Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 4

God Makes a Covenant With Abraham

God Makes a Covenant With Abraham

Aberaham yange tese jighjigh u nan sha u ungwan imo i Aôndo, nahan Yehova tôndo zwa ér una ver un doo doo, una na un ônov kpishi

AÔNDO yange tim tar sha mnger sha ayange a Noa la anyom kar kuma er 350 nahan. Hen shighe la tertamen Aberaham lu ken gar u Ur, ken tar u i yer hegen ér Iraq la. Gar ne lu a inyaregh kpishi. Aberaham lu orjighjigh u numben a mi ga. Yange i kar jighjigh na u nan la.

Yehova kaa a Aberaham ér a̱ due ken tar na a yem ken tar ugen, man tar shon yô lu Kanaan. Aberaham er kwagh u Yehova kaa un la fese. A mough a kwase na Sarai man Loti, wan u anngô na kua mbashiren un kpishi ve zende gôgô zende ve yem ken tar u Kanaan, keela la Aberaham za hingir or u tsan ken tenti. Yehova yange ya ikyur a Aberaham. A tôndo zwa a na ér una er un una hingir ikyurior i vesen man ka ken a na je akuraior a sha won cii aa zua a iveren ye, shi una na tsombor na tar u Kanaan.

Aberaham man Loti hingir mbainyarev, ve hingir u lun a iyôngo man abua kpishi. Hen shighe la, Aberaham er kwagh u tesen ér ngu or u keren mtsera na ga. Yange na Loti ian ér a̱ tsua veghertar u a lu sha ishima na cii. Tsô Loti tsôr tar u doon iyiav u ú lu hen Ifi u Yordan la, a za tema a sôsom a gar u Sodom. Kpa, nomsombaiorov mba ken Sodom mbara lu udangmbaiorov mba eren asorabo sha ishigh ki Yehova kpishi.

Shighe kar yô, Aôndo er ityendezwa a Aberaham ér tsombor na ua ngee er asan a sha kwavaôndo nahan. Aberaham na ityendezwa i Aôndo er a na ne jighjigh. Nahan kpa, Sarai kwase u Aberaham u doon un ishima la lu ikyômkwase heregh tsô. Aberaham va kom anyom 99, kwase na di zurum anyom 90 yô, Aôndo kaa a na ér una mar wannomso vea Sarai. Ayange nga kar yô, Sarai mar Isaka er Aôndo kaa nahan. Aberaham lu a ônov mbagenev kpaa, nahan kpa lu u Oryiman u i tôndo zwa ken Eden ér ngu van la una due ken tsombor u Isaka.

Loti vea tsombor na lu ken gar u Sodom, nahan kpa orperapera Loti hingir er udangmbaiorov mba ken gar la ga. Zum u Yehova soo u timin gar u Sodom la, á tindi mbatyomov nav ér ve za ôr Loti kwagh u mtim shon. Mbatyomov mbara kaa a Loti man tsombor na ér ve due ken Sodom kera shi ve de gem ashe ijime ga. Tsô Aôndo er usu man sulfur due haa sha Sodom man gar u mbaaferev ugen u lu ikyua, i yilan ér Gomora la, nahan a tim mba ve lu ken agar la cica cii. Loti war vea ônov nav mbakasev uhar. Kpa kwase u Loti gema ashe ijime, alaghga er nahan sha ci u akaa aa á undu ken gar shon la. Nahan á kpe sha ci u ihyembeato na la.

—I zua a kwagh u i nger heen ne ken Genese 11: 10–19:38.