Wan sani de di kan „puru wi fu a lobi fu Gado”?
Kon krosibei na Gado
Wan sani de di kan „puru wi fu a lobi fu Gado”?
SUMA fu wi no abi lobi fanowdu? Wi alamala abi dati fanowdu, fu di wi e firi bun te famiriman nanga mati lobi wi. Ma a de wan sari sani taki a matifasi di sma abi nanga makandra kan pori makriki, èn a kan kenki baka wan pisi ten noso te wan sani pasa. Sma di wi lobi kan du hati sani nanga wi, den kan gowe libi wi, noso a kan pasa srefi taki den no wani abi noti fu du nanga wi moro. Ma wan sma de di lobi wi, èn dati noiti no sa kenki. Na wan tumusi moi fasi Romesma 8:38, 39 e taki fu a lobi di Yehovah Gado abi gi den anbegiman fu en.
Na ini a tekst disi na apostel Paulus e taki: „Mi de seiker.” Ma fu san a ben de seiker? Paulus ben de seiker taki nowan sani kan „puru wi fu a lobi fu Gado”. Paulus no e taki gi ensrefi nomo, ma a e taki gi „wi” tu, noso gi ala sma di e dini Gado na wan getrow fasi. Fu di Paulus wani poti moro krakti tapu a tori disi, meki a e kari wan tu sani di no kan tapu Yehovah fu sori lobi gi den getrow futuboi fu en.
„Dede no sa man du dati, èn libi no sa man du dati.” A lobi di Yehovah abi gi en pipel no e kon na wan kaba te den dede. A e sori taki disi de so, fu di a e tan memre den, èn na ini a ten di o kon a sa gi den libi baka na ini a nyun grontapu pe ala sani o waka na wan reti fasi (Yohanes 5:28, 29; Openbaring 21:3, 4). Na a srefi ten, a lobi di Gado abi gi den anbegiman fu en di e tan gi yesi na en, no e kenki awansi san den e ondrofeni na ini a sistema disi.
’Nowan engel, èn nowan tirimakti.’ A lobi di sma abi kan kenki te makti sma èn sosrefi tirimakti abi krakti tapu den, ma dati no de so nanga Yehovah. Makti yeye, soleki na engel di kon tron Satan, no man tapu Gado fu lobi den anbegiman fu en (Openbaring 12:10). Nowan tirimakti, srefi den wan di e gens tru Kresten, man kenki a fasi fa Gado e si den futuboi fu en.—1 Korentesma 4:13.
„Nowan sani fu a ten disi, noso fu a ten di musu kon ete.” A no de so, taki baka wan pisi ten Gado no o lobi wi so furu moro. Nowan sani di kan pasa nanga den futuboi fu en na ini a ten disi noso na ini a ten di e kon, kan tapu Gado fu lobi den.
„Nowan krakti.” Paulus ben taki kaba fu „engel” na hemel èn fu „tirimakti” na grontapu, ma now a e taki fu „krakti”. A Griki wortu di gebroiki dyaso wani taki difrenti sani. Awansi san a wortu disi wani taki, wán sani de seiker: Nowan krakti na hemel noso na grontapu kan tapu Yehovah fu sori lobi gi en pipel.
„Nowan sani di hei, noso wan sani di dipi.” Yehovah lobi en pipel awansi na ini sortu situwâsi den de noso awansi fa den e firi.
„Nowan enkri tra sani di Gado meki.” Nanga den wortu disi di e taki fu ala den sani di Gado meki, Paulus e taki dati nowan enkri sani kan puru getrow anbegiman fu a lobi fu Yehovah.
A lobi di libisma abi gi trawan kan kenki, noso a kan pasa taki den no lobi trawan so furu moro. Tra fasi leki dati, a lobi di Gado abi gi den sma di e poti bribi na ini en, no e kenki. Iya, a lobi dati e tan fu têgo. Now di wi sabi a sani disi, dan dati e meki taki wi wani kon krosibei na Yehovah, èn a e meki taki wi wani du ala san wi man fu sori taki wi lobi en.