Skip to content

Skip to table of contents

Feto neʼebé hamtaʼuk ba Maromak hanoin didiʼak kona-ba ninia konxiénsia

 BÍBLIA NIA HANORIN | ABORTU

Abortu

Abortu

Ohin loron, inan barak halo abortu ho neon. Tinan-tinan iha mundu tomak, bebé naʼin-50.000.000 liu mak mate tanba abortu ho neon.

Saida mak Maromak nia hanoin kona-ba abortu?

EMA HANOIN OINSÁ?

 

Feto sira halo abortu ho razaun oioin, porezemplu tanba problema ekonomia, problema ho pár, hakarak kontinua eskola ka serbisu, ka lakohi haboot oan mesak deʼit. Maibé, iha mós ema neʼebé hatete katak abortu ho neon mak sala no inan neʼebé isin-rua la iha direitu atu estraga oan neʼebé iha ninia knotak.

SAIDA MAK BÍBLIA HANORIN?

 

Tuir Maromak nia haree, moris, liuliu ema nia moris mak buat neʼebé sagradu no folin-boot tebes. (Gênesis [Kejadian] 9:6; Salmo [Mazmur] 36:9) Maromak mós hafolin tebes bebé neʼebé iha inan nia knotak, no nia kria feto nia oan-fatin nuʼudar fatin neʼebé seguru ba bebé. Ema ida neʼebé hakerek Bíblia dehan: “Ita taka haʼu didiʼak iha haʼu-nia inan nia knotak. . . . Ita-nia matan haree ona haʼu iha haʼu-nia inan nia knotak.”—Salmo (Mazmur) 139:13, 16.

Atu bele hatene katak Maromak hafolin duni bebé neʼebé sei iha inan nia knotak, mai ita hanoin kona-ba Maromak nia Ukun-Fuan no mós ita-nia konxiénsia. Tuir lei ba nasaun Izraél antigu, kuandu ema ida hakanek inan neʼebé isin-rua no ikusmai ninia bebé neʼe mate, nia tenke hetan kastigu-mate, tanba moris troka ho moris. (Êxodo [Keluaran] 21:22, 23) Maibé antes neʼe, juis sira tenke tetu didiʼak buat neʼebé akontese.—Números (Bilangan) 35:22-24, 31.

Maromak kria ema ho konxiénsia. Se feto ida neʼebé isin-rua halo tuir ninia konxiénsia no respeitu ninia bebé nia moris, nia bele sente kontente. * Maibé se nia la halo tuir ninia konxiénsia no halo abortu, ikusmai nia bele sai laran-susar no fó sala ba ninia an. (Roma 2:14, 15) Peskiza sira hatudu katak feto barak neʼebé halo ona abortu sai estrese no hetan moras depresaun.

Maibé oinsá se Ita sente katak Ita-nia situasaun la permite atu haboot oan, liuliu kuandu Ita la iha planu atu iha oan? Haree toʼok Maromak nia hanoin ba ema neʼebé moris tuir Ninia hakarak. Bíblia hatete: “Ita hatudu laran-metin ba ema neʼebé laran-metin; Ita hatudu hahalok loos ba ema neʼebé halo hahalok loos.” (Salmo [Mazmur] 18:25) “Jeová hadomi justisa, no nia sei nunka husik hela ninia ema sira neʼebé laran-metin.”—Salmo (Mazmur) 37:28.

“Sira-nia laran fó sasin hamutuk ho sira, no liuhusi sira-nia hanoin sira hatene katak buat neʼebé sira halo mak loos ka sala.”Roma 2:15.

 Oinsá se uluk Ita halo ona abortu?

EMA HANOIN OINSÁ?

 

Inan ida naran Rute * hatete: “Haʼu iha oan naʼin-tolu, no sente la iha kbiit atu tau matan ba oan ida tan. Maibé depois halo tiha abortu, haʼu sente katak haʼu halo ona sala neʼebé boot tebes.” Nia bele hetan perdua husi Maromak ka lae?

SAIDA MAK BÍBLIA HANORIN?

 

Hodi haleno Maromak nia hanoin, Jesus dehan: “Haʼu mai laʼós atu bolu ema loos, maibé atu bolu ema sala-naʼin atu hakribi sala.” (Lucas 5:32) Kuandu ita sente triste tebes ba sala neʼebé ita halo ona no arrepende an, no mós husu perdua ba Maromak, Nia sei fó perdua ba ita maski sala neʼe mak boot. (Isaías [Yesaya] 1:18) Iha Salmo 51:17 dehan: “Oh Maromak, Ita sei la nega ema neʼebé laran-triste no neon-susar.”

Se ema ida ho haraik-an halo orasaun ba Maromak, Maromak sei ajuda nia atu sente dame iha laran. Filipe 4:6, 7 dehan: “Hatoʼo imi-nia laran-susar ba Maromak liuhusi orasaun no harohan no mós fó-agradese; no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin.” * Bainhira Rute estuda Bíblia no fó sai ninia sentimentu ba Maromak, neʼe halo nia sente laran-hakmatek. Nia aprende katak Maromak “fó perdua duni ba ema nia sala sira”.—Salmo (Mazmur) 130:4.

[Maromak] la fó kastigu ba ita tuir ita-nia sala, no nia la selu fali ba ita ho buat neʼebé ita merese tuir ita-nia sala.”Salmo (Mazmur) 103:10.

^ par. 10 Dala ruma doutór fó-hatene ba inan sira katak sira-nia oan iha knotak laran iha posibilidade atu iha moras ruma, maibé neʼe laʼós razaun atu halo abortu. Kuandu inan ida iha perigu laran durante partu no tenkesér hili atu salva inan nia moris ka oan nia moris, inan neʼe ho ninia pár mak tenke deside. Maibé situasaun hanesan neʼe ladún akontese iha rai neʼebé avansadu ona.

^ par. 15 Naran neʼe laʼós naran neʼebé loos.

^ par. 18 Esperansa kona-ba moris-hiʼas mós bele ajuda ita atu sente dame. Kona-ba moris-hiʼas ba bebé sira neʼebé mate iha inan nia knotak, haree “Pertanyaan Pembaca” husi Menara Pengawal 15 Abríl 2009.