Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Ka Hanma Shighe Mkurtar Una Va

Ka Hanma Shighe Mkurtar Una Va

Mlumun u Bibilo i ne yô

Kwagh u una wase u u fan shighe u mkurtar una va yô, saa u kav inja i ishember i Bibilo i yer ér “tar” la. Ishember i ken zwa Grika i i yer ér koʹsmos, i ka i gema ér “tar” la, ashighe kpishi ka i ôron kwagh u uumace, hemban je yô, uumace mba ve vende Aôndo shin ve eren ishima na ga la. (Yohane 15:18, 19; 2 Peteru 2:5) Ashighe agen di yô, ishember i koʹsmos la ka i ôron kwagh u tar u eren yô, er kpenga man pati man kwaghaôndo nahan.—1 Mbakorinte 7:31; 1 Yohane 2:15, 16. *

‘Mkurtar’ ka nyi?

I ter ishember i ‘mkurtar’ la ken Ubibilo kpishi. (Mateu 24:3) Shi Ubibilo mbagenev gema ishember i ‘mkurtar,’ i i ter ken ivur ne la sha igbenda igen kpaa, ér “mkur u akaa a tar u eren la cii,” shin “mkur u kov u uumace u hegen ne.” (New World Translation of the Holy Scriptures; English Standard Version) Ishember ne ngi ôron ka kwagh u mtim u tar u se tem sha u ne shin tsombor u uumace cii ga, kpa ka mkur u hanma kwagh u tar u hegen ne u eren cii.—1 Yohane 2:17.

Bibilo kaa ér “á va tim aferaior kera” sha er a mbaperapera vea tema bem bem sha tar yô. (Pasalmi 37:9-11) Mtim ne una va sha shighe u “zegecan” u una za kuusu sha ityav mbi Armagedon yô.—Mateu 24:21, 22; Mpase 16:14, 16.

Ka hanma shighe mkurtar una va?

Yesu yange kaa ér: “Kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.” (Mateu 24:36, 42) Shi a kaa ér mkurtar una va abur abur, “hen shighe u ne ver ishima ga la je.”—Mateu 24:44.

Er se fe iyange i mkurtar una va la jighilii ga nahan kpa, Yesu gema pase se kwagh u una lu “ikyav,” shin akaa a aa er sha u tesen ér se mba ken shighe u mkurtar a zurum yô. (Mateu 24:3, 7-14) Bibilo yila shighe shon ér “shighe u mkur,” man “ashighe a mkur,” man “ayange a masejime”—Daniel 12:4; God’s Word Bible; 2 Timoteu 3:1-5.

A va tim tar ne kera nahan, ma kwagh ugen una shi here?

Een. Er se vande ôron nahan, tar u se tem sha u ne ua lu her, sha ci u Bibilo tese ér ua “tenger mayange ga.” (Pasalmi 104:5) Shi tar ua iv a ior vough er Bibilo i tôndo zwa nahan, ér: “Mbaperapera vea ya dyako u tar, vea lu ken u gbem.” (Pasalmi 37:29) Shighe la, Aôndo una gema tar kua mlu u uumace cii, una hide a lu er yange wa ishima ér i lu sha hiihii la. Ka mlu shon je ne:

  • Paradiso.— Yesaia 35:1; Luka 23:43.

  • Bem man mkpeyol.​—Mika 4:4.

  • Tom u injaa, u nan hanma or msaanyol.​—Isaiah 65:21-​23.

  • Ior vea kera gbaan angev shin vea been iyol ga.—Yobu 33:25; Yesaia 33:24.

^ par. 3 Ishember i ken zwa Grika i i yer ér ai·onʹ la kpa i gema i ken Ubibilo mbagenev ér “tar.” Ka a gema ishember ne nahan yô, i lu inja i môm a ishember i koʹsmos la, sha ci u ka i ôron kwagh u tar u eren yô.