Hakarak hatene?
Hakarak hatene?
Tanbasá Bíblia temi katak apóstolu Pedro hela iha badain-kulit nia uma antes nia bá hasoru Cornélio?
▪ Istória iha livru Apostolu dehan katak “Pedro hela kleur iha Jope ho Simão, ema badain-kulit ida”, neʼebé hela iha “uma besik tasi”. (Apostolu 9:43; 10:6) Ema judeu hanoin katak serbisu nuʼudar badain-kulit, ka koʼa animál nia kulit mak serbisu neʼebé la moos no la iha folin. Tuir Talmude, serbisu nuʼudar badain-kulit mak aat liu fali serbisu atu hasai animál nia foʼer. Tanba Simão nia serbisu inklui kaer animál nia mate-isin, ida-neʼe bele halo nia la moos nafatin tuir lei kona-ba moos iha isin. (Levítico [Imamat] 5:2; 11:39) Tuir livru balu kona-ba serbisu neʼe, karik Simão uza tasi-been kuandu nia serbisu, no karik ninia serbisu-fatin la besik sidade, tanba serbisu neʼe “dois tebes”.
Maski nuneʼe, Pedro hakarak atu hela iha Simão nia uma. Ida-neʼe hatudu katak Pedro lakohi halo tuir ema judeu nia hanoin neʼebé la loos iha tempu neʼebá kona-ba ema sira-neʼebé la moos. Jesus mós la simu hanoin sala hanesan neʼe.—Mateus 9:11; Lucas 7:36-50.
Jesus nia liafuan “Ita rasik hateten nia” katak sá?
▪ Kuandu ema judeu nia amlulik boot ida naran Caifás, husu Jesus atu fó sai iha ema nia oin se nia mak Kristu, Maromak nia Oan, nia hatán: “Ita rasik hateten nia.” (Mateus 26:63, 64) Jesus nia liafuan sira-neʼe katak sá?
Liafuan sira-neʼe la hatudu katak Jesus lakohi atu hatán ba Caifás nia pergunta. Liafuan “Ita rasik hateten nia” mak liafuan neʼebé ema judeu baibain uza atu hatudu katak buat neʼebé sira koʼalia mak loos. Porezemplu, livru Talmude Jerusalém * koʼalia kona-ba ema neʼebé husu ba ema judeu ida se amlulik judeu ida mate. Ema judeu hatán: “Ita hateten nia.” Ninia liafuan neʼe hatudu katak amlulik neʼe mate duni.
Jesus hatene katak amlulik boot iha direitu atu husu nia atu hatete loloos. Liután neʼe, se Jesus nonook deʼit, karik ida-neʼe bele halo ema hanoin katak nia la’ós Kristu. Entaun, kuandu Jesus hatán “Ita rasik hateten nia”, neʼe hanesan nia hatudu katak buat neʼebé amlulik boot koʼalia mak loos. Iha livru Marcos neʼebé mós koʼalia kona-ba istória neʼe, fó sai katak kuandu Caifás husu Jesus atu hatete se nia mak Mesias ka lae, Jesus hatán ho aten-brani hodi dehan: “Haʼu duni.”—Marcos 14:62; haree mós Mateus 26:25 no Marcos 15:2.
[Nota–rodapé]
^ par. 7 Livru Talmude mak livru husi relijiaun judeu kona-ba sira-nia lei sira-neʼebé hakerek maizumenus tinan 300 liutiha Kristu.
[Dezeñu iha pájina 32]
Badain-kulit nia serbisu-fatin iha sidade Fez, iha Rai-Marrokus
