Skip to content

Skip to table of contents

“Domin hanesan neʼe kona loos ami-nia laran”

“Domin hanesan neʼe kona loos ami-nia laran”

IHA loron-sábadu, 25 Abríl 2015, rai-nakdoko mosu iha rai-Nepál, parte norte husi rai-Índia. Área neʼebé nakdoko makaʼas mak maizumenus kilómetru 80 husi sidade kapitál, Katmandú. Neʼe mak dezastre naturál boot liu hotu iha rai-Nepál, neʼebé halo ema naʼin-8.500 liu mate no estraga uma 500.000 liu. Testemuña ba Jeová iha rai-Nepál hamutuk naʼin-2.200, no maioria hela iha área neʼebé kona rai-nakdoko, no Testemuña ida ho ninia oan naʼin-rua mak mate.

Testemuña ida naran Michelle hatete: “Rai-nakdoko neʼe mosu bainhira ami halaʼo hela reuniaun. Se ida-neʼe akontese bainhira ami hotu iha uma, karik iha ema barak tan neʼebé mate ka hetan kanek.” Tanbasá mak nia hatete hanesan neʼe? Tanba konstrusaun ba reuniaun-fatin mak diʼak tebes.

REUNIAUN-FATIN NEʼEBÉ BELE TAHAN RAI-NAKDOKO

Ohin loron, Testemuña sira harii sira-nia reuniaun-fatin iha dalan neʼebé bele tahan rai-nakdoko. Man Bahadur, neʼebé hola parte atu harii reuniaun-fatin, dehan: “Uluk, kuandu ami halo fundasaun, ema barak husu mai ami tansá mak ami halo fundasaun neʼebé metin tebes. Maibé ikusmai ita haree katak neʼe lori duni rezultadu diʼak!” Depois rai-nakdoko boot, Testemuña sira uza sira-nia reuniaun-fatin nuʼudar hela-fatin temporáriu. Maski rai-nakdoko kiʼik kontinua mosu, maibé Testemuña ho viziñu sira sente seguru iha reuniaun-fatin.

Testemuña ba Jeová ho viziñu sira uza reuniaun-fatin nuʼudar hela-fatin temporáriu

Bainhira rai nakdoko, katuas sira iha kongregasaun komesa kontaktu kedas maluk kristaun sira. Testemuña ida naran Babita hatete: “Katuas sira tau uluk maluk sira-nia diʼak duké hanoin sira rasik nia diʼak. Domin hanesan neʼe kona loos ami-nia laran.” Loron tuirmai, membru naʼin-tolu neʼebé organiza Testemuña iha rai-Nepál no katuas balu neʼebé vizita kongregasaun sira mós toʼo iha área neʼe atu buka-hatene maluk Testemuña sira-nia presiza no apoia katuas sira iha área neʼe.

Vítima sira simu vizita husi Gary Breaux, neʼebé serbí iha Testemuña ba Jeová nia sede-jerál

Liutiha loron neen depois rai-nakdoko, Testemuña sira simu vizita husi Gary Breaux ho ninia feen Ruby, neʼebé serbí iha sede-jerál iha Estadus Unidus. Katuas ida husi membru naʼin-tolu neʼebé organiza Testemuña sira iha rai-Nepál, naran Reuben, dehan: “Tanba sidade Katmandú sai runguranga no mós rai nakdoko la para, ami hanoin katak irmaun Gary sei la mai. Maibé nia hakarak tebes atu vizita ami, no nia mai duni! Testemuña sira hafolin tebes ninia vizita.”

‘AMI SENTE BESIK LIUTÁN’

Silas neʼebé serbisu iha Testemuña nia eskritóriu iha rai-Nepál hatete: “Bainhira liña telefone iha área neʼe sai diʼak fali, ami-nia telefone lian kedas husi dadeer toʼo kalan! Maluk Testemuña sira iha mundu tomak hanoin tebes ami. Maski sira balu koʼalia língua neʼebé ami la komprende, maibé ami sente katak sira hadomi ami no prontu atu ajuda ami.”

Doutór Testemuña ida husi Europa konsulta vítima sira

 Loron balu depois rai-nakdoko, Testemuña sira lori hahán ba reuniaun-fatin atu fó ba ema neʼebé presiza. Katuas sira mós forma grupu ida atu organiza buat oioin hodi bele ajuda vítima sira, no lakleur, sira komesa simu sasán oioin husi rai seluk, liuliu husi rai-Bangladexe, Índia no Japaun. Testemuña balu husi Europa mós toʼo mai atu fó tratamentu médiku. Sira loke kedas klínika temporáriu iha reuniaun-fatin ida hodi bele atende ema neʼebé hetan kanek ka trauma.

Feto ida naran Uttara hatete: “Rai-nakdoko neʼe mak makaʼas no halo ami taʼuk. Maibé depois neʼe, ami sente besik liután ho ami-nia maluk kristaun.” Loos duni, dezastre neʼe la halo fraku sira-nia domin ba Jeová no mós ba maluk kristaun, maibé sai metin liután.