Halai toʼo rohan ho laran-metin
Halai toʼo rohan ho laran-metin
“Halai toʼo rohan iha konkursu neʼebé ita tuir daudaun.”—EBR 12:1.
1, 2. Bíblia kompara ema kristaun nia moris ho saida?
TINAN-TINAN, iha rai oioin, ema halai maratona. Ema balu neʼebé profisionál kona-ba halai maratona, sira-nia hakarak mak atu manán. Ema seluk neʼebé hatene katak sira la bele manán, buat neʼebé importante liu mak halai toʼo rohan.
2 Bíblia kompara ita-nia moris nuʼudar ema kristaun ho halai-taru. Porezemplu, apóstolu Paulo hakerek kona-ba neʼe iha ninia karta primeiru ba ninia maluk kristaun iha Korinto, hodi dehan: “Imi la hatene katak sira neʼebé halai iha estádiu halai atu manán, maibé ida deʼit mak manán nia kolen? Imi halai bá atu manán.”—1 Kor 9:24.
3. Tanbasá mak Paulo hatete katak ema ida deʼit mak manán nia kolen?
3 Kuandu Paulo hatete katak ema ida deʼit mak manán nia kolen, neʼe katak ema kristaun ida deʼit mak hetan moris nuʼudar kolen ka lae? Lae duni! Tuir loloos, ema kristaun iha Korinto hatene katak maski ema ida deʼit mak bele hetan prémiu, maibé ema hotu neʼebé halai-taru mós hakaʼas an atu manán. Nuneʼe, Paulo nia hakarak mak atu ninia maluk kristaun hakaʼas an atu laran-metin nafatin ba Maromak Jeová no halai toʼo rohan. Sin, ema kristaun hotu neʼebé halai toʼo rohan sei manán moris rohan-laek nuʼudar sira-nia kolen, ka prémiu.
4. Ita presiza hatene kona-ba saida deʼit iha ita-nia halai-taru nuʼudar ema kristaun?
4 Paulo nia liafuan sira-neʼe fó laran-manas ba ita hotu atu halai toʼo rohan. Ninia liafuan mós halo ita hanoin didiʼak kona-ba oinsá ita halai iha halai-taru neʼe. Tanbasá mak importante atu hanoin didiʼak kona-ba neʼe? Tanba prémiu ka kolen neʼebé ita atu hetan mak kapás tebetebes, neʼe mak moris ba nafatin iha lalehan ka iha mundu foun. Maibé, iha ita-nia halai-taru nuʼudar ema kristaun, ita halai iha dalan neʼebé naruk no iha perigu barak neʼebé bele hanetik ita atu halo serbisu ba Jeová ho badinas ka hapara ita atu serbí nia. (Mt 7:13, 14) Triste katak ida-neʼe akontese tiha ona ba Jeová nia atan balu. Se nuneʼe, ita iha perigu saida deʼit iha ita-nia halai-taru? Oinsá mak ita bele sees husi perigu sira-neʼe? Saida deʼit mak ita bele halo atu halai toʼo rohan no manán ita-nia kolen?
Presiza laran-metin toʼo rohan
5. Iha Ebreu 12:1, Paulo esplika kona-ba saida?
5 Iha Paulo nia karta ba ema ebreu kristaun iha Jerusalém no Judeia, dala ida tan nia kompara ema kristaun nia moris ho halai-taru. (Lee Ebreu 12:1.) Iha karta neʼe, nia esplika tansá ema kristaun presiza kontinua halai, no mós saida mak sira presiza halo atubele halai toʼo rohan. Ulukliu, mai ita koʼalia kona-ba tansá mak Paulo hakerek ninia karta ba ema ebreu kristaun no saida mak nia hakarak sira atu halo. Depois, ita sei koʼalia kona-ba saida mak ita bele aprende husi konsellu neʼebé nia fó ba sira.
6. Ema kristaun hetan terus saida husi ulun-naʼin relijiaun sira?
6 Ema kristaun iha tempu uluk, liuliu sira neʼebé hela iha Jerusalém no Judeia, hasoru susar no terus barak. Sira hetan terus husi ulun-naʼin relijiaun judeu sira neʼebé uza nafatin sira-nia kbiit atu obriga ema atu halo tuir sira-nia hakarak. Besik tinan 30 antes neʼe, ulun-naʼin sira-neʼe konsege book ema atu fiar katak Jesus Kristu kontra governu no oho nia nuʼudar ema neʼebé halo krime. No sira kontinua nafatin atu haterus ema kristaun. Livru Apostolu konta kona-ba buat neʼebé akontese ba ema kristaun sira lakleur depois Pentekostes 33. Ulun-naʼin relijiaun sira ataka ema kristaun dala barak hodi koko hapara sira-nia haklaken kona-ba Jesus. Ida-neʼe halo ema kristaun sira-nia moris sai susar tebes.—Apos 4:1-3; 5:17, 18; 6:8-12; 7:59; 8:1, 3.
