Skip to content

Skip to table of contents

 MAROMAK MAK KRIA KA LAE?

Nehek neʼebé moris iha rai-fuik maran Sahara

Nehek neʼebé moris iha rai-fuik maran Sahara

NEHEK oin ida ho kór osan-mutin naran Cataglyphis bombycina mak animál ida neʼebé bele moris iha fatin neʼebé manas tebes. Loron-loron, bainhira loro-matan tiru makaʼas rai-fuik maran Sahara, animál sira neʼebé gosta han insetu kiʼik tenke bá buka fatin mahon. Iha tempu neʼe mak nehek sira-neʼe sai husi rai-okos atu buka hahán oioin, hanesan insetu sira neʼebé mate tanba rai manas demais.

[50] μm

Hanoin toʼok: Nehek sira-neʼe nia ulun no isin iha parte leten no sorin taka ho fulun espesiál hodi fó mahon ba sira. Fulun sira-neʼe mak halo nehek sai nabilan hanesan osan-mutin, no fulun ida-idak mak hanesan sedotan neʼebé triángulu. Husi parte tolu iha “sedotan” neʼe, parte rua neʼebé kona loron iha riska kiʼik barak, no parte ida neʼebé besik ba nehek nia isin mak kabeer. Fulun hanesan neʼe bele haleno fali loro-matan nia naroman, no mós ajuda nehek atu hamenus manas. Liután neʼe, nehek nia kabun neʼebé la iha fulun bele ajuda hamenus manas husi rai-henek sira. *

[10] μm

Temperatura máximu neʼebé nehek sira-neʼe bele tahan mak 53,6°C, no sira-nia fulun espesiál bele ajuda sira-nia isin atu la bele sai manas liu. Ohin loron, sientista sira koko atu halo produtu oioin neʼebé bele tahan manas hodi halo tuir modelu husi fulun neʼe.

Tuir Ita-nia hanoin oinsá? Nehek neʼe nia fulun mosu mesak deʼit? Ka Maromak mak kria?

^ par. 4 Proteína balu iha sira-nia isin-lolon mós ajuda sira atu bele tahan manas makaʼas. Sira-nia ain neʼebé naruk ajuda sira atu halai lalais no hiʼit aas sira-nia isin hodi la bele besik liu ba rai-henek neʼebé manas. Sira mós matenek tebes atu hili dalan neʼebé lalais liu atu fila fali ba sira-nia fatin.