Mbaefese 5:1-33
5 Sha nahan yô, hingir nen mbakaven Aôndo, sha ci u ne mba ônov nav mba doon un ishima,
2 shi za nen hemen u zenden sha dooshima, vough er Kristu kpa se* doo un ishima shi a ne iyol na sha ci wase,* i lu nagh ku human doon Aôndo nahan.
3 Idya* man nyityôkwagh i wang ga shin hua cii, u teren tsô kpa i de teren hen atô wen ga, vough er i doo u uicighanmbaiorov vea eren nahan;
4 shi palegh nen ieren i kunya man iliam i ibume man asenge a dang kpaa—akaa a a kom sha a ven ga ne—kpa gema sughun nen Aôndo.
5 Gadia ne fa kwagh ne, ne ayol a en ne fa, or u eren idya* shin or u lun wang ga shin or u eren hua, ka or u civir eev je la, nan ngu a ma dyako ken Tartor u Kristu man u Aôndo ga.
6 Or môm nana̱ de tsughun ne sha akaaôron a gbilinigh ga, gadia ka sha ci u akaa ne iyugh i Aôndo i lu van sha ônov mba hemban ato ye.
7 Sha nahan yô, de nyôron nen nongo a ve sha akaa ne ga;
8 gadia yange ne lu ime, kpa hegen ne mba iwanger ken Ter. Za nen hemen u zenden er ônov mba iwanger nahan,
9 gadia ityamegh ki iwanger ki a hanma ieren i dedoo man i perapera man i mimi.
10 Keren nen u fan ishima i Ter* hanma shighe cii;
11 shi dugh nen ave sha ityom i gbilinigh i ken ime la kera, gema pon nen i, i̱ due ken igbar.
12 Gadia akaa a ve eren ken myer la kôr kunya je u teren kpa doo ga.
13 Nahan akaa a i lu duen a mi ken igbar* la cii, ka iwanger i ne ve a lu duen ken igbar ye, gadia hanma kwagh u i lu duen a mi ken igbar cii ka iwanger.
14 Sha nahan yô, i nger ér: “Nder, we or u yaven, nder shin ku, nahan Kristu una ta iwanger sha a we.”
15 Nahan ver nen ishima sha zende wen tsembelee, u de lu er u mbalanenkwagh nahan ga, kpa zenden nen er mbafankwagh nahan,
16 eren nen kwagh a shighe wen sha inja,* sha ci u se mba ken ayange a bo.
17 Sha nahan yô, de kera eren nen kwagh sha ibume ga, kpa keren nen u fan ishima i Yehova.*
18 Shi de hunden nen msôrom ga, dang ngu* ker, kpa za nen hemen u ivin a jijingi.
19 Nea lamen a mô wen* yô, waan nen upasalami kpaa, wuese nen Aôndo, shi waan nen atsam a civir Aôndo, waan nen shi kuhwan nen ityougholov a ishima yen i môm,* sha ci u Yehova,*
20 sughun nen Aôndo Ter wase hanma shighe cii, sha hanma kwagh ken iti i Ter wase Yesu Kristu.
21 Ungwan nen imo i hanmô wen cii sha u cian Kristu.
22 Kasev ve wa ayol a ve sha ikyev i noov vev, er ve we ayol a ve sha ikyev i Ter nahan,
23 sha ci u nom ngu ityough ki kwase u nan, vough er Kristu a lu ityough ki tiônnongo, iyol na i a lu or u yiman i la nahan.
24 Jighilii yô, er tiônnongo a lu sha ikyev i Kristu nahan, kasev kpa ve wa ayol a ve sha ikyev i noov vev sha hanma kwagh cii.
25 Noov, kasev enev ve za hemen u doon ne ishima, vough er Kristu kpa yange tiônnongo doo un ishima ve na iyol na sha ci na* nahan,
26 sha er una wanger un, una ôô un sha mnger, ka mkaanem ma Aôndo je la,
27 sha u tiônnongo shon a engem sha ishigh nagh, a de luun a acan shin a zulugh iyol shin a luun a ambaakaa la nahan iyol ga, kpa a lu wang a acôghor iyol shio yô.
28 Noov kpa kasev vev ve̱ doo ve ishima er iyol ve i doo ve ishima nahan. Or u kwase u nan a doo nan ishima yô, iyol i nan doo nan ishima,
29 gadia mayange je or kôron iyol i nan ihyom ga, kpa nan koson i shi nan we i ikyo, vough er Kristu a eren a tiônnongo nahan,
30 sha ci u se mba alegh a iyol na.
31 “Sha ityôkyaa ne yô, nomsoor nana undu ter u nan man ngô u nan, nana var ken kwase u nan, ve uhar cii vea hingir iyol i môm.”
32 Icighan kwaghmyer ne ngu a inja tsung. M ngu ôron kwagh u Kristu man tiônnongo.
33 Nahan kpa, hanma wen yô, kwase u nan a doo nan ishima er iyol i nan i doo nan ishima nahan; kwase di nana naan nom u nan icivir tsung.
Ngeren mba shin kpe
^ Shin a fatyô u kaan ér, “ne.”
^ Shin a fatyô u kaan ér, “sha ci wen.”
^ Zwa Grika, porneia (ponia). Nenge Ngeren u Pasen Asember.
^ Nenge Ngeren u Pasen Asember, “Idya.”
^ Shin “fan kwagh u Ter a lumun a mi la.”
^ Shin “akaa a i venda.”
^ Shin “yamen nen shighe.”
^ Nenge Ngeren u Pasen Asember.
^ Shin “ibumegh ki.”
^ Shin a fatyô u kaan ér, “Nea lamen a ayol a en.”
^ Shin “ken atô u ishima yen.”
^ Nenge Ngeren u Pasen Asember.
^ Ka, “tiônnongo” je la.