7. Saida tan mak halo ema kristaun sira-nia moris sai susar?
7 Buat seluk tan neʼebé halo ema kristaun sira-nia moris susar mak tanba Jerusalém besik ona atu naksobu. Jesus fó-hatene nanis kona-ba neʼe. Nia mós hatete ba ninia dixípulu sira kona-ba saida deʼit mak sei akontese antes neʼe, no fó-hatene mós saida mak sira presiza halo atubele moris liu susar neʼe. (Lee Lucas 21:20-22.) Jesus hatete: “Imi matan-moris neon-naʼin bá, keta laran-todan tan hahalok aat sira, tan lanu, tan fó neon resin ba moris neʼe atu loron neʼe keta toʼo tekiteki deʼit hanesan lasu.”—Lc 21:34.
8. Saida deʼit mak halo ema kristaun balu atu la kontinua laʼo ba oin iha lia-loos?
8 Kuandu Paulo hakerek ninia karta ba ema ebreu kristaun sira, besik tinan 30 liu tiha husi tempu neʼebé Jesus fó avizu neʼe. Saida mak akontese ba ema kristaun sira-neʼe iha tinan 30 nia laran? Balu la kontinua laʼo ba oin iha lia-loos tanba problema ruma ka sira laran-susar kona-ba sira-nia presiza loroloron nian. (Ebr 5:11-14) Balu seluk karik hanoin katak diʼak liu atu moris hanesan ema judeu barak neʼebé laʼós kristaun. Karik sira hanoin katak halo ida-neʼe la sala, tanba ema judeu nafatin fiar ba Maromak no halo tuir Moisés nia Ukun-Fuan barak. Iha mós ema balu iha kongregasaun laran neʼebé hakaʼas ema kristaun atu halo tuir nafatin Moisés nia Ukun-Fuan no ema judeu nia tradisaun, no balu fiar sira, no sira seluk rona ba sira tanba taʼuk. Saida mak Paulo hatete atu ajuda ninia maluk sira atu kontinua moris nuʼudar ema kristaun no laran-metin nafatin ba Jeová?
9, 10. (a) Tuir Paulo nia liafuan iha Ebreu kapítulu 10 nia rohan, ema ebreu kristaun presiza halo saida? (b) Tanbasá mak Paulo hakerek kona-ba Maromak nia atan sira iha tempu uluk neʼebé hatudu sira-nia fiar?
9 Mai ita haree saida mak Paulo hakerek iha ninia karta ho espíritu santu nia ajuda atu hametin ema ebreu kristaun. Iha kapítulu 10, Paulo esplika ba sira katak Moisés nia Ukun-Fuan mak “buat sira neʼebé atu mai nia ilas”, no katak liuhusi Jesus nia sakrifísiu deʼit mak sira bele hetan perdua ba sira-nia sala. No iha kapítulu neʼe nia rohan, Paulo hatete: “Imi presiza laran-metin toʼo rohan, atu halaʼo Maromak nia hakarak hodi manán Nia promesa. ‘Sei uitoan tan, no sei uitoan liután duni, no ida neʼebé atu mai sei mai; Nia sei la tarde.’”—Ebr 10:1, 36, 37.
10 Sin, Paulo fó laran-manas ba ema ebreu kristaun sira atu laran-metin toʼo rohan. No iha kapítulu 12, nia hatete dala ida tan katak sira presiza “halai toʼo rohan”. Maibé antes neʼe, nia koʼalia kona-ba buat seluk iha kapítulu 11. Iha kapítulu neʼe, Paulo esplika didiʼak fiar ba Maromak katak sá. Nia mós fó ezemplu barak kona-ba oinsá mak Maromak nia atan balu iha tempu uluk hatudu fiar neʼe. Tansá mak Paulo koʼalia kona-ba fiar antes nia koʼalia fali kona-ba laran-metin toʼo rohan? Tanba Paulo hakarak ninia maluk kristaun atu hatene katak hodi bele hatudu fiar neʼebé loos ba Jeová, sira presiza aten-brani no laran-metin. Nuneʼe, atu ajuda ema ebreu kristaun atu laran-metin nafatin iha susar laran, nia koʼalia kona-ba oinsá mak Maromak nia atan sira iha tempu uluk hatudu sira-nia fiar. Depois nia hatete: “Neʼe duni, ho sasin lubuk neʼebé haleʼu ita, ita mós, sei husik tiha buat hotu neʼebé hatodan ita, liuliu sala neʼebé belit metimetin mai ita, hodi halai toʼo rohan iha konkursu neʼebé ita tuir daudaun.”—Ebr 12:1.
