Ndlela Leyi Van’wana Va Kumeke Tinhlamulo Ha Yona

VANHU va timiliyoni va khongela. Van’wana va tiyiseka leswaku swikhongelo swa vona swa hlamuriwa. Van’wana va tivutisa loko swikhongelo swa vona swi twiwa hakunene. Kasi van’wana va lava tinhlamulo kambe a va kalanga va anakanya hi ku yisa swikombelo swa vona eka Xikwembu hi xikhongelo.

Bibele yi vula leswaku Xikwembu xa ntiyiso i “Mutwi wa xikhongelo.” (Pisalema 65:2) Loko u khongela, xana wa tiyiseka leswaku swikhongelo swa wena swi ya eka Xikwembu xa ntiyiso? Xana swikhongelo swa wena swa faneleka leswaku xi swi hlamula?

Eka vanhu vo tala emisaveni hinkwayo, nhlamulo ya kona i ina! Xana va ti kume njhani tinhlamulo? Xana va dyondze yini?

Xikwembu I Mani?

Mudyondzisi un’wana wa xisati wa le Portugal loyi a dyondzisiweke hi tinani ni vafundhisi a a hanya hi ku ya hi tidyondzo ta vukhongeri byakwe. Loko kereke yi tshike mikhuva ya yona leyi a dyondzisiweke leswaku i ya nkoka, u sungule ku pfilunganyeka. Loko a endzele etikweni rin’wana u fike a xiya tindlela leti vanhu va le Vuxeni va gandzelaka ha tona, kutani a sungula ku tivutisa loko ku ri ni Xikwembu xin’we xa ntiyiso. Xana a a fanele a xi gandzela hi ndlela yihi? Loko a vutise mufundhisi wa yena malunghana ni timhaka tin’wana ta le Bibeleni, swivutiso swa yena swi bakanyeriwe etlhelo, kutani a sala a nga ha titivi.

Kereke ya Khatoliki a yi hangalase swiphephana edorobeni leri mudyondzisi loyi a tshamaka eka rona, swi lemukisa swirho swa kereke leyi leswaku swi nga tshuki swi vulavurisana ni Timbhoni ta Yehovha. Kambe swivutiso swa yena a swa ha n’wi dya. Siku rin’wana loko Timbhoni ti ye ekaya ka yena, u yingiserile kutani a kombisa ku tsakela eka leswi a swi dyondzeke. A ku ri ro sungula a vulavurisana na tona.

Leswaku a kuma tinhlamulo ta swivutiso swa yena swo tala, wansati loyi u sungule ku dyondza Bibele ni Timbhoni. Vhiki rin’wana ni rin’wana a a tshama a lunghiselele swivutiso swo tala leswi a a lava ku swi vutisa. A a lava ku tiva vito ra Xikwembu, ni loko ku ri ni Xikwembu xin’we ntsena xa ntiyiso, kumbe loko xi swi pfumelela ku tirhisa swifaniso evugandzerini, ni swin’wana swo tala. U xiye leswaku tinhlamulo hinkwato leti a nyikiweke tona a ti huma eBibeleni, hayi  emianakanyweni ya munhu, xisweswo leswi a a swi dyondza swi n’wi hlamarisile swi tlhela swi n’wi tsakisa. Hakatsongo-tsongo u kume tinhlamulo ta swivutiso swa yena swo tala. Namuntlha u gandzela Yehovha hi moya ni ntiyiso, ku nga leswi Yesu Kreste a vuleke leswaku “vagandzeri va ntiyiso” a va ta endla swona.—Yohane 4:23.

Le Sri Lanka, va ndyangu wun’wana a va tolovele ku hlaya Bibele swin’we, kambe a va nga ti kumi tinhlamulo ta swivutiso swo tala leswi a swi va karhata. Hambileswi a va lava mpfuno, mufundhisi wa vona a a nga tikarhati ha vona. Loko swa ha te tano, va endzeriwe hi Timbhoni ta Yehovha kutani va siyeriwa tibuku ta Bibele leti pfunaka. Endzhakunyana loko Timbhoni ta Yehovha ti hlamule swivutiso swa vona swa Bibele hi ndlela leyi enerisaka, va tsakele ku dyondza Bibele na tona. Va tsakisiwe ngopfu hi leswi a va swi dyondza.

