Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 24

Paul Writes to the Congregations

Paul Writes to the Congregations

Uwashika mba Paulu nger iniongo i Kristu la taver i asema

YANGE gba u nongo u Kristu u i sember la ua er tom u injaa sha u kuren awashima u Yehova. Kpa fese nahan, mtev u sha ican mough sha Mbakristu mba ken derianyom u hiihii la. Nahan ve za hemen u civir Aôndo sha mimi ken tôvacan la kpa? Man zum u mbamzeyol mba ken myer due her atô ve nahan, ve civir Aôndo heregh kpa? Ruamabera u ken Zwa Grika la lu a uwashika 21 mba i nger sha u wan Mbakristu kwagh shi taver ve asema kpaa yô.

Apostoli Paulu yange nger uwashika mban pue kar unyiin, hii sha Mbaromanu zan zan Mbaheberu. Yange i yilan uwashika mba i nger la sha ati a mba i nger ve uwashika mba shon la, er ati a ior asange asange nahan, shin iti i nongoior u ken ma nongo u Kristu. Nenge ase akaa agen a Paulu yange nger ken uwashika nav la.

Kwaghwan sha kwagh u aeren man anza a dedoo. Mbaerenijimba man mbaidyarev kua asorabo a vesen agen “vea ya dyako u tartor u Aôndo ga.” (Mbagalatia 5:19-21; 1 Mbakorinte 6:9-11) Gba u mbacivir Aôndo vea lu ken mzough, vea lu ior mba hen tar môm ga je kpaa. (Mbaromanu 2:11; Mbaefese 4:1-6) Gba u vea na ayol a ve sar sar sha u wasen mbananjighjigh a ve imôngo mba ve soo iwasen la. (2 Mbakorinte 9:7) Paulu yange kaa ér: “Eren nen msen gbem.” (1 Mbatesalonika 5:17; 2 Mbatesalonika 3:1; Mbafilipi 4:6, 7) Saa se eren msen sha jighjigh u nan keng ve Aôndo una ungwa mbamsen asev ye.—Mbaheberu 11:6.

Kanyi ia wase icombor u lun ken mzougho? Gba u kasev vea doo noov vev ishima er ayol a ve nahan. Kasev kpa gba u vea naan noov vev icivir tsung. Ônov vea ungwan imo i mbamaren vev, gadia ka kwagh u Aôndo a soo je la. Doo u mbamaren vea yar tom a akaawan a a lu ken Mkaanem ma Aôndo la sha u tesen ônov vev shi yesen ve sha dooshima kpaa.—Mbaefese 5:22–6:4; Mbakolose 3:18-21.

I ôr Mbakristu akaa a wasen ve u kaven awashima u Aôndo. Akaa kpishi a yange i ôr ken Tindi u Mose la lu sha u kuran Mbaiserael shi tesen ve akaa a vea eren zan zan mve u Kristu yô. (Mbagalatia 3:24) Nahan kpa, Mbakristu yô gba u vea kuran Tindi u Mose la keng ve vea tese ér mba civir Aôndo ga. Zum u Paulu nger Mbaheberu, Mbakristu mba ve lu Mbayuda la, a ta ve iwanger sha kwagh u Tindi u Mose man er awashima u Aôndo a kur sha Kristu yô. Paulu pase ér akaa kpishi a yange i eren ken Tindi la tile sha kwagh u ken hemen. U tesen ikyav yô, iniav mbi i naan sha ishôso la tsenga tesen er Yesu una na nagh sha iyol na  zum u una kpe la, man nagh ku shon ku a na á de se asorabo ase sha mimi. (Mbaheberu 10:1-4) Ku u Yesu kpe la na yô, Aôndo de kwagh u ikyuryan i Tindi u Mose la, gadia ikyuryan ne kera lu a inja ga.—Mbakolose 2:13-17; Mbaheberu 8:13.

Kwaghwan sha kwagh u gbenda u eren akaa ken nongo u Kristu sha inja. Nomso mba ve soo u lun a ityom ken nongo u Kristu cii, gba u vea lu a aeren a dedoo shi vea kuma sha akaa a Bibilo i er sha kwagh u ambaaior la. (1 Timoteu 3:1-10, 12, 13; Titu 1:5-9) Gba u mbacivir Yehova Aôndo vea kohol imôngo a mbananjighjigh mbagenev sha u taver ayol a ave asema. (Mbaheberu 10:24, 25) Doo u a eren mbamkombo mba civir Aôndo sha gbenda u maan a maa mbagenev shi tesen ve kpaa.—1 Mbakorinte 14:26, 31.

Sha shighe u Paulu nger washika na u sha uhar hen Timoteu la, apostoli ne hide ken Roma; i wa un ken gaadi, lu keghen ijirôron na. Lu ior mba taver asema kpuaa tseegh za sôr Paulu hen shighe ne ye. Paulu fa er shighe na kera vese ga yô. Nahan a kaa ér: “M nôngo ityav mbi dedoo ve. M kure ayem am vough, m saa a jighjigh u nan.” (2 Timoteu 4:7) A shi nan kpa, Paulu yange ôr mkaanem man ica gba ga maa i wua un sha ci u jighjigh na u nan. Zan zan hegen kpa, uwashika mba apostoli ne nger la mbá wasen mbacivir Aôndo kpishi je.

I zua a kwagh u i nger heen ne ken takerada u Mbaromanu man Mbakorinte u Hiihii man u sha Uhar kua Mbagalatia man Mbaefese man Mbafilipi man Mbakolose man Mbatesalonika u Hiihii man u sha Uhar kua Timoteu u Hiihii man u sha Uhar man Titu man Filemon kua Mbaheberu.