ALADI Didibri, den sondu fu wi nanga a grontapu disi kan meki en hebi gi wi, toku wi man kakafutu gi a krakti di den abi na wi tapu. Fa wi o man du dati? Te wi e kon krosibei na Gado èn te wi e du san skrifi na ini Bijbel di no e kenki noiti. Luku tu eksempre.

BIJBEL E TAKI: „No gi pasi foe oen kom gersi grontapoe.”​—Romesma 12:2, Da Bijbel na ini Sranantongo.

Wan sani di pasa trutru: Guilherme na wan Brasyon di abi wan bisnis di e drai bun. A e agri taki a no makriki fu no du kruka sani. A e taki: „A kan pasa makriki taki wan bisnisman bigin du kruka sani, kande fu di a wani du san en basi e aksi fu en. Noso kande a e feti fu go na fesi na ini a grontapu disi pe furu bisnisman e strei nanga makandra. Furu sma e si  tyuku leki wan aladei sani. Te yu bigin yu eigi bisnis èn yu abi furu paiman, dan a kan muilek fu no bedrigi sma.”

Toku Guilherme ben man kakafutu gi kruktudu. A e taki: „Aladi furu bisnisman e du wan lo kruka sani, toku yu man du bisnis sondro fu bedrigi trawan. Yu musu abi a fasti bosroiti fu du san bun. Bijbel yepi mi fu si sortu wini a e tyari kon te yu no e bedrigi sma. Wan sma di e du sani nanga wan krin ati, abi wan krin konsensi, wan korostu firi èn a e lespeki ensrefi. A kan yepi den sma na en lontu fu du bun tu.”

BIJBEL E TAKI: „Sma di wani kon gudu nomonomo e kisi tesi èn den e fadon go na ini wan trapu. Den wani go du ala sortu dondon sani èn den e kisi ala sortu takru lostu di o meki taki den kisi pori, bika lobi gi moni na a rutu fu ala sortu ogri sani.”​—1 Timoteyus 6:9, 10.

Wan sani di pasa trutru: André abi wan bisnis di e poti alarm gi sma. Wan fu den presi pe a e du dati, na wan stadion fu wan bigi team di e plèi bal. Wan leisi, baka wan bigi plèi, André go na a kantoro fu a team èn a gi den sma wan papira pe skrifi omeni moni den ben musu pai en gi a wroko di a du. Den sma drape no ben kaba teri a moni ete di den ben kisi fu den presi na ini a stadion pe den ben e seri karta gi a plèi. Fu di a ben lati kaba, meki esi-esi a basi pai den sma di ben e du wroko gi den èn a pai André tu.

André e taki: „Di mi ben e go na oso, mi si taki a basi pai mi tumusi furu. Mi ben sabi taki noiti a ben o sabi suma a gi a moni disi. Ma mi ben sabi tu taki na en ben o abi fu gi a moni baka di ben e mankeri! Mi bosroiti fu drai go baka. Nanga furu muiti mi waka na mindri den ipi-ipi sma di ben kon luku a plèi èn mi go na a kantoro baka fu gi a basi a moni dati. A no ben man bribi. Noiti ete wan sma ben tyari moni kon gi en baka.”

André e taki moro fara: „Fu di mi no hori a moni, meki a basi kon lespeki mi. Someni yari pasa kaba èn now mi na a wan-enkri sma di e du wroko drape ete. Mi breiti taki mi kisi wan bun nen fu di mi hori den wèt fu Bijbel.”

A e gi wi deki-ati fu sabi taki nanga yepi fu Gado wi man kakafutu gi kruktudu. Ma awinsi san libisma e du, toku noiti den o man puru ala kruktudu. A rutu fu kruktudu beri so dipi taki sondu libisma no o man puru en nanga den eigi krakti. Ma disi wani taki dati noiti kruktudu o kon na wan kaba? A lasti artikel o sori sortu moi piki Bijbel e gi wi.