Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Why Examine the Bible?

Why Examine the Bible?

U fa Bibilo tsembelee kpa? Bibilo ka takerada u injaa u ú samber sha tar i hembe hanma takerada ugen yô, hii sha ayange a tsuaa la je zan zan nyian. Loho u Bibilo sur ior mba sha ajiir kposo kposo asema shi na ve ishimaverenkeghen, shi kwaghwan u Bibilo kpa wase ve sha akaa a ve eren ayange ayange la. Nahan kpa, ayange ne ior kpishi fa Bibilo kuma ve ga. Kwaghaôndo una doo u ishima shin una doo u ga kpa, alaghga hange u u̱ fan Bibilo. I nger antakerada ne ér a̱ pase u akaa a vesen a a lu ken Bibilo la.

CII man ú hii u ôron Bibilo yô, doo u ú vande fan akaa a injaa kpuaa sha kwagh u Bibilo. Mba yer Bibilo kpaa ér Icighan Ruamabera. Jighilii yô, Bibilo ka takerada u ú lu a ityakerada i kiriki 66 yô, hii sha takerada u Genese zan zan kure sha Mpase.

Ka an nan lu orngeren Bibiloo? Mpin ne ka u injaa kpen kpen. Doo u se fa ser, yange i nger Ruamabera sha ikyev i iorov mba kuman iyenge er 40 nahan, ken atô u iaven i anyom a kuman er 1,600 nahan. Kpa kwagh u doon yô, nomsombaiorov mba yange i nger Bibilo sha ikyev ve la ta ave vanger ér ka ve ve lu mbangeren Bibilo ga. Orgen ken mba yange i nger Bibilo sha ikyev ve la kaa ér: “Icighanruamabera cii ka Aôndo A ne i nger ye.” (2 Timoteu 3:16) Ugen di kaa ér: “Jijingi u TER ôr kwagh ken a mo, kwaghôron Na kpaa ngu sha nombor wam.” (2 Samuel 23:⁠2) Nahan yô, mba yange i nger Bibilo sha ikyev ve la pase ér ka Yehova Aôndo, tor u sha won cii, u a hembe tswen la, á lu orngeren Bibilo jim jim ye. Ve kaa ér Aôndo soo ér uumace ve lu ikyua a na.

Kwagh u hange hange ugen kpa ngu u una wase se u fan Bibilo yô. Ruamabera jimin cii ngu a itinekwagh i môm. Itinekwagh shon yô, ka i je ne: Tartor u sha la ua bee a ahon a i gbe sha kwagh u ian i Aôndo a lu a mi i hemen uumace la. U ôr antakerada ne tsô u nenge er itinekwagh ne i lu ken Bibilo jimin cii, hii ken Genese zan zan Mpase yô.

Er hegen u fe akaa ne nahan yô, time ase sha loho u Bibilo, i̱ i̱ lu takerada u ú hembe zan gwa sha tar cii la.

^ par. 9 Igbenda i ngeren anyom ngi kpishi. Ken takerada ne yô, anyom a i nger i seer C.S.Y. sha mi la inja na yô ka “Cii man Shighe u Yesu.” I nger anyom ne shin ityô i upeeji mba antakerada ne.