Na Lihele ke Ntho ea Sebele? Bibele e Re’ng ha e Bua ka Lihele?

BAPALA

Karabo ea Bibele

Liphetolelo tse ling tsa khale tsa Bibele ea Senyesemane tse kang King James Version, li sebelisa lentsoe “lihele” litemaneng tse ling. (Pesaleme ea 16:10; Liketso 2:27 a) Batho ba bangata ba lumela hore lihele ke moo batho ba khopo ba chesetsoang teng, joalokaha setšoantšo sa bolumeli se sehloohong sena se bontša. Empa na ke seo Bibele e se rutang?

Sehloohong sena

Na lihele ke sebaka seo batho ba hlokofatsoang ho sona ka ho sa feleng?

Che. Liphetolelo tsa khale tsa Bibele li fetoletse lentsoe la Seheberu “Sheole” le la Segerike “Hadese” e le “lihele,” leo ha e le hantle le bolelang “Lebitla.” Bibele e bontša hore batho ba “Lebitleng” ba shoele.

Bafu ha ba utloe letho ’me ba ke ke ba utloa bohloko. “Nģalong ea bafu [“liheleng” Douay-Rheims Version] moo o eang, ha ho sa le mosebetsi, leha e le morero, kapa tsebo, kapa bohlale.” (Moeklesia 9:10, Bibele e Halalelang) Ha ho na batho ba llang habohloko liheleng. Bibele e re: “Ho ke ho soabe ba khopo, ba be ba khutse nģalong ea bafu [liheleng, Douay-Rheims].”—Pesaleme ea 31:17; Bibele e Halalelang; Pesaleme ea 115:17.
Molimo o itse kotlo ea sebe ke lefu, eseng ho hlokofatsoa liheleng. Molimo o ile a bolella motho oa pele e leng Adama hore kotlo ea ho tlola molao oa hae e tla ba lefu. (Genese 2:17) Haa ka a bua letho ka ho hlokofatsoa ka ho sa feleng liheleng. Ka mor’a hore Adama a etse sebe, Molimo o ile a mo bolella hore na kotlo ea hae e tla ba efe. O ile a re: “U lerole ’me u tla khutlela leroleng.” (Genese 3:19) Sena se bolela hore Adama o ne a sa tl’o hlola a phela, hobane Molimo a ka be a ile a mo bolella haeba a ne a tl’o chella liheleng. Molimo ha a e-s’o fetole kotlo eo a tla e fa motho ea tlolang melao ea hae. Nako e telele ka mor’a hore Adama a etse sebe, Molimo o ile a susumetsa mongoli oa Bibele hore a re: “Moputso oo sebe se o lefang ke lefu.” (Baroma 6:23) Kahoo, ha ho sa hlokeha hore motho a fuoe kotlo e fetang ena hobane “motho ea shoeleng o tšoaretsoe sebe sa hae.”—Baroma 6:7.
Ho hlokofatsa batho ka ho sa feleng ke ntho e nyonyehang ho Molimo. (Jeremia 32:35) Ho hlokofatsa batho ka ho sa feleng ho khahlanong le thuto ea Bibele ea hore “Molimo ke lerato.” (1 Johanne 4:8) O batla hore re mo rapele hobane re mo rata, eseng hobane re tšaba hore o tla re hlokofatsa ka ho sa feleng.—Matheu 22:36-38.
Batho ba lokileng ba ne ba ea liheleng. Libibele tse sebelisang lentsoe “lihele” li bontšitse hore banna ba tšepahalang ba kang Jakobo le Jobo, ba ne ba lebelletse ho ea liheleng. (Genese 37:35; Jobo 14:13) Esita le Jesu Kreste ho thoe o ne a le liheleng ha a ne a shoele le pele a tsosoa. (Liketso 2:31, 32) Ho hlakile hore Libibeleng tsena lentsoe “lihele” le bolela Lebitla. b

Papiso ea Jesu ea monna ea ruileng le ea Lazaro li re ruta’ng?

Lipapiso tsena tseo Jesu a buileng ka tsona li hlaha ho Luka 16:19-31. Lipapiso li re ruta ka boitšoaro le tsela eo Molimo a shebang lintho ka eona. Papiso ea monna ea ruileng le ea Lazaro e ne e se liketsahalo tsa sebele. (Matheu 13:34) Ho ithuta ho eketsehileng ka papiso ena, sheba sehlooho se re’ng “Monna ea Ruileng le Lazaro e ne e le Bo-mang?”

Na lihele li bontša hore Molimo o re lahlile?

