Skip to content

Skip to table of contents

Oin-midar mak prezente furak

Oin-midar mak prezente furak

KUANDU ema ruma hatudu oin-midar ba Ita, Ita sente oinsá? Baibain Ita mós hatudu fali oin-midar no sente kontente liután. Loos, oin-midar neʼebé ema hatudu ho laran bele halo ita sente kontente maski ema neʼe mak ita-nia kolega ka ema neʼebé ita la koñese. Feto ida naran Magdalena dehan: “Bainhira haʼu-nia laʼen George sei moris, nia sempre hatudu oin-midar. Kuandu ami hateke ba malu, haʼu sente kontente no seguru.”

Oin-midar hatudu sai laran-kontente no haksolok. Jornál online ida naran Observer dehan: “Karik ita ema moris mai hatene nanis atu hatudu oin-midar.” Tuir informasaun neʼe, bebé neʼebé foin moris mós bele komprende ema seluk nia sentimentu liuhusi sira-nia oin. Jornál neʼe hatutan tan: “Ema bele hetan informasaun oioin husi ema seluk nia oin-midar, no informasaun neʼe bele ajuda sira atu deside kona-ba hahalok saida mak sira sei hatudu.” *

Grupu ida husi Universidade Harvard iha Estadus Unidus halo peskiza kona-ba pasiente ferik-katuas no ema neʼebé serbisu atu tau matan ba sira. Tuir peskiza neʼe, bainhira ema neʼebé tau matan mak hatudu oin-midar, neʼe halo pasiente sira sente kontente liután no sira-nia saúde isin no mentál sei sai diʼak. Maibé bainhira ema neʼebé tau matan mak hatudu oin-buis,  neʼe halo pasiente sira sente taʼuk no sira-nia saúde la sai diʼak.

Kuandu ita hatudu oin-midar, neʼe bele ajuda mós ita-nia an rasik. Peskiza sira hatudu katak, oin-midar bele lori buat diʼak oioin ba ita, hanesan halo ita sente kontente, fiar an, no mós hamenus estrese. Maibé oin-buis sei aumenta ita-nia laran-susar.

OIN-MIDAR “HALO HAʼU SENTE KONTENTE”

Magdalena, neʼebé temi ona iha informasaun neʼe, mak Testemuña ba Jeová ida. Durante Funu Mundiál Segundu, nia ho ninia família la apoia governu Nazi iha rai-Alemaña, tan neʼe ema hatama sira ba komarka Ravensbrück. Kona-ba tempu neʼe, nia dehan: “Dala ruma xefe komarka sira bandu ami atu labele koʼalia ba malu. Maibé sira la bele hapara ami atu hatudu oin-midar ba malu. Bainhira haʼu haree haʼu-nia inan no biin nia oin-midar, neʼe halo haʼu sente kontente tebes no fó forsa mai haʼu atu tahan.”

Karik Ita hanoin katak Ita-nia moris nakonu ho susar no la iha razaun atu hatudu oin-midar. Maibé, diʼak atu hanoin-hetan katak ita-nia sentimentu mak rezultadu husi ita-nia hanoin. (Provérbios [Amsal] 15:15; Filipe 4:8, 9) Tan neʼe, koko toʼok atu hanoin kona-ba buat neʼebé halo Ita sente kontente. * Ema barak hatete katak lee Bíblia no orasaun ajuda duni sira. (Mateus 5:3; Filipe 4:6, 7) Tuir loloos, Bíblia temi liafuan “kontente” no “haksolok” dala atus ba atus! Tan neʼe, koko toʼok atu lee Bíblia pájina ida ka rua loron-loron. Karik neʼe sei ajuda Ita atu hatudu oin-midar liután.

Keta hein toʼo ema seluk mak hatudu oin-midar, maibé hatudu oin-midar uluk ba ema seluk hodi halo sira-nia moris sai kontente liután. Loos duni, oin-midar mak prezente furak husi Maromak neʼebé bele halo ita no ema seluk nia moris kontente.

^ par. 3 Tuir Bíblia, Maromak mós bele hatudu oin-midar ba ema. Iha lia orijinál, eskritura husi Salmo (Mazmur) 119:135 fó sai orasaun neʼebé dehan: “Hatudu oin-midar ba Ita-nia atan.”

^ par. 8 Haree informasaun “Apakah Anda ‘Selalu Perpesta’?” husi livru Sedarlah! Novembru 2013.