Juramentu mak “deklarasaun ka promesa formál no sériu neʼebé ema halo no baibain temi Maromak nuʼudar sasin”. Ema ida bele jura ho liafuan deʼit ka bele mós hakerek ida-neʼe.

Ema balu hanoin katak sala atu jura kona-ba buat ruma, tanba Jesus hatete: “Keta jura kona-ba buat ida . . . Maibé, se imi dehan ‘sin’, tenkesér sin, no ‘lae’, tenkesér lae, tanba se imi halo liu fali ida-neʼe, neʼe mai husi aat-naʼin.” (Mt 5:33-37) Jesus hatene katak tuir Moisés nia Ukun-Fuan, ema Izraél presiza halo juramentu iha situasaun balu no hatene katak Jeová nia atan seluk mós halo ona juramentu balu. (Gén 14:22, 23; Éx 22:10, 11) Jesus hatene katak Jeová rasik halo juramentu. (Ebr 6:13-17) Entaun Jesus nia liafuan la signifika ita nunka bele halo juramentu. Maibé nia fó avizu atu la jura kona-ba buat neʼebé la importante ka la iha razaun neʼebé loos. Jeová hakarak ita atu sempre kumpre ita-nia juramentu.

Ita presiza halo saida se ema ida husu Ita atu jura kona-ba buat ida? Primeiru, buka-hatene se Ita bele kumpre buat neʼebé Ita atu jura. Se Ita duvida, diʼak liu atu la halo juramentu. Bíblia hatete: “Diʼak liu ó la jura duké ó jura tiha maibé la kumpre ida-neʼe.” (Ecle 5:5) Segundu, hanoin kona-ba Bíblia nia prinsípiu neʼebé liga ho buat neʼebé Ita atu jura no tuirmai halo desizaun bazeia ba Ita-nia konxiénsia neʼebé hetan ona treinu. Saida mak Bíblia nia prinsípiu balu kona-ba halo juramentu?

Juramentu balu la kontra Maromak nia hakarak. Porezemplu, Testemuña ba Jeová halo juramentu bainhira sira kaben. Iha Maromak nia oin no mós iha ema seluk nia oin, noiva no noivu promete ba malu atu hadomi, hafolin no respeitu malu durante sira-nia moris tomak. (Dala ruma noiva no noivu balu la hatete liafuan hanesan neʼe kuandu sira kaben, maski nuneʼe sira nafatin halo juramentu iha Maromak nia oin.) Sira sai feen-laʼen no tenke hamutuk nafatin durante sira-nia moris tomak. (Gén 2:24; 1 Kor 7:39) Juramentu neʼe diʼak no la kontra Maromak nia hakarak.

Juramentu balu kontra Maromak nia hakarak. Ema Kristaun loos sei la halo juramentu atu defende nasaun ida ho armas ka nega ninia fiar. Se nia halo nuneʼe, nia kontra Maromak nia mandamentu sira. Ema Kristaun labele sai parte ba mundu neʼe, tan neʼe nia labele hola parte iha problema sosiál ka funu.​—João 15:19; Isa 2:4; Tgo 1:27.

 Juramentu balu tenke deside rasik tuir konxiénsia. Dala ruma, antes ita deside atu jura buat ruma, ita presiza hanoin didiʼak kona-ba Jesus nia konsellu “fó ba César buat neʼebé César nian, no fó ba Maromak buat neʼebé Maromak nian”.​—Lc 20:25.

Porezemplu, oinsá se ema Kristaun aplika atu sai sidadaun ka hetan pasaporte husi nasaun ida, maibé nia tenke jura atu laran-metin no halo tuir nasaun neʼe? Se juramentu neʼe inklui jura atu halo buat ruma neʼebé kontra Maromak nia ukun-fuan, entaun ninia konxiénsia neʼebé hetan ona treinu sei la husik nia atu halo juramentu neʼe. Maibé dala ruma governu bele fó lisensa ba nia atu troka uitoan liafuan iha juramentu atu halo tuir ninia konxiénsia.

Se ema Kristaun ida halo juramentu hanesan neʼe, ida-neʼe tuir prinsípiu iha Roma 13:1 neʼebé hatete: “Ema hotu tenke hakruʼuk ba autoridade sira.” Tan neʼe, karik ema Kristaun ida sei deside katak la sala atu halo juramentu kona-ba buat neʼebé Maromak haruka ona ema Kristaun atu halo.

Ita mós presiza halo tuir Ita-nia konxiénsia neʼebé hetan ona treinu se ema husu Ita atu uza objetu ruma ka halo sinál ruma bainhira halo juramentu. Iha tempu antigu, ema Roma no ema Sita sira jura hodi uza sira-nia surik, neʼe katak sira uza símbolu ba maromak funu nian nuʼudar garantia atu ema bele tau fiar ba sira. Ema Gregu hiʼit saʼe sira-nia liman ba lalehan bainhira sira halo juramentu. Hodi halo nuneʼe, sira rekoñese katak iha maromak ida iha lalehan neʼebé kbiit boot no haree buat hotu neʼebé ema koʼalia no halo. No ema mós tenke hatán ba nia.

Klaru katak, Jeová nia atan ida lakohi jura hodi uza símbolu nasionál ruma neʼebé liga ho adorasaun falsu. Maibé oinsá se Ita bá tribunál no ema husu Ita atu tau liman ba Bíblia no jura atu fó sasin? Iha situasaun neʼe, karik Ita deside atu halo ida-neʼe, tanba Bíblia fó sai kona-ba atan sira neʼebé laran-metin no halo sinál ruma bainhira halo juramentu. (Gén 24:2, 3, 9; 47:29-31) Ita presiza hanoin-hetan katak se Ita halo juramentu hanesan neʼe, neʼe katak Ita jura iha Maromak nia oin katak Ita sei koʼalia buat neʼebé loos. Ita presiza hatán ho loloos pergunta naran deʼit neʼebé ema husu ba Ita iha tribunál.

Ita hafolin ita-nia relasaun diʼak ho Jeová, tan neʼe ita presiza halo orasaun no hanoin didiʼak kona-ba juramentu neʼebé ita atu halo, no buka-hatene se juramentu neʼe kontra ita-nia konxiénsia ka Bíblia nia prinsípiu ka lae. Se Ita deside atu jura, Ita tenke kumpre ida-neʼe.​—1 Ped 2:12.