“Sasin lubuk”
11. Oinsá mak hanoin kona-ba “sasin lubuk” nia ezemplu bele ajuda ita?
11 Paulo hatete katak Jeová nia atan sira iha tempu uluk mak hanesan “sasin lubuk neʼebé haleʼu ita”. “Sasin lubuk” neʼe, ka Jeová nia atan sira iha tempu uluk, sira hanesan ema neʼebé halai ona toʼo rohan iha halai-taru. Sira-nia ezemplu hatudu katak ema kristaun bele duni laran-metin nafatin ba Jeová toʼo rohan maski hasoru susar oioin. Nuneʼe, hodi hanoin kona-ba sira-nia ezemplu, ida-neʼe fó aten-brani ba ema ebreu kristaun no ajuda sira atu fiar katak sira mós bele “halai toʼo rohan”, nuneʼe mós ho ita.
12. Saida deʼit mak ita bele aprende husi fiar-naʼin sira neʼebé Paulo temi?
12 Ita bele aprende husi fiar-naʼin sira iha tempu uluk tanba sira barak nia situasaun hanesan ho ita-nian. Porezemplu, Noé moris iha tempu neʼebé Jeová atu halakon mundu aat ho Rai-Nabeen. Ita mós moris iha tempu neʼebé mundu neʼe nia rohan besik ona atu mai. Abraão no Sara prontu atu husik sira-nia rai atu halaʼo adorasaun neʼebé loos no fiar katak Jeová sei kumpre buat neʼebé nia promete. Jeová mós hatete ba ita atu la moris ba ita-nia an rasik, maibé uza ita-nia moris atu serbí nia. Moisés laʼo rai dook atu tama ba rai neʼebé Maromak promete ona hodi liu rai-fuik maran neʼebé iha perigu barak. Ita mós moris iha mundu aat neʼe neʼebé atu lakon, no hein atu tama mundu foun neʼebé Jeová promete mai ita. Sin, importante tebes ba ita atu hanoin kona-ba fiar-naʼin sira-neʼe nia moris, hodi aprende oinsá mak sira halo Jeová kontente maski sira iha fraku.—Rom 15:4; 1 Kor 10:11.
Saida mak ajuda sira atu halai toʼo rohan?
13. Noé presiza halo saida deʼit? Saida mak ajuda nia atu halo buat hotu neʼebé Jeová haruka?
13 Saida mak ajuda Jeová nia atan sira-neʼe atu halai toʼo rohan ho laran-metin? Mai ita lee Paulo nia liafuan kona-ba Noé. (Lee Ebreu 11:7.) Noé seidauk haree rai-nabeen neʼebé halo lakon ema no animál hotu. (Gên 6:17) Nia mós seidauk haree udan boot. Maibé Noé la hanoin katak rai-nabeen neʼe la bele akontese. Tanbasá? Tanba nia fiar katak Jeová sempre kumpre buat neʼebé nia hatete. Tan neʼe, Noé la hanoin katak susar demais atu halo tuir Jeová. Nia halo buat hotu neʼebé Jeová haruka nia atu halo. Bíblia hatete: “Nia halo nuneʼe duni.” (Gên 6:22) Noé iha serbisu barak. Nia tenke halo arka ka ró neʼebé hanesan kaixote boot, halibur animál oioin, rai ai-han barak ba ema no animál, fó avizu ba ema kona-ba rai-nabeen, no tau matan ba ninia família hodi hametin sira-nia fiar ba Jeová. La fasil ba Noé atu halo buat hotu neʼebé Jeová haruka. Maibé, Noé nia fiar ba Jeová ajuda nia atu halo serbisu hotu toʼo rohan ho laran-metin. Tan neʼe, Jeová salva nia ho ninia família no haraik bensaun barak ba sira.
