A BEN de a yari 1931. A mofodoro fu a Pleyel hal na ini Parijs pe sma ben e hori bigi show, ben lai sma fu 23 difrenti kondre. Taxi e stop na mofodoro fu a presi èn sma di weri moi krosi e komoto na ini den bigi wagi disi. Fosi yu denki a presi furu nanga sowan 3000 sma. Den no ben kon fu arki poku, ma fu arki Brada Joseph F. Rutherford, di ben e teki fesi na ini a preikiwroko fu wi. Den ben e vertaal den span lezing di a brada disi ben e hori na ini Doisritongo, Fransitongo, nanga Pôlsutongo. Na ini a heri hal sma ben kan yere a krakti sten fu Brada Rutherford.

A kongres disi di hori na ini Parijs, meki a Kownukondre preikiwroko na ini Fransikondre go na fesi. Brada Rutherford gi den arkiman di ben de fu difrenti kondre, spesrutu den yonguwan, a deki-ati fu tron kolporteur noso pionier na ini Fransikondre. John Cooke, wan yongu boi fu Ingrisikondre di ben de drape tu e taki dati noiti a frigiti den wortu fu Brada Rutherford: „Nowan sani na grontapu musu tapu unu yonguwan fu go du a kolporteur wroko!” *

Boiti John Cooke di tron zendeling bakaten, furu trawan teki a kari fu abra kon na Masedonia na agersi fasi (Tori 16:9, 10). Disi ben meki taki na ini wán yari nomo a nomru fu den kolporteur na Fransikondre kren fu 27 na ini 1930 go na 104 na ini 1931. Furu fu den pionier disi no ben e taki Fransitongo. Dan fa den ben o taki nanga sma? Boiti dati, den no ben abi furu moni èn den ben de den wawan na ini wan kontren. Sobun, fa den ben o du?

Den kolporteur di ben de fu tra kondre ben abi den kotoigikarta fanowdu fu preiki a Kownukondre boskopu. Wan brada di ben e taki Doisritongo èn di no ben frede fu preiki na ini Parijs e taki: „Wi ben sabi taki a Gado fu wi na wan makti Gado. Efu wi ben e frede te wi ben e go na ini a preikiwroko, dan a no ben de fu di wi ben e frede libisma, ma fu di wi ben e frede taki wi o frigiti den wortu di wi ben leri na ede: ‘Voulez-vous lire cette carte, s’il vous plaît? [Yu wani leisi a karta disi grantangi?]’ Wi ben de seiker taki a wroko fu wi ben prenspari trutru.”

Te den kolporteur ben e preiki na ini den bigi gebow pe sma ben e tan, dan furu tron den sma di ben e luku a presi ben e yagi den gowe. Wan dei, tu Ingrisi sisa di ben e taki pikinso Fransitongo nomo miti wan waktiman na wan fu den gebow disi di aksi den suma den ben e suku. A man disi ben atibron srefisrefi. Di den sisa ben suku fu kowru en atibron pikinso, wan fu den si wan pikin plaat na wan doro. Na tapu a plaat ben skrifi: „Tournez le bouton [Druk a schel].” Fu di a sisa ben denki taki dati ben de a nen fu na ososma, meki a taki nanga wan lafu fesi: „Un kon luku Mevrouw ‘Tournez le bouton.’” Den kolporteur disi ben kan lafu fu den  fowtu di den ben e meki èn dati ben e yepi den fu tan du a wroko fu den.

Na ini 1930 furu sma na Fransikondre ben de pôtisma èn dati ben de so tu gi den kolporteur fu tra kondre. Mona Brzoska na wan sisa di ben taki Ingrisitongo. A ben fruteri san en nanga en pionier patna ondrofeni: „Furu tron den presi pe wi ben e tan no ben de kefalek presi. Wan bigi problema di wi ben abi spesrutu na ini a kowru ten fu a yari na taki a ben muilek fu meki a kamra fu wi kon waran. Furu tron a kamra fu wi ben kowru so te, taki te mamanten wi ben musu broko na ijs puru di ben kon de na tapu a watra na ini watrakan fosi wi ben man wasi wi fesi.” Den fosi pionier disi ben lasi-ati fu di sani no ben makriki gi den? Kwetikweti! Wan fu den taki: „Wi no ben abi noti, ma wi no ben e mankeri noti tu.” Den wortu disi e sori fa furu fu den ben e firi.—Mat. 6:33.

Furu tron den kolporteur disi di ben abi deki-ati ben de den wawan na ini wan kontren. Dati no ben makriki. Baka 1930, a nomru fu den Kownukondre preikiman na ini Fransikondre no ben pasa 700 èn furu fu den ben panya na ala sei fu a kondre. San yepi den pionier di ben de den wawan na ini wan kontren, fu no lasi a prisiri fu den? Mona nanga en pionier patna ben kisi fu du nanga a sani disi. A e taki: „Fu kan feti nanga a firi taki wi ben de wi wawan wi ben studeri den buku fu a Genootschap doronomo. Na ini a ten dati wi no ben e go baka na den sma di wi ben miti èn wi no ben e studeri nanga den tu. Dati meki wi ben abi ten na bakadina fu skrifi brifi gi wi famiri èn fu skrifi tra pionier tu. Dan wi ben e fruteri den san wi ondrofeni èn wi ben e gi makandra deki-ati.”—1 Tes. 5:11.

Den pionier disi no ben denki densrefi nomo. Den ben tan bribi taki sani ben o go bun srefi te a ben muilek gi den. Wi kan si disi na ini den brifi di den seni gi a bijkantoro, son leisi omeni yari baka di den ben pionier na Fransikondre. Annie Cregeen, wan salfu sisa, e prakseri den yari na mindri 1931 nanga 1935, di en nanga en masra ben preiki na ala sei fu Fransikondre. A skrifi: „Wi ben de koloku trutru èn wi du ala sortu moi sani na ini a diniwroko! Wi leki pionier ben de bun mati fu makandra. A de leki fa na apostel Paulus ben taki: ’Mi prani, Apolos gi watra, ma na Gado meki sani gro.’ A sani disi de wan bigi prisiri gi den wan fu wi di ben man yepi nanga a wroko someni yari pasa.”—1 Kor. 3:6.

A deki-ati nanga a faya fu den fosi pionier disi de wan bigi yepi gi trawan di e prakseri fu go du moro na ini a diniwroko fu den. Now sowan 14.000 gewoon pionier de na Fransikondre. Furu fu den e wroko makandra nanga grupu noso gemeente di e taki tra tongo. * Neleki den fosi pionier den no e meki nowan sani na grontapu tapu den fu du den wroko!—A historia fu wi na ini Fransikondre.