Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 1

The Creator Gives Man a Paradise

The Creator Gives Man a Paradise

Aôndo gba sha man tar shi er akaauma shin tar; a gba nomsoor man kwase u vough, á ver ve ken sule u doonashe shi á wa ve atindi a vea kuran yô

“SHA hiihii Aôndo gba Sha man tar.” (Genese 1:1) I yila mkaanem ma hiihii ma ken Bibilo man ér, ka mkaanem ma hemban cii ma i lu a vande hiin ma takerada ugen a mi ga yô. Mkaanem ma Bibilo ma ma taver ga, shi ma doo tsung man ôr se kwagh u Or u hemban cii u i er kwagh na ken Icighanruamabera jimin cii la, ka Yehova Aôndo uhembanagee je la. Ivur i Bibilo i hiihii ne pase ér ka Aôndo a gbe usha u a kehe kpishi ne, kua tar u se lu shin u ne kpaa ye. Avur a Bibilo aa a dondo sha ivur i hiihii ne pase ér Aôndo yange tôô gôgôshighe, shin ayange a sha ikyav sôr tar wase ne ér u̱ lu ya wase, lu hen shighe la Aôndo er akaa a doonashe a se nengen a mi shin tar la ye.

Kwagh u hemban cii u Aôndo er shin tar yô, lu orumace. Aôndo er or sha inja i mlu na, nahan lu u nana fatyô u lun a aeren a Yehova iyol na, inja er dooshima man kwaghfan nahan. Aôndo yange gba or sha vuulevu u inyaagh. Aôndo ii un iti ér Adam, maa gema un ver ken paradiso, ken sule u Eden. Lu Aôndo iyol na er sule ne ye, á lôô ikyon i doonashe, í umen atam kpishi ker.

Aôndo nenge ér doo u or nana lu a kwase. Tsô Aôndo dugh hwan môm u Adam, er kwase na un, u i va hingir u yilan un ér Ifa la. Kwagh ne doo Adam kpishi, tsô a wa icam a kaa ér: “Ngun yô, ka kuhe u ikyuhe yam, ka inyam i inyam yam je.” Aôndo pase ér: “Ka sha ci u nahan man or ka nan undu ter u nan kua ngô u nan, nan var ken kwase u nan, ve hingir iyôgh i môm ye.”—Genese 2:22-24; 3:20.

Aôndo yange wa Adam man Ifa atindi ahar. Hiihii yô, á kaa a ve ér, tar u̱ lu sha ikye ve, ve nengen sha u, shi ve mar ve iv tar. U sha uhar yô, Aôndo kaa ér ve de ye ityamegh ki kon ugen ken ikyon i í lu ken sule shon kpishi la ga, ka “kon u mfe u fan kwagh u dedoo man kwagh u bo” je la. (Genese 2:17) Lu u vea hemba un ato yô, vea kpe. Er Aôndo wa nomsoor man kwase la atindi ne yô, Aôndo na ve ian i tesen ér ve lumun hemen na. Shi kwagh ne lu gbenda u tesen ér Aôndo doo ve ishima shi ve wuese kwagh u a er a ve la kpaa. Atôakyaa lu kpishi a vea lumun hemen na u dedoo la yô. Uumace mba lun vough mban lu a mshi ken a ve ga. Bibilo kaa a vese ér: “Aôndo . . . nenge hanma kwagh u Un er yô, lu u doon tsung.”—Genese 1:31.

I zua a kwagh u i nger heen ne ken Genese ityough 1 man 2.