Fetela kwa tshedimosetsong

A go Lebeletswe Gore ke Nne Mosupi wa ga Jehofa fa ke Ithuta Baebele le Bone?

A go Lebeletswe Gore ke Nne Mosupi wa ga Jehofa fa ke Ithuta Baebele le Bone?

Nnyaa, ga o patelesege go dira jalo. Batho ba le bantsi ba ithuta Baebele le rona ntle le gore ba nne maloko a diphuthego tsa rona. * Boikaelelo jwa rona ke go bontsha batho se Baebele e se rutang. Go tswa mo go wena gore o tla dirang fa o setse o itse gore Baebele e ruta eng. Re dumela gore motho ke ene a itirelang tshwetso.—Joshua 24:15.

A nka dirisa Baebele ya me ka nako ya fa re ithuta?

Ee. Le fa re rata go dirisa Baebele ya Thanolo ya Lefatshe ya Dikwalo Tse di Boitshepo ka gonne e dirisa puo ya bosheng, re ka go naya Baebele eo mahala fa o e batla, mme gone re ka itumela thata fa o dirisa Baebele ya gago. O kgona go ithuta molaetsa wa Baebele mo thanolong nngwe le nngwe ya Baebele.

Goreng lo ithuta le batho mme ba sa nne Basupi ba ga Jehofa?

  • Re dira seno ka ntlha ya go bo re rata Jehofa Modimo ka gonne o batla gore Bakeresete ba rute batho ba bangwe dilo tse ba di ithutileng. (Mathaio 22:37, 38; 28:19, 20) Re go tsaya e le tlotla e kgolo go nna “badirimmogo le Modimo” go thusa batho go ithuta Lefoko la gagwe.—1 Bakorintha 3:6-9.

  • Gape re dira seno ka gonne re rata baagelani ba rona. (Mathaio 22:39) Re itumelela go ruta ba bangwe ka dilo tse di molemo tse re ithutileng tsone.—Ditiro 20:35.

^ ser. 2 Fa re leba dipalopalo tsa rona tsa ngwaga wa 2018, re ile ra tshwara dithuto tsa Baebele di le 10 079 709 kgwedi le kgwedi, ka dinako tse dingwe re balela batho ba le mmalwa ka nako e le nngwe. Mme ke batho ba le 281 744 fela ba ba ileng ba kolobediwa go nna Basupi ba ga Jehofa.