U Hiihii hen Timoteu 1:1-20
1 Mo Paulu, i yilam ér m lu apostoli u Kristu Yesu sha iniezwa i Aôndo, Oryiman wase, man sha iniezwa i Kristu Yesu, un u a lu ishimaverenkeghen yase la,+
2 m ngu ngeren hen Timoteu,*+ wan wam u mimi+ sha kwagh u jighjigh u nan:
Aôndo Ter man Kristu Yesu Ter wase ve̱ tese u erdoo u hemban shi ve̱ zungwe u mhôônom shi ve̱ na u bem.
3 Er yange m vande wan we kwagh mer lu hen Efese zum u m lu kohol iyol u zan ken Masedonia la nahan, hegen kpa m ngu wan we kwagh mer, venda kwagh a mbagenev ve̱ de tesen ityesen igen kposo ga,
4 shi ve̱ de veren ato sha akaa a aiegh a ior ve ôron la ga,+ man sha icombor i ôron kpaa ga. Kwagh u injaa môm dugh ken ambaakaa la ga,+ kpa ka a na ior ve hingir u ôron agbilinakaa di tsô, nga ve a kwagh môm u a dugh hen Aôndo sha kwagh u jighjigh u nan ga.
5 Jighilii yô, awashima u kwagh u m kaa mer er* ne yô, ka u ma se tesen dooshima+ a ishima i wang man a imoshima i wang man a jighjigh u nan+ u lun a atseregh ga.
6 Mbagenev de u eren akaa ne, nahan ve hingir u ôron agbilinakaa.+
7 Ka ve soo ér ma ve lu mbatesenatindi,+ kpa ve gema ve kav akaa a ve ôron la ga, shin akaa a ve sendegh sha mi ngeegh la kpaa ga.
8 Se fa, Tindi ka kwagh u dedoo, aluer or ngu dondon un tsembelee* yô,
9 gadia i wa tindi ka sha ci u orperapera ga, kpa ka sha ci u mbavendanatindi+ man mbahembanato, kua mbacivir Aôndo ga man mbaasorabo, man mbaeren kwagh a ior sha mimi* ga, man mba hôngor icighankwagh, man mbawuan uter man mbawuan ungô man mbawuanior,
10 man mbaeren idya* man nomso mba yaven a nomso, man mbakôron ior sha igyosor yemen a mi, man mbaeren aie man mba bumun sha aie kua hanma kwagh u a hendan a ityesen i wang,*+
11 i sha kwagh u loho u dedoo u iengem, u Aôndo u sar sar, ú i wem sha ikyev la cii.+
12 M wuese Kristu Yesu Ter wase, un u a nem agee la, sha er a nengem a mimi iyol, nahan a nem tom yô,+
13 shin er yange m lu or u lahan Aôndo shi tôvon ior a ican, shi m lu or u lahan ior nahan kpaa.+ Kpa i zungwem mhôônom, sha ci u m lu eren akaa la sha lan man a jighjigh u nan shio.
14 Kpa Ter tesem erdoo u hemban shi a wasem m ngu a jighjigh u nan man dooshima u a lu ken Kristu Yesu la.
15 Kwaghôron ne ka u mimi shi a kuma u a lumun un a ishima i môm: Kristu Yesu yange va shin tar u va yiman mbaasorabo.+ Ken a ve cii, ka mo m hembe lun orisholibo ye.+
16 Nahan kpa, i zungwem mhôônom, sha er Kristu Yesu una tese ishimawan na cii sha ikyev yam, mo u m hembe lun orisholibo ne, una na me hingir ikyav hen mba vea na un jighjigh sha u zuan a uma u tsôron la yô.+
17 Nahan icivir man iengem i̱ lu i Tor u tsôron,+ u kpen mayange ga,+ u i nengen a na ga,+ a lu Aôndo tswen la,+ zan zan gbem sha won. Amen.
18 Timoteu wan wam, kwagh u m kaa mer er* ne zua sha akaaôron a profeti a yange i ôr sha a we la; ka sha akaaôron ne u za hemen u nôngon ityav mbi dedoo,+
19 u lu a jighjigh u nan man imoshima i wang,+ i mbagenev ve te kera ve, tso a ur a ve sha kwagh u jighjigh u nan la ye.
20 Mbagenev ken a ve yô, ka Hameneu+ man Alekezanda; m na ve sha ikyev i Satan+ sha u i̱ tsaha ve, ve̱ hen kwagh, ve̱ de lahan Aôndo ga yô.