Hambiswiritano, swilo leswi nsati wa kona a dyondzisiweke swona ekerekeni ku sukela loko a ha ri ntsongo swi endle leswaku a nga swi twisisi leswaku Tata wa Yesu Kreste i “Xikwembu xi ri xin’we xa ntiyiso,” hilaha Yesu a vuleke hakona. (Yohane 17:1, 3) A a dyondzisiwe leswaku Yesu u ringana na Tatana ni leswaku “dyondzo leyi ya xihundla” a yi fanelanga yi kanakaniwa. Leswi a a lava mpfuno, u khongele Yehovha hi mbilu hinkwayo, a tirhisa vito rakwe, a kombela leswaku a n’wi hlamusela leswaku Yesu i mani. Kutani u tlhele a ma kambisisa kahle matsalwa lama vulavulaka hi mhaka leyi. (Yohane 14:28; 17:21; 1 Vakorinto 8:5, 6) Onge hiloko ku suke riphume ematihlweni yakwe, u sungule ku swi vona kahle leswaku Yehovha—Muvumbi wa tilo ni misava tlhelo Tata wa Yesu Kreste—hi xona Xikwembu xa ntiyiso.—Esaya 42:8; Yeremiya 10:10-12.

Ha Yini Ku Ri Ni Ku Xaniseka?

Yobo u xaniseke hi ndlela yo vava. Vana vakwe hinkwavo va dlayiwe hi bubutsa, yena a sala a ri evuswetini. U tlhele a chachamerisiwa hi vuvabyi ni ku tshamiwa enhan’wini hi vanghana va mavunwa. Hikwalaho ka swilo leswi hinkwaswo, Yobo a a pfa a vula marito yo huma endleleni. (Yobo 6:3) Kambe Xikwembu xi langute swiyimo swa kona. (Yobo 35:15) A xi tiva leswi nga embilwini ya Yobo kutani xi n’wi nyike ndzayo leyi faneleke. Sweswo xi swi endla ni le ka hina namuntlha.

Castro wa le Mozambhiki, a a ri ni malembe ya khume ntsena loko mana wakwe a fa. Sweswo swi n’wi hete mongo. U tivutisile a ku: “Ha yini a fe a hi siya?” Hambileswi a a kurisiwe hi vatswari lava chavaka Xikwembu, mhaka leyi yi n’wi pfuvapfuve mianakanyo. Xana a a ta chaveleriwa hi yini? U chaveleriwe hi ku hlaya Bibele leyitsongo ya Xichewa a bula ha yona ni vabuti wakwe.

Hakatsongo-tsongo, Castro u sungule ku swi vona leswaku mana wakwe a nga dlayiwanga hi Xikwembu, kambe u fe hikwalaho ka ku nga hetiseki loku hi tswariweke na kona. (Varhoma 5:12; 6:23) Xitshembiso xa Bibele xa ku pfuxiwa ka vafi xi n’wi chavelele ngopfu hikuva a ku ta va yona ntsena ndlela ya ku tlhela a vona mana wakwe. (Yohane 5:28, 29; Mintirho 24:15) Lexi hlomulaka mbilu, tata wakwe na yena u file endzhaku ka malembe ya mune. Kambe Castro a swi n’wi tikelanga ngopfu ku langutana ni ku lahlekeriwa hi mutswari wa vumbirhi. Namuntlha u rhandza Yehovha naswona u n’wi tirhela hi ku tshembeka. Un’wana ni un’wana loyi a n’wi tivaka wa swi xiya leswaku u tsakile.

Vo tala lava feriweke hi vanhu lava va va rhandzaka va chaveleriwa hi ntiyiso wa Bibele lowu chaveleleke Castro. Van’wana lava voneke maxangu hikwalaho ka swiendlo swa vanhu vo homboloka va tivutisa xivutiso lexi Yobo a tivutiseke xona: “Hikwalaho ka yini lavo homboloka va hambeta va hanya?” (Yobo 21:7) Loko vanhu va yingisa leswi Xikwembu xi swi vulaka loko xi hlamula xivutiso xexo eRitweni ra xona, va dyondza leswaku ndlela leyi Xikwembu xi tamelaka timhaka ha yona yi vuyerisa vona.—2 Petro 3:9.

