Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 5

God Blesses Abraham and His Family

God Blesses Abraham and His Family

Tsombor u Aberaham za ikyura. Aôndo yima Yosev ken tar u Igipiti

YEHOVA yange fa ér shighe ngu van u Wan na u doon un ishima tsung la una ya ican kpishi shi a wua un kpaa yô. Kwaghôron u profeti u i nger ken Genese 3:15 la pase kwagh ne kpuaa. Gbenda lu u Aôndo una tese uumace er ku u Wan na la ua vihi un kpishi kpa? Bibilo ôr se kwagh u orgen vea wan na u a lu kwagh u sha ikyav yô. Aôndo yange kaa a Aberaham ér a̱ na nagh sha Isaka, wan na u doo un ishima tsung la.

Aberaham lu a jighjigh u nan kpishi. A lu ú umbur yô, Aôndo vande tôndon zwa a na ér Oryiman, shin Vor la ua due ken tsombor u wan na Isaka. Aberaham na jighjigh ér Isaka una kpe kpa Aôndo una nder un, aluer á soo yô, nahan a ungwa imo na, a wa agoyol u nan nagh sha wan na. Kpa Aôndo tindi ortyom ugen za yange Aberaham sha shighe vough. Aôndo wuese Aberaham sha ishima i a lu a mi i nan nagh sha or u hemban doon un ishima la, tsô Aôndo shi kimbir ityendezwa i vande eren a tertamen u lun a jighjigh u nan ne.

Anyom nga kar yô, Isaka mar ônov uhar, Isou man Yakob. Yakob lu er Isou nahan ga, gadia un lu or u veren ishima sha akaa a ken jijingi, nahan zua a injar sha ieren na la. Aôndo yange gema iti i Yakob hingir Iserael. Iserael lu a ônov 12, ônov nav mban hingir uter mba ikwe i Iserael. Kpa tsombor u Iserael ne yange u hingir ikyurior i vesen nena?

Ônov mba Yakob kpishi yange ve kôr Yosev, anngô ve u kiriki la ihyom. Ihyom ve ne lu mhii u akaa a yange er hen shighe la sha adondo adondo yô. Yange ve tee un ken kpan, nahan i yem a na ken tar u Igipiti. Kpa Aôndo ver gumor u lun a jighjigh u nan, u lu tsevaa ne doo doo. Shin er Yosev ya ican kpishi nahan kpa, ken masejime yô, Farao, tor u Igipiti na un tahav kpishi. Kwagh ne yange er sha shighe vough, gadia ijen gba sha ayange la, nahan Yakob tindi ônov nav mbagenev ken Igipiti ér ve za yam kwaghyan, man kwagh ka a er i doo yô, lu Yosev je lu ityough sha kwaghyan u tar la cii ye! Yosev pase iyol na hen anngôôv nav mba ve gema asema la, shi de ve kwaghbo ve, maa tindi ér tsombor u ter na cii u yem ken Igipiti. Yange i tese ve tar u dedoo u vea tema her yô, lu ijiir i vea za hemen u seer ngeen shi vea hingir yôughyôugh kpaa. Yosev kav er lu Aôndo je soo ér kwagh a lu nahan, sha er una kure ityendezwa na yô.

Orbeenyol Yakob lu ken Igipiti vea tsombor na u ú lu ngeen seer a seer la zan zan ku na. Shighe u Yakob lu nôngon ku la, a tsengaôron ér Vor u ityendezwa shin Oryiman la, una lu Tor u ageegh, man a mar un ken tsombor u wan na Yuda. Anyom nga kar ka va kom shighe u Yosev una kpe yô, á ôr kwaghôron u profeti ér iyange ngi van i Aôndo una due a tsombor u Yakob ken tar u Igipiti kera yô.

I zua a kwagh u i nger heen ne ken Genese ityough 20 zan zan 50; Mbaheberu 11:17-22.