Che. Thuto ea hore bafu ba ka tseba hore Molimo o ba lahlile ha e lumellane le Bibele, kaha e bontša ka ho hlaka hore ba shoeleng ha ba tsebe letho ho hang.—Pesaleme ea 146:3, 4; Moeklesia 9:5.

Na ho na le motho ea kileng a tsosoa ho tsoa liheleng?

E. Bibele e bua ka batho ba robong ba ileng ba ea Lebitleng (le fetoletsoeng e le “lihele” Libibeleng tse ling) ’me ba tsosoa. c Haeba ba ne ba tseba se etsahalang liheleng, ba ka be ba ile ba bolella batho ba bang ka hore na ho etsahalang moo. Ntho e makatsang ke hore ha ho le ea mong oa bona ea ileng a re ho na le ntho e etsahetseng ka eena ha a ntse a shoele. Esale Bibele e ruta hore bafu ha ba tsebe letho. Ho joalokaha eka ba “robetse” boroko bo tebileng.—Johanne 11:11-14; 1 Bakorinthe 15:3-6.

a Liphetolelo tse ngata tsa mehleng ena tsa Senyesemane ha li sa na lentsoe “lihele” ho Liketso 2:27. Ho e-na le hoo, li sebelisa mantsoe a kang “lebitla,” (New Century Version); “nģalong ea bafu,” (Bibele e Halalelang) le “bafu” (The Passion Translation). Tse ling tsona li sebelisa lentsoe la Segerike e leng “Hadese.”—Holman Christian Standard Bible, NET Bible, New American Standard Bible, English Standard Version.

b Sheba lebokose le re’ng “ Mantsoe a Neng a Sebelisoa ha ho ne ho Ngoloa Bibele.”

c Sheba 1 Marena 17:17-24; 2 Marena 4:32-37; 13:20, 21; Matheu 28:5, 6; Luka 7:11-17; 8:40-56; Johanne 11:38-44; Liketso 9:36-42; Liketso 20:7-12.

Litemana tsa Bibele tse buang ka lihele kapa Lebitla

Jobo 14:13: “Ekare o ka mpata Lebitleng [“liheleng” Douay-Rheims Version], . . . oa mpehela nako ebe oa nkhopola.”

Tlhaloso: Monna ea tšepahalang Jobo o ne a tseba hore lihele (Lebitla) li ne li tla mo imolla bohlokong ba hae le hore Molimo o ne a tla mo tsosa.

Pesaleme ea 145:20: “Jehova o lebela bohle ba mo ratang empa bohle ba khopo o tla ba felisa.”

Tlhaloso: Molimo o tla felisa kapa a timetse batho ba khopo ka ho sa feleng. A ke ke a ba isa liheleng e le hore a ba hlokofatse.

Moeklesia 9:10: “Ha ho mosebetsi, morero, tsebo kapa bohlale Lebitleng [“liheleng” Douay-Rheims Version] moo o eang teng.”

Tlhaloso: Ba Lebitleng kapa liheleng, ha ba tsebe letho ’me ha ba utloe bohloko. Ho feta moo, mantsoe ana a Bibele a ne a ngolletsoe batho bohle ho akarelletsa le ba lokileng.

Liketso 2:31: “Ka ho iponela hoo pele, o boletse tsoho ea Kreste, a re, moea oa hae o ke ke oa tloheloa nģalong ea bafu.”—Bibele e Halalelang.

Tlhaloso: Jesu Kreste o ile a ea nģalong ea bafu (Lebitleng) ha a shoa.

Baroma 6:23: “Moputso oo sebe se o lefang ke lefu.”

Tlhaloso: Kotlo ea sebe ke lefu, eseng ho hlokofatsoa liheleng.

Tšenolo 20:13: “Lefu le lebitla tsa ntša bafu ba ho tsona.”—Bibele e Halalelang.

Tlhaloso: Batho ba mabitleng ba shoele. Ba tla boela ba phele ha ba tsosoa.

Tšenolo 20:14: “Lefu le lebitla tsa akheloa letšeng la mollo.”—Bibele e Halalelang.

Tlhaloso: Ka mor’a hore bafu ba tsosoe, lihele (Lebitla) li tla felisoa ka ho sa feleng, joalokaha eka ke ka mollo. Ka mor’a moo, lefu le bakiloeng ke sebe sa Adama ha le sa tla hlola le e-ba teng.—Baroma 5:12.

Mantsoe a neng a sebelisoa ha ho ne ho ngoloa Bibele

Joalokaha lethathamo le latelang le bontša, bafetoleli ba Bibele ba bakile pherekano ka ho sebelisa lentsoe “lihele” ha ba ne ba fetolela. Ho bonahala eka ba ne ba batla ho etsa hore batho ba lumele thuto ea hore batho ba khopo ba ke ke ba felisoa empa ba tla hlokofatsoa ka ho sa feleng.

