Den profeiti e yepi wi fu kon sabi Gado
Na ini owruten, Gado meki den profeiti fu en tyari prenspari boskopu gi libisma. San den profeiti fu Gado e leri wi fu en? Meki wi go luku san wi kan leri fu dri profeiti di ben gi yesi na Gado.
ABRAHAM
Gado no lobi a wan sma moro a trawan èn a wani blesi ala libisma.
Gado pramisi a profeiti Abraham: „Na yu o meki taki ala den famiri fu grontapu man kisi blesi trutru.”—Genesis 12:3.
San disi e leri wi? Gado lobi wi alamala trutru. A wani blesi ala sma di e du san a wani, awinsi na mansma, umasma, noso pikin.
MOSES
Gado abi sari-ati èn a e blesi den sma di e meki muiti fu kon sabi en.
Na Almakti Gado gi a profeiti Moses a makti fu du bigi wondru. Ma toku Moses begi: „Sori mi den pasi fu yu, fu mi kan sabi yu, so taki yu kan feni mi bun” (Eksodes 33:13). Gado ben feni a sani bun di Moses ben aksi en èn a blesi en. A meki Moses kon sabi den fasi fu en moro bun. Fu eksempre, Moses kon sabi taki a Mekiman na „wan Gado di abi sari-ati nanga switifasi”.—Eksodes 34:6, 7.
San disi e leri wi? Gado wani blesi wi alamala, man, uma, nanga pikin di e du muiti fu kon sabi en moro bun. Na ini a Wortu fu en a e sori wi fa wi musu anbegi en èn a no man wakti fu blesi wi te a e si taki wi e du san a taki.
YESUS
Yesus dresi ala sortu siki fu di a ben e firi gi sma
Wi kan kisi blesi fu Gado fu ala ten te wi e leri moro fu Yesus, fu den sani di a du, èn fu den sani di a leri sma.
Gado Wortu e leri wi furu fu a libi fu Yesus èn fu den sani di a leri sma. Gado gi Yesus a makti fu du furu bigi wondru. A ben dresi den breniwan, den dofusma, nanga den malengriwan. A wiki dedesma srefi. Na so Yesus sori fa Gado o blesi ala libisma na ini a ten di e kon. Yesus taki fa ibriwan fu wi kan kisi den blesi dati. A ben taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes.”—Yohanes 17:3.
Yesus ben e firi gi sma èn a ben abi switifasi. Furu man nanga uma, yonguwan nanga owruwan, go na en di a gi den a kari disi: „Leri fu mi, bika mi abi safri-ati nanga sakafasi èn unu o kisi krakti baka” (Mateyus 11:29). Yesus no ben de leki trawan na ini a ten dati di no ben e libi bun nanga umasma, ma a ben e sori switifasi nanga lespeki gi den.
San disi e leri wi? Yesus sori taki a lobi sma trutru èn a gi wi wan moi eksempre fa wi musu libi nanga makandra.
YESUS A NO GADO
A Wortu fu Gado e leri wi taki „wán Gado nomo de” èn taki Yesus Krestes ben de a boskopuman fu Gado di ben abi sakafasi (1 Korentesma 8:6). Yesus taki krin taki Gado bigi moro en èn taki Gado seni en kon na grontapu.—Yohanes 11:41, 42; 14:28. *
^ paragraaf 17 Efu yu wani sabi moro fu Yesus Krestes, dan luku deel 8 nanga 9 fu a brochure Echt geloof leidt tot een gelukkig leven di de fu feni na www.jw.org.
