Kroniku u Hiihii 21:1-30
21 Tsô Satan* mough gba nôngon kwagh a Iserael, nahan a mgbegha Davidi ér a ôr iyenge i Iserael.+
2 Davidi maa kaa a Yoabi+ man mbahemenev mba ior ér: “Za, za ôr nen iyenge i Iserael, hii hen Bersheba zan zan nyôr Dan;+ maa hide va ôrom nen, sha er me fa iyenge ve yô.”
3 Kpa Yoabi gema kaa ér: “Yehova a seer iyenge i ior nav kwa 100! Terem tor, ve cii vande mban mbatomov mba terem gaa? Er nan ve terem a soo u eren kwagh nee? A er nan ve u na Iserael una er isholibo nahana?”
4 Kpa kwaghôron u tor hemba taver a kwaghôron u Yoabi. Tsô Yoabi due zende ken Iserael cii, been yô, a hide ken Yerusalem.+
5 Yoabi maa na Davidi iyenge i ior mba i nger ati a ve la. Iserael cii lu a nomso mba lun a sanker 1,100,000, ior i Yuda di gema lu a nomso mba lun a sanker 470,000.+
6 Kpa Levi man Benyamin yô, i ôr iyenge ve ga,+ sha ci u kwaghôron u tor lu Yoabi kwagh u ndôhôr ishima.+
7 Kwagh ne vihi Aôndo u mimi kpishi, nahan a tsaha Iserael.
8 Davidi maa kaa a Aôndo u mimi ér: “M er isholibo+ i vesen sha kwagh u m er ne. Hegen wea lumun yô, de wanye wou a kwaghbo,+ gadia m er kwagh sha ibume kpishi.”+
9 Tsô Yehova kaa a Gadi,+ ornengen Davidi mbampase la ér:
10 “Za, za kaa Davidi wer, ‘Ka kwagh u Yehova a kaa ne, ér: “Tsua kwagh môm ken akaa a atar ne, u m va a mi sha a we yô.”’”
11 Tsô Gadi va hen Davidi va kaa a na ér: “Ka kwagh u Yehova a kaa je ne, ér: ‘Tsua kwagh u u soo yô;
12 u soo wer ijen i gba anyom atar shinii,+ u soo wer u yevese mbahyomov ou iwer itiar er sanker u mbahyomov ou una gberen we la,+ shin u soo wer Yehova a va a sanker na ayange atar—nahan bouange a lu sha tar ne+—shi ortyom u Yehova a va a mtim+ sha haregh u Iserael ciili?’ Nahan hen sha kwagh u me za ôr Un u a tindim la yô.”
13 Davidi maa kaa a Gadi ér: “Ishima zam iyol sha kwagh ne tsung. Wea lumun yô, de Yehova a tsaham, sha ci u zungu mhôônom kpishi;+ kpa de den wer orumace nana tsaham ga.”+
14 Tsô Yehova tindi bouange+ va sha Iserael, nahan iorov 70,000 kpe ken Iserael.+
15 Heela tseegh ga, Aôndo u mimi tindi ortyom ken Yerusalem ér a za tim un; kpa ngur nôngon u eren nahan yô, Yehova nenge, maa a vaa afanyô* sha kwaghtseren la,+ nahan a kaa a ortyom u lu van a mtim la ér: “Kuma nahan!+ Shir a uwegh ough inya hegen.” Ortyom u Yehova tile ikyua a vande u gbidyen iyiav u Ornan,+ Oryebushi la.+
16 Davidi kenden ashe sha yô, a nenge ortyom u Yehova tile hen atô u tar man sha, tsua sanker+ lu a mi ken uwe, maa gema hôn vegher u Yerusalem la. Fese je, Davidi man mbatamen mba ve hua akondo a zungwen*+ la gba cir mshim vem inya.+
17 Davidi maa kaa a Aôndo u mimi la ér: “Ka mo yange m kaa mer i ôr iyenge i ior ye gaa? Ka mo m er isholibo ye, shi ka mo m er kwagh u shami ga ye;+ kpa iyôngo ne yô—ka nyi i ere? Yehova Aôndo wam, wea lumun yô, tsaham a tsombor u terem tseegh; de ve a ican ne sha ior ou ga.”+
18 Tsô ortyom u Yehova kaa a Gadi+ ér a za kaa Davidi a kôndo a za maa Yehova atse a nan nagh, sha vande u gbidyen iyiav u Ornan, Oryebushi la.+
19 Davidi maa kôndo za, er Gadi ôr ken iti i Yehova nahan.
20 Ornan lu gbidyen alakema hen shighe ne, gem ashe yô, a nenge a ortyom, maa ônov nav mba nomso mba unyiin mba ve lu vea na la yer.
21 Davidi ngur kôndon van hen Ornan yô, a ta ashe a nenge a Davidi, maa fese je a mough hen vande u gbidyen iyiav la, a va gure Davidi inya, a wa ityough inya.
22 Davidi kaa a Ornan ér: “Teem* inya i hen vande u gbidyen iyiav la, sha er me maa Yehova atse a nan nagh her yô. Teem sha ishe i inya shon i kom sha mi la cii, nahan bouange u a ve sha ior la una bee yô.”+
23 Kpa Ornan kaa a Davidi ér: “Tôô i i hingir i you, terem tor a er kwagh u a nenge i doo un la.* Nenge, m ngu nan we ibua i nan nagh ku nanden, man kpande u gbidyen iyiav+ sha ci u keer usu a mi, man alakema u nan nagh ku sha samuyia. M na u akaa ne cii.”
24 Nahan kpa, Tor Davidi kaa a Ornan ér: “Ei, me yam sha ishe i inya shon i kom sha mi la cii, sha ci u me fatyô u tôôn kwagh wou nan Yehova shin nan iniav mbi nanden a u kimbin kwagh sha mi shio ga.”+
25 Nahan Davidi na Ornan zanaria yuhwa kuma ushekel* 600 sha inya la.
26 Tsô Davidi maa Yehova atse a nan nagh,+ a na iniav mbi nanden man iniav mbi bem her, shi a yila Yehova ungwa un, nahan a tindi usu+ sen sha va hia iniav mbi sha atse la.
27 Tsô Yehova kaa a ortyom la+ ér a hide a sanker na a wa ken var.
28 Davidi nengen hen shighe ne ér Yehova ungwa un hen vande u gbidyen iyiav u Ornan Oryebushi la yô, a za hemen u nan nagh her.
29 Nahan kpa, hen shighe ne tabernakel u Yehova u Mose er ken taaikyôngo la, man atse a nanden nagh lu sha ijiir i taven hen Gibeon.+
30 Kpa Davidi fatyô u zan her za pinen Aôndo kwagh ga, sha ci u lu cian sanker u ortyom u Yehova.