Sheole (ka Seheberu שְׁאוֹל), Hadese (ka Segerike ᾅδης)

Tlhaloso: Lebitla le tloaelehileng la moloko oa batho.—Pesaleme ea 16:10; Liketso 2:31

Tsela eo a fetoletsoeng: Lebitla le nģalo ea bafu (Bibele e Halalelang)
Gehena (ka Segerike γέεννα)

Tlhaloso: Ho felisoa ka ho sa feleng.—Matheu 5:30

Tsela eo e fetoletsoeng: Gehena; lihele (Bibele—Phetolelo ea Lefatše le Lecha; Bibele e Halalelang)
Tartaruse (ka Segerike ταρταρόω)

Tlhaloso: Boemo bo tlase boo bademona ba leng ho bona.—2 Petrose 2:4

Tsela eo e fetoletsoeng: Tartaruse; lihele (Bibele—Phetolelo ea Lefatše le Lecha; Bibele e Halalelang)
Apoleia (ka Segerike ἀπώλεια)

Tlhaloso: Timetso.—Matheu 7:13

Tsela eo e fetoletsoeng: Timelo (Bibele e Halalelang)
Pyr (ka Segerike πῦρ)

Tlhaloso: Mollo oa tšoantšetso kapa oa sebele.—Luka 17:29; Juda 23

Tsela eo e fetoletsoeng: Mollo (Bibele e Halalelang)

Thuto ea lihele e qalile hokae?

E qalile boheteneng: Baegepeta ba ne ba lumela thutong ea lihele. Sengoloa se seng se bitsoang Book Ȧm-Ṭuat (Amduat), seo borahistori ba re’ng se ngotsoe lilemong tsa bo-1500 pele ho mehla ea Jesu, se re batho ba “tla lahleloa ka mekoting ea mollo ’me . . . ba ke ke ba khona ho baleha.”—The Egyptian Heaven and Hell.

Ha e tsoe thutong ea Bokreste: “Ha re bala Testamente e Ncha, ha ho moo [Bakreste ba mehleng ea pele] ba neng ba ruta batho ka lihele.”—A Dictionary of Christian Theology.

Filosofi ea Bagerike e ile ea kenella lithutong tsa bolumeli: “Ho tloha bohareng ba lilemo tsa bo-100 pele ho mehla ea Jesu, Bakreste ba neng ba rutiloe filosofi ea Bagerike ba ile ba qala ho tsoakanya bolumeli ba bona le filosofi eo . . . Filosofi eo ba neng ba e rata e ne e le ea Plato [lithuto tsa Plato].” (Encyclopædia Britannica) Filosofi eo e ne e akarelletsa tumelo ea hore batho ba hlokofatsoa mollong ka mor’a hore ba shoe. “Ho bo-rafilosofi bohle ba Bagerike, ea ileng a susumetsa batho haholo ka thuto ea Lihele ke Plato.”—Histoire des enfers (The History of Hell).

Lihele li ne li sebelisoa e le lebaka la hore batho ba hlokofatsoe: Mehleng ea khale, Lekhotla la Spain le neng le ahlola batho ba khelohileng bolumeling, le ne le re ha motho a fumanoa a le molato oa bokhelohi, o ne a tla chesetsoa palong e le “ho mo utloisa hore na lihele li joang.” Le ne le etsa sena ka morero oa ho etsa hore motho a bake pele a shoa. (The Spanish Inquisition, e ngotsoeng ke Jean Plaidy) Mofumahali oa Engelane e leng Mary I, o ile a chesetsa Maprostanta a ka bang 300 palong hobane ho ka etsahala hore o ne a lumela hore “kaha meea ea bakhelohi e tla cha ka ho sa feleng liheleng ka mor’a hore ba shoe, ho ne ho nepahetse hore ba etsise Molimo ka hore ba hle ba chese bakhelohi bao mona lefatšeng.”—Universal History, ka Alexander Tytler.

Liphetoho tsa mehleng ena: Malumeli a mang a entse eka lihele ha se ntho e mpe hore litho tsa ’ona li amohele thuto ena. (2 Timothea 4:3) “Batho ba batla Molimo ea lerato le ea mosa . . . Ha se ntho e tloaelehileng hore batho ba bue ka sebe le liphoso tsa bona.”—Professor Jackson W. Carroll.

Lihlooho Tse Ling

Lefu le Bophelo Lipotso Tsa Bibele Lia Arajoa

Mohlomong u ka Rata le

LIVIDEO TSA LITHUTO TSA BIBELE TSA BOHLOKOA

Lipaki Tsa Jehova