14. Iha situasaun saida mak Abraão no Sara hatudu fiar ba Maromak? Ita bele aprende saida husi sira-nia ezemplu?
14 Paulo mós koʼalia kona-ba Abraão no Sara nuʼudar parte husi “sasin lubuk neʼebé haleʼu ita”. Kuandu Maromak haruka sira atu husik sira-nia uma iha sidade Ur, ida-neʼe troka sira-nia moris. Sira la hatene saida mak atu akontese ba sira. Maibé sira fiar metin ba Jeová no halo tuir nia maski iha situasaun susar. Tanba Abraão prontu atu husik buat barak atu halaʼo adorasaun loos ba Jeová, Bíblia bolu nia nuʼudar “aman ba sira hotu neʼebé . . . fiar”. (Rom 4:11) Tanba ema ebreu kristaun hatene ona kona-ba Abraão nia moris, Paulo la presiza koʼalia barak kona-ba neʼe. Maibé Paulo hanorin buat ida neʼebé importante, hodi dehan: “Sira hotu neʼe [inklui Abraão ho nia família] mate iha fiar laran, molok sira simu buat neʼebé hakotu ona ba sira, maibé sira haree buat neʼe husi dook hodi simu sira, hodi simu an nuʼudar ema rai seluk nian no ema laʼo-rai iha mundu neʼe.” (Ebr 11:13) Ida-neʼe hatudu ho klaru katak sira-nia fiar no relasaun diʼak ho Maromak ajuda sira atu halai toʼo rohan ho laran-metin.
15. Tanbasá mak Moisés husik moris diʼak?
15 Maromak Jeová nia atan ida seluk husi “sasin lubuk” mak Moisés. Nia mós husik rikusoin barak no moris diʼak hodi hili atu “ema trata aat nia hamutuk ho Maromak nia povu”. Tanbasá? Paulo hatete: “Nia matan hateke ba kolen loloos. . . . Nia laran-metin toʼo rohan hanesan ema neʼebé haree Ida neʼebé matan la haree.” (Lee Ebreu 11:24-27.) Duké buka “haksolok ba tempu uitoan iha sala laran”, Moisés buka mak buat neʼebé importante liu. Nia fiar metin ba Maromak no fiar katak Maromak sei kumpre buat hotu neʼebé nia promete. Ida-neʼe ajuda nia atu hatudu aten-brani no atu tahan situasaun susar oioin, no ajuda mós nia atu bele serbisu makaʼas hodi lori ema Israel sai husi rai-Egiptu ba rai neʼebé Maromak promete ona.
16. Saida mak hatudu katak Moisés la hirus maski nia labele tama iha rai neʼebé Maromak promete ona?
16 Hanesan ho Abraão, Moisés mós mate antes Maromak kumpre buat neʼebé nia promete. Kuandu ema Israel besik atu tama iha rai neʼebé Maromak promete ona, Maromak hatete ba Moisés: “Husi dook ó sei haree rai neʼe, maibé ó sei la tama iha neʼebá iha rai neʼebé haʼu fó ba Israel nia oan sira.” Moisés no Aarão la tama iha rai neʼebé Maromak promete ona, tanba sira la halo tuir Maromak nia hakarak iha rai-Meribá. Iha neʼebá, ema Israel muramura no halo Moisés no Aarão hirus, no sira la fó glória ba Maromak kuandu sira halo bee sai husi fatuk-lolon. (Deut 32:51, 52) Ida-neʼe halo Moisés laran-tun no hirus ka lae? Lae. Nia husu Jeová atu haraik bensaun ba povu, no nia hatoʼo ninia liafuan ikus ba sira hodi dehan: “Haksolok bá, oh, Israel! Sé mak hanesan ó, povu neʼebé haksolok ho salvasaun husi Jeová, eskudu neʼebé ajuda imi, no Ida neʼebé hanesan imi-nia surik neʼebé kmanek liu?”—Deut 33:29.
Ita aprende saida?
17, 18. (a) Ita bele aprende saida husi “sasin lubuk”? (b) Iha lisaun tuirmai, ita sei koʼalia kona-ba saida?
17 Husi Maromak nia atan sira neʼebé parte husi “sasin lubuk neʼebé haleʼu ita”, ita aprende katak atu bele halai toʼo rohan, ita presiza fiar metin ba Maromak no buat neʼebé nia promete. (Ebr 11:6) Fiar neʼe tenke book dalan neʼebé ita halaʼo ita-nia moris. La hanesan ho ema neʼebé la iha fiar, ita hatene katak Maromak promete mai ita futuru neʼebé kapás. Sin, hodi haree “Ida neʼebé matan la haree”, ita halai nafatin ho laran-metin.—2 Kor 5:7.
18 Ita-nia halai-taru nuʼudar ema kristaun la fasil. Maibé, ita bele duni halai toʼo rohan. Iha lisaun tuirmai, ita sei koʼalia kona-ba buat seluk tan neʼebé ajuda ita atu halai toʼo rohan.
Ita bele hatán?
• Tanbasá mak Paulo hakerek kona-ba fiar-naʼin sira iha tempu uluk?
• Oinsá mak ezemplu husi “sasin lubuk neʼebé haleʼu ita” ajuda ita atu halai toʼo rohan?
• Ita aprende saida husi Noé, Abraão, Sara, no Moisés nia ezemplu?
[Pergunta estudu nian]
[Dezeñu iha pájina 19]
Abraão no Sara prontu atu husik sira-nia moris diʼak iha Ur
