Lebitso la Segerike la buka ea Bibele ea Tšenolo, e leng A·po·kaʹly·psis (apocalypse), le bolela “Ho senola” kapa “Ho pepesa.” Lebitso lena le bontša se boleloang ke buka ea Tšenolo​—e senola litaba tse neng li patehile ’me e pepesa liketsahalo tse neng li tla ba teng nako e telele ka mor’a hore e ngoloe. Boprofeta bo bongata bo boleloang ho eona ha bo e-s’o phethahale.

Kakaretso ea buka ea Tšenolo

• Selelekela.​—Tšenolo 1:​1-9.

• Melaetsa ea Jesu e eang liphuthehong tse supileng.​—Tšenolo 1:10–​3:​22.

• Pono ea Molimo a le teroneng ea hae leholimong.​—Tšenolo 4:1-​11.

• Letoto la lipono tse latellanang:

  • Litiiso tse supileng.​—Tšenolo 5:1–​8:6.

  • Literompeta tse supileng, ’me tse tharo tsa tsona tsa ho qetela li phatlalatsa bomalimabe hararo.​—Tšenolo 8:7–​14:20.

  • Likotlolo tse supileng, tse nang le likotlo tse emelang kahlolo ea Molimo e lokelang ho tšeloa lefatšeng.​—Tšenolo 15:1–​16:21.

  • Lipono tsa ho felisoa ha lira tsa Molimo.​—Tšenolo 17:1–​20:10.

  • Lipono tsa ha Molimo a hlohonolofatsa leholimo le lefatše.​—Tšenolo 20:11–​22:5.

• Qetello.​—Tšenolo 22:​6-​21.

Litsela tsa ho utloisisa buka ea Tšenolo

1. Molaetsa oa eona o khothatsa ba sebeletsang Molimo, ho e-na le ho ba tšosa kapa ho ba thothometsa. Le hoja batho ba bangata ba nahana hore lentsoe lena “apocalypse” le bolela koluoa e khōlō, buka ea Tšenolo e qala litaba le ho li qetella ka ho bontša hore ba balang molaetsa oa eona, ba o utloisisa ebile ba o sebelisa bophelong ba bona ba tla thaba ha ba etsa joalo.​—Tšenolo 1:3; 22:7.

2. Tšenolo e sebelisa “lipontšo” tse ngata kapa litšoantšetso, tse sa lokelang ho utloisisoa ka tsela ea sebele.​—Tšenolo 1:1.

3. Batho le lintho tse ngata tse ka sehloohong le lipontšo tseo ho buuoang ka tsona bukeng ea Tšenolo li boletsoe esale pele ka Bibeleng:

   • Jehova​—“ke Molimo oa ’nete maholimong” ebile ke ’Mōpi oa lintho tsohle.​—Deuteronoma 4:​39; Pesaleme ea 103:19; Tšenolo 4:​11; 15:3.

   • Jesu Kreste​—ke “Konyana ea Molimo.”​—Johanne 1:​29; Tšenolo 5:6; 14:1.

   • Satane Diabolose​—ke mohanyetsi oa Molimo.​—Genese 3:​14, 15; Johanne 8:​44; Tšenolo 12:9.

   • Babylona e Moholo​—joaloka Babylona ea boholo-holo (Babele), ke sera sa Jehova Molimo le sa batho ba hae ebile ke eona mohloli oa mashano a bolumeli.​—Genese 11:​2-9; Esaia 13:​1, 11; Tšenolo 17:​4-6; 18:​4, 20.

   • “Leoatle​—ke moloko oa batho ba khopo ba hanyetsang Molimo.​—Esaia 57:20; Tšenolo 13:1; 21:1.

   • Likarolo tse tšoanang le tse neng li sebelisoa tabernakeleng ea boholo-holo borapeling ba Molimo​—tse akhang areka ea selekane, leoatle le kang khalase (beisine ea ho itlhatsoa), mabone, linyehelo tsa libano le aletare ea mahlabelo.​—Exoda 25:10, 17, 18; 40:24-32; Tšenolo 4:​5, 6; 5:8; 8:3; 11:19.

   • Libata​—tse tšoantšetsang mebuso ea batho.​—Daniele 7:​1-8, 17-​26; Tšenolo 13:​2, 11; 17:3.

   • Lipalo tse sebelisitsoeng ka tsela ea tšoantšetso.​—Tšenolo 1:​20; 8:​13; 13:18; 21:16.

4. Lipono li phethahala “letsatsing la Morena,” le qalileng ha ’Muso oa Molimo o hlongoa ka 1914 ’me Jesu a qala ho busa e le Morena. (Tšenolo 1:​10) Ka hona, re ka lebella hore phethahatso e khōlō ea Tšenolo e etsahale mehleng ea rōna.

5. E le hore re utloisise buka ea Tšenolo, re hloka lintho tse tšoanang le tse ling tse re thusang ho utloisisa likarolo tsohle tsa Bibele, tse kang bohlale bo tsoang ho Molimo esita le ho fumana thuso ho ba seng ba ntse ba e utloisisa.​—Liketso 8:​26-​39; Jakobo 1:5.