Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 7

God Delivers the Sons of Israel

God Delivers the Sons of Israel

Yehova va a atsan sha Igipiti, nahan Mose hemen ônov mba Iserael due a ve ken tar la kera. Aôndo na Mbaiserael Tindi sha ikyev i Mose

ÔNOV mba Iserael yange ve tsa ken tar u Igipiti anyom ngee, ve hingir yôughyôugh shi ve mar kpishi. Farao u he tema tor sha ayange la. Tor u he ne fa kwagh u Yosev ga. Lu tor u wan tswam kpishi, man er lu cian Mbaiserael ér mba ngeen iyenge kpishi yô, a gema ve ve hingir ikpan shi a na zwa kpaa ér hanma wannomso u i mar cii yô, i kôr nan i gbihi shin Ifi u Nil nana kpe shimi. Nahan kpa kwase u taver ishima ugen u yange mar yô, gbir anikyundan na shin ikyese, tôô un za yer ken awoo. Wan u Farao u kwase nenge a anikyundan ne, a tôô un, a ii un iti ér Mose, a shi a yese un hen ya u tor u Igipiti.

Zum u Mose lu anyom 40 la, a gba ken mzeyol ugen shighe u lu nôngon kwagh a Origipiti ugen u lu kighir kpan u Iserael ugen a tom yô. Tsô Mose yevese yem ken tar ugen u icaa, za lu shir keregh. Zum u Mose lu anyom 80 la, Yehova tindi un ken Igipiti hen Farao ér a̱ za kaa un yô, a̱ pase ior nav ve due ken tar la kera.

Farao venda inyigh i môm. Nahan Aôndo va a atsan pue sha Igipiti. Hanma shighe u Mose yange una za sha ishigh ki Farao una za ôr kwagh a na sha u a de Mbaiserael ve yem, nahan ican igen i̱ de kera ve sha tar la ga yô, Farao a venda u eren kwagh u Mose man Aôndo na Yehova soo ér a̱ er la. Nahan i va a ican i sha pue la sha tar la, ônovmbaiundav mba ken tar la kpe cica cii, saa mba hen icombor í yange í shighe awambe a iyôngo, a Yehova kaa ér i̱ shighe sha ikpandehunda la tseegh ve war ye. Uya mba í shighe awambe a iyôngo sha ikpandehunda la cii, ortyom u Aôndo tindi un ér a̱ za wua ônovmbaiundav la aver ve kar. Ka been cii yô, Mbaiserael hii u eren iniongo i í yer ér Paseka la sha hanma inyom sha u umbur mwar u kpilighyol u i war ônovmbaiundav vev la.

Er waniunda u Farao kpa saa ku yô, Farao na zwa ér Mose man Mbaiserael cii ve due ken Igipiti kera. Ave ave la je ve kohol zegeikpelaior i Mbaiserael ve due ken tar la kera. Kpa Farao hide vaa afanyô sha mdugh ve ne. Tsô a gba zendan ve ijime a mbautyaav kpishi man akekeautya kpaa. Mbaiserael yem zan zan za nôôr shin kpe Zegemnger u Nyian la, lu inja er ape vea kar a za kera lu ga nahan. Yehova er Zegemnger u Nyian la pav, nahan Mbaiserael zende kar sha tareghnyaagh, mngerem lu ve ken iyan man ken imese er kpekpe nahan! Zum u Mbaigipiti cir ve ijime hungwa shin atô u zegemnger la yô, Aôndo er mngerem mara hide her, tim Farao man akumautya na cica cii.

Ken masejime yô, Mbaiserael za haa afo hen Uwo u Senai, lu hen shighe la Yehova ya ikyur a ve ye. Aôndo gema Mose hingir orhimen, nahan a na Mbaiserael atindi a tesen ve shi kuran ve kpaa. Atindi ne nôngo u benden sha hanma kwagh u orumace nan eren cii. Yange gba u Yehova una lu a Mbaiserael aluer ve dondo hemen na yô, shi una ver akuraior agen doo doo sha ikyev ve.

Kpa Mbaiserael kpishi ban a jighjigh u nan, nahan ve er akaa a vihin Aôndo kpishi. Tsô Yehova er kov la zende ken deserti wue wue anyom 40. Mose maa tsua orperapera Yosua sha u a hingir orhemen sha ityough nagh yô. Ayange nga kar yô, Mbaiserael wa agoyol u nyôron ken tar u Aôndo tôndo zwa a Aberaham ér una na tsombor na la.

I zua a kwagh u i nger heen ne ken takerada u Ekesodu man Levitiku man Numeri man Duteronomi man Pasalmi 136:10-15 kua Aerenakaa 7:17-36.