Barbara wa le United States, a nga kulelanga endhawini leyi nga ni nyimpi. Kambe u kule hi nkarhi lowu matiko yo tala a ma ri enyimpini. Swiviko swa tihanyi ta nyimpi a swi humesiwa siku na siku. Loko a ha ri exikolweni, u dyondze hi swiendlakalo swa matimu leswi humeleleke hi tindlela leti a ti nga languteriwanga hi munhu. Xana a swi vangiwa hi yini? Xana Xikwembu a xi khathala hi leswi a swi humelela? A a pfumela leswaku Xikwembu xi kona, kambe a a tivutisa swo tala hi xona.

Hambiswiritano, ndlela leyi Barbara a a languta vutomi ha yona yi cincile hakatsongo-tsongo loko a tolovelana ni Timbhoni ta Yehovha. U ti  yingiserile a tlhela a dyondza Bibele na tona. U ye eminhlanganweni eHolweni ya Mfumo. U tlhele a ya ni le ka wun’wana wa mintsombano ya tona leyikulu. Ku tlula kwalaho, loko a vutisa swivutiso eka Timbhoni to hambana-hambana, a a nga kumi tinhlamulo leti kanetanaka. Ku ri na sweswo, Timbhoni a ti vulavula mhaka yin’we hileswi tidyondzo ta tona ti sekeriweke eBibeleni.

Timbhoni ti n’wi kombe vumbhoni bya le Bibeleni bya leswaku misava yi lawuriwa hi Sathana Diyavulosi, naswona yi fambisana ni moya wakwe. (Yohane 14:30; 2 Vakorinto 4:4; Vaefesa 2:1-3; 1 Yohane 5:19) Ti hlamusele leswaku swiendlakalo leswi a swi karhata Barbara swi profetiwile eBibeleni. (Daniyele, tindzima 2, 7 na 8) Xikwembu xi swi vule swi nga si endleka hileswi xi kotaka ku vona swilo ka ha ri emahlweni loko xi swi lava. Swin’wana swa swiendlakalo sweswo swi vangiwe hi Xikwembu. Swin’wana xi lo swi pfumelela ntsena. Timbhoni ti kombe Barbara leswaku Bibele yi tlhele yi profeta swiendlakalo leswinene ni leswo biha swa le nkarhini wa hina, yi hlamusela ni leswi swi vulaka swona. (Matewu 24:3-14) Ti n’wi kombe switshembiso swa Bibele swa misava leyintshwa yo lulama, leyi eka yona ku nga ta ka ku nga ha vi na ku xaniseka.—2 Petro 3:13; Nhlavutelo 21:3, 4.

Hakatsongo-tsongo Barbara u sungule ku twisisa leswaku hambileswi ku xaniseka ka vanhu ku nga vangiwiki hi Yehovha Xikwembu, a nga sindzisi vanhu ku yingisa milawu ya yena leswaku va balekela ku xaniseka. (Deteronoma 30:19, 20) Xikwembu xi endle malunghiselelo ya leswaku hi hanya hi masiku hi tsakile, kambe sweswi xi hi nyika nkarhi wo kombisa loko hi ta hanya hi ku fambisana ni tindlela ta xona to lulama. (Nhlavutelo 14:6, 7) Barbara u endle xiboho xa ku dyondza swilaveko swa Xikwembu ni ku hanya ha swona. U tlhele a lemuka leswaku Timbhoni ta Yehovha ti ni rirhandzu leri Yesu a vuleke leswaku a ri ta fungha valandzeri vakwe va ntiyiso.—Yohane 13:34, 35.

Na wena ma nga ku pfuna malunghiselelo lama n’wi pfuneke.

