Wan gudu tiriman e teki wan don bosroiti

A YONGU gudu tiriman ben de opregti, a ben e hori ensrefi na den wet, èn a ben wani anbegi Gado na wan getrow fasi. Di a yonguman disi waka go miti Yesus, dan a fadon na tapu en kindi, èn a aksi en: „Bun Leriman, san mi musu du fu kisi têgo libi?”

Yesus taