Haran—Wan owruten foto pe furu sani ben e pasa

FURU sma di sabi den Buku fu Bijbel musu yere a nen Haran nomo, dan wantewante den e prakseri a famiri-edeman Abraham di ben abi wan tranga bribi na ini Gado. Abraham ben gowe libi a foto Ur fu go na Kanan. A ben go makandra nanga en wefi Sara, èn sosrefi en papa Tera, nanga en brada pikin, Lot. Di den ben de na pasi, dan den tan wan pisi ten na ini Haran. Drape Abraham kon abi furu gudu. Baka di en papa dede, Abraham hari go moro fara na a kondre di a tru Gado ben pramisi en (Gen. 11:31, 32; 12:4, 5; Tori. 7:2-4). Bakaten, Abraham seni a moro owru futuboi fu en go na Haran, noso na wan fu den foto na ini a kontren drape, fu suku wan wefi gi Isak. Yakob, a granpikin fu Abraham, ben tan wan tu yari tu na ini Haran.—Gen. 24:1-4, 10; 27:42-45; 28:1, 2, 10.

Kownu Sanherib fu Asiria ben e tapu skreki gi Kownu Heskia fu Yuda fu di a ben wani taki a gi ensrefi abra. Sanherib ben taki dati Haran ben de wan fu den „kondre” di den kownu fu Asiria ben teki abra. A nen „Haran” na ini a tekst disi, no abi fu du nomo nanga a foto Haran, ma a abi fu du tu nanga a heri kontren lontu Haran (2 Kow. 19:11, 12). A profeititori fu Esekièl e tyari kon na krin taki Haran ben de wan fu den prenspari foto di ben e du bisnis nanga Tirus. Disi e sori taki Haran ben de wan prenspari presi pe sma ben e du bisnis.—Esek. 27:1, 2, 23.

Na ini a ten disi, Haran na wan pikin foto nomo krosibei fu Şanlıurfa, na a owstusei fu Torkukondre. Ma fosi, na owruten foto Haran ben de wan presi pe furu sani ben e pasa. Wan tu foto nomo fu owruten abi a srefi nen ete di den abi na ini Bijbel, èn Haran na wan fu den foto dati. Na ini Asiriatongo a nen fu a foto dati na Harranu, san wani taki „Pasi”, noso „Karavan Pasi”. Disi e sori taki furu bisnisman ben e pasa Haran te den ben e go na tra bigi foto. Na tapu owruten sani di sma feni na ini Haran, a skrifi taki a mama fu Kownu Nabonidus fu Babilon, ben de granpriester na a tempel fu Sin, na gado fu a mun di den sma fu Haran ben e anbegi. Son sma e bribi taki Nabonidus ben seti a tempel kon bun baka. Baka dati, furu kownukondre opo kon èn fadon baka, aladi Haran tan.

Na ini a ten disi, Haran de heri tra fasi leki fosi. Haran fu owruten ben de wan gudu foto èn sosrefi wan prenspari foto, spesrutu na son pisi ten. Ma Haran fu a ten disi, na wan pikin presi nomo pe oso nanga lontu daki de. Lontu a foto, brokopresi de fu owruten foto. Na ini a nyun grontapu di Gado sa tyari kon, furu sma fu fositen di ben e libi na ini Haran, namku sma soleki Abraham, Sara, nanga Lot, o kisi wan opobaka. A no de fu taki, dati den o man fruteri wi furu sani ete fu Haran, wan owruten foto pe furu sani ben e pasa.

[Prenki na tapu bladzijde 20]

Brokopresi fu Haran

[Prenki na tapu bladzijde 20]

Oso nanga lontu daki

[Prenki na tapu bladzijde 20]

Haran na ini a ten disi