U Hiihii hen Timoteu 5:1-25
5 De zôhôn a organden ga,+ kpa lamen a nan kundu kundu er nan ngu teru nahan; lamen a agumaior er ka anmgbianev ou mba hen tsombor nahan,
2 kasev mbaganden di er ka ungôôv ou nahan, agumaukase er ka anmgbianev ou mba kasev mba hen tsombor nahan, a ishima i wang.
3 Eren kwagh a kasevmbacôgholov mba ve lu icôghol jim jim* la+ sha icivir.*
4 Kpa aluer kwasecôghol nan ngu a ônov shin ônov mba ônov mba nan yô, ve̱ hii henen u civir Aôndo hen uya vev,+ man u kimbin mbamaren vev kua mbamaren vev mba tamen kwagh u i gbe u vea kimbin ve la,+ gadia kwagh ne ka kwagh u vough sha ishigh ki Aôndo.+
5 Kwasecôghol u nan lu icôghol jim jim shi nan lu ken ibanave yô, ka nan veren ishima i nan hen Aôndo+ shi nan eren mbamsen mba zamber tugh man atetan.+
6 Kpa kwase u nan ne ishima i nan cii sha kwagh u asaren a iyolough yô, nan ngu kpenegh, shin er nan lu uma nahan kpaa.
7 Nahan, za hemen u wan ve kwagh sha akaa ne, sha er vea lu a iti i bo ga yô.
8 Jighilii yô, aluer or ngu nengen sha ior mba nan ga, hemban je yô, mba hen ya u nan yô, nan kera na jighjigh a akaa a se ne jighjigh a mi la ga, nahan nan hemba gban kera a or u nan ne jighjigh ga yô.+
9 Kwasecôghol u nan yen anyom 60 ga yô, i̱ wa nan ken mba i gbe u a wasen ve la, aluer yange nan lu kwase u lun a nom môm,
10 shi i fa nan sha kwagh u ityom i dedoo yô;+ aluer yange nan yese ônov,+ shi nan ngohol ior sar sar,+ shi nan ôôn uicighanmbaiorov angahar,+ shi nan wasen mba kwagh a tser ve,+ shi nan na iyol i nan sha u eren hanma tom u dedoo yô.
11 Kpa kasevmbacôgholov mba ve lu agumaukase yô, de we ve ken mba i gbe u a wasen ve la ga, gadia isharen ve i yaven a or la ka ia va na a̱ hingir ve ican u eren Kristu tom yô, ve soo u eren nom.
12 Nahan a na ve ibo sha ci u ve undu jighjigh u nan u yange ve tese* sha hiihii la.
13 Heela tseegh ga, shi ka ve va hingir u teman ave ave, ve gbaa zenden sha uya mba iorov tsô; man ka ve tema ave ave tseegh ga, kpa ka ve eren angereke shi ve waan ave sha akaa a ior kpaa,+ ve lamen sha akaa a ma ve lam sha mi ga yô.
14 Sha nahan yô, sarem u kasevmbacôgholov mba ve lu agumaukase la ve̱ er noov,+ ve̱ mar ônov,+ ve̱ nengen sha uya vev, ve̱ de eren kwagh u una na orhendankwagh una lam sha a vese dang ga.
15 Jighilii yô, mbagenev vande undun mimi kera, mba dondon Satan.
16 Aluer kwase u nan jighjigh nan ngu a anmgbianev hen tsombor mba ve lu kasevmbacôgholov yô, nana̱ wasen ve sha er ikyav a yuhwa tiônnongo ga yô. Nahan tiônnongo di una wasen kasevmbacôgholov mba ve lu icôghol jim jim* la.+
17 I̱ nengen mbatamen mba ve hemen sha gbenda u dedoo la+ ér ve kuma icivir kpishi je,+ hemban je yô, mba ve eren tom kpoghuloo sha u lamen shi tesen la.+
18 Gadia ruamabera kaa ér, “De we bua kper sha zwa zum u a lu shoghor samuyia ga.”+ Shi, “Ortom kuma injar i nan.”+
19 De gbe lumun a kwaghbo u i kaa ér organden* nan er tsô ga, saa u fa mimi u kwagh shon hen mbashiada uhar shin utar.+
20 Kôôm+ mba ve eren isholibo la+ sha ishigh ki ior cii, sha er a lu icintan hen mbagenev cii* yô.
21 M ngu kaan a we sha ishigh ki Aôndo man Kristu Yesu kua mbatyomov mba Aôndo a tsough la mer, vande tôvon sha akaa ne vighe vighe cii man u tsua kwagh u u er ye, a u sangen a sange shio.+
22 De torough u pendan ave sha ma or ga;*+ de nyer iyol ken asorabo a mbagenev kpaa ga; za hemen u lun a ieren i wang.
23 De kera me mngerem ga,* kpa maan wain cuku cuku, sha ci u iyav ou kua angev mbu ka u gbaan fele fele la.
24 Ka i fa asorabo a mbagenev ken igbar, nahan i na ve ibo ave ave, kpa a mbagenev yô, ka i va fa a ken hemen.+
25 Kape ityom i dedoo kpa i fe i ken igbar je la,+ i i fe i ga la kpa ia zer lun myer ga.+
Ngeren mba shin kpe
^ Shin “mba kwagh a ban ve sha mimi”; ka, mba ve lu a or môm u wasen ve ga je la.
^ Shin “sha ikyo i wan.”
^ Shin “iceghzwa i yange ve er.”
^ Shin “mba kwagh a ban ve sha mimi”; ka mba ve lu a or môm u wasen ve ga je la.
^ Shin “ortamen.”
^ Shin “sha er mbagen cii vea cia.”
^ Ka u torough veren or sha ma iantom ken tiônnongo je la.
^ Shin “de kera me mngerem tseegh ga.”