Vutomi Lebyi Nga Ni Xikongomelo

Hambi ku ri lava va vonakaka swi va fambela kahle evuton’wini va nga va va lava tinhlamulo ta swivutiso leswi va karhataka. Hi xikombiso, jaha ra le Britain leri vuriwaka Matthew a ri swi hisekela swinene ku tiva Xikwembu xa ntiyiso ni xikongomelo xa vutomi. Loko Matthew a ri ni malembe ya 17 hi vukhale u feriwe hi tata wakwe. Endzhaku Matthew u kume digri ya vuyimbeleri eyunivhesiti. Kutani u ye a swi vona leswaku ku hlongorisa ka yena swilo leswi vonakaka a swi pfuni nchumu. U suke ekaya a ya tshama eLondon kutani a sungula ku tirhisa swidzidzirisi, a ya eswinkhubyanini swa nivusiku, a hlanganyela evungomeni bya swilo swa le mpfhukeni, Vubudha bya Zen ni swilo swin’wana—hinkwaswo leswi a swi endlela ku kuma vutomi lebyi enerisaka. Hi ku vona leswaku se a ri n’wi xela kambirhi, u huwelele eka Xikwembu leswaku xi n’wi pfuna ku kuma ntiyiso.

Endzhaku ka masiku mambirhi Matthew u hlangane ni munghana wa yena wa khale a n’wi hlamusela maxangu ya yena. Wanuna loyi a a dyondzeriwe hi Timbhoni ta Yehovha. Loko Matthew a hlayeriwa 2 Timotiya 3:1-5, u sale a hlamele loko a twa ndlela leyi Bibele yi tiyiseke ha yona loko yi hlamusela xiyimo xa misava leyi hi hanyaka eka yona. Loko a hlaye Dyondzo ya le Ntshaveni, yi n’wi khumbe mbilu. (Matewu, tindzima 5-7) Eku sunguleni a a kanakana ku ya eminhlanganweni eHolweni ya Mfumo ya kwalaho hileswi a a hlaye mhaka yo karhi leyi a yi onha Timbhoni ta Yehovha vito, kambe u hetelele a yile.

Matthew u tsakele leswi a swi tweke kutani a sungula ku dyondza Bibele ni nkulu un’wana wa le vandlheni. U hatle a swi lemuka leswaku leswi a swi dyondzaka hi swona leswi a a lava swona, a ku ri nhlamulo ya xikhongelo xakwe eka Xikwembu. U vuyeriwile swinene loko a tshike mikhuva leyi Yehovha a yi nyenyaka. Loko a hlakulele langutelo lerinene ra ku chava Xikwembu, u susumeteleke ku hanya hi ku pfumelelana ni milawu ya Xikwembu. Matthew u dyondze leswaku vutomi byo tano byi ni xikongomelo hakunene.—Eklesiasta 12:13.

A swi kunguhatiwanga hi munhu leswaku Matthew kumbe van’wana lava ku vulavuriweke ha vona eka xihloko lexi va kuma vutomi lebyi tsakisaka. Kambe va dyondze leswaku Yehovha Xikwembu u ni xikongomelo lexinene lexi khumbaka  hinkwavo lava tiendlelaka xiboho xa ku yingisa milawu ya yena. (Mintirho 10:34, 35) Xikongomelo xexo xi katsa vutomi lebyi nga heriki emisaveni leyi nga riki na nyimpi, vuvabyi, ndlala hambi ku ri rifu. (Esaya 2:4; 25:6-8; 33:24; Yohane 3:16) Xana hi yona misava leyi u yi lavaka? Loko swi ri tano, u nga dyondza swo tala malunghana ni ku kuma ndlela leyi yisaka evuton’wini lebyi enerisaka, hi ku ya eminhlanganweni ya le Holweni ya Mfumo ya Timbhoni ta Yehovha, laha ku tirhisiwaka Bibele. Hi ku rhamba hi mbilu hinkwayo leswaku u endla sweswo.

[Xifaniso lexi nga eka tluka 7]

Khongela eka Xikwembu hi mbilu hinkwayo, u tirhisa vito ra xona

[Xifaniso lexi nga eka tluka 7]

Dyondza Bibele ni lava va dyondzisaka leswi yi vulaka swona

[Swifaniso leswi nga eka tluka 7]

Yana eminhlanganweni eHolweni ya Mfumo

[Laha Xifaniso Xi Humaka Kona eka tluka 4]

Hiker: Chad Ehlers/Index Stock Photography