ma va khutaza vana va n’wina swin’we ni vana van’wana va kondlo-a-ndzi-dyi leswaku va swi tsakela ku endla xiavelo xin’wana ni xin’wana lexi va nyikiwaka xona, ku nga ha va eHolweni ya Mfumo, enhlengeletanweni kumbe entsombanweni? Xana va mi vona mi endla swintirhwana leswi nga nyawuriki? Makwerhu un’wana loyi sweswi a tirhaka eyindlu-nkulu ya Timbhoni ta Yehovha, u xi tsundzuka kahle xikombiso xa vatswari va yena. U te: “Ndlela leyi a va wu teka ha yona ntirho wo basisa Holo ya Mfumo kumbe ndhawu ya ntsombano yi ndzi kombise leswaku a va wu teka wu ri wa nkoka. Hakanyingi a va tala ku tirha mintirho leyi vuyerisaka vandlha kumbe vamakwerhu, ku nga khathariseki leswaku mintirho ya kona ya nyawula kumbe e-e. Langutelo leri ri ndzi pfunile leswaku ndzi xi amukela hi mbilu hinkwayo xiavelo xin’wana ni xin’wana laha Bethele.”

17. Xana vavasati lava titsongahataka va nga va nkateko evandlheni hi tindlela tihi?

17 Malunghana ni ku rhangisa swilaveko swa van’wana eka swa hina, hi ni xikombiso lexinene ngopfu xa Estere, loyi a veke nsati wa hosi ya Mfumo wa Peresiya hi lembe-xidzana ra vuntlhanu B.C.E. Hambileswi a a tshama exigodlhweni, a a tiyimiserile ku hoxa vutomi byakwe ekhombyeni hikwalaho ka vanhu va Xikwembu a endla swilo hi ku pfumelelana ni ku rhandza ka xona. (Estere 1:5, 6; 4:14-16) Ku nga khathariseki xiyimo xa vona xa timali, vavasati va Vakreste namuntlha va nga kombisa moya wo fana ni wa Estere hi ku khutaza lava karhatekeke, ku endzela lava vabyaka, ku hlanganyela entirhweni wo chumayela ni hi ku tirhisana ni vakulu. Hakunene vamakwerhu volavo va xisati lava titsongahataka i nkateko evandlheni!

Mikateko Ya Ku Va Ni Langutelo Leri Kreste A A Ri Na Rona Hi Ku Va Lonkulu

18. Hi yihi mikateko leyi tisiwaka hi ku kombisa langutelo leri Kreste a a ri na rona hi ku va lonkulu?

18 U kuma mikateko yo tala loko u tshama u ri ni langutelo leri Kreste a a ri na rona hi ku va lonkulu. Ku tirhela van’wana handle ka vutianakanyi swi tisela wena ntsako swin’we na vona. (Mintirho 20:35) Loko u tirhela vamakwenu swi huma embilwini va ya va ku rhandza swinene. (Mintirho 20:37) Xa nkoka swinene hileswaku Yehovha u languta leswi u swi endlaka leswaku u pfuna Vakreste-kuloni tanihi gandzelo leri tsakisaka ra ku n’wi dzunisa.—Vafilipiya 2:17.

19. Xana hi fanele hi tiyimisela ku endla yini malunghana ni ku va ni langutelo leri Kreste a a ri na rona hi ku va lonkulu?

19 Un’wana ni un’wana wa hina u fanele a kambela mbilu yakwe kutani a tivutisa xivutiso lexi: ‘Xana ndzi ta vulavula ntsena hi ku hlakulela langutelo leri Kreste a a ri na rona hi ku va lonkulu, kumbe ndzi ta tirha hi matimba leswaku ndzi hlakulela ku va ni langutelo leri?’ Ndlela leyi Yehovha a va langutaka ha yona lava tikurisaka yi le rivaleni. (Swivuriso 16:5; 1 Petro 5:5) Onge swiendlo swa hina swi nga kombisa leswaku hi tsakela ku kombisa langutelo leri Kreste a a ri na rona hi ku va lonkulu, ku nga khathariseki leswaku hi le vandlheni ra Vukreste, hi le ndyangwini kumbe loko hi tirhisana ni van’wana siku ni siku—hi endla swilo leswi hinkwaswo leswaku Xikwembu xi vangamisiwa ni ku dzunisiwa.—1 Vakorinto 10:31.

[Tinhlamuselo ta le hansi]

^ par. 5 Vona Xihondzo xo Rindza (xa Xinghezi) xa May 1, 1982, matluka 3-6, “Ndzi Lava Ku Humelela eNtirhweni Wa Mina.”

^ par. 15 Leswaku u kuma swikombiso swin’wana, vona Buku Ya Lembe Ya Timbhoni ta Yehovha Ya 1992, (ya Xinghezi) matluka 181-2 na Xihondzo xo Rindza xa September 1, 1993, matluka 27-31.

Xana U Nga Hlamusela?

• Ha yini hi fanele hi papalata langutelo leri misava yi nga na rona hi ku va lonkulu?

• Xana Yesu a a byi pima njhani vukulu?

• Xana valanguteri va nga ku tekelela njhani ku titsongahata ka Kreste?

• I yini lexi nga hi pfunaka leswaku hi hlakulela ku va ni langutelo leri Kreste a a ri na rona hi ku va lonkulu?

[Swivutiso Swa Dyondzo]

[Bokisi leri nga eka tluka 17]

I Mani La Nga Ni Langutelo Leri Kreste A A Ri Na Rona Hi Ku Va Lonkulu?

Xana hi loyi a lavaka ku tirheriwa kumbe hi loyi a lavaka ku tirhela?

Xana hi loyi a lavaka ku voniwa kumbe hi loyi a amukelaka swintirhwana leswi nga nyawuriki?

Xana hi loyi a tikurisaka kumbe hi loyi a tlakusaka van’wana?

[Xifaniso lexi nga eka tluka 14]

Xifaniso lexikulu xa Faro Amenhotep wa Vunharhu

[Xifaniso lexi nga eka tluka 15]

Xana wa swi tiva leswaku ha yini Hamani a tsongahatiwile?

[Swifaniso leswi nga eka tluka 16]

Xana u lava tindlela to tirhela van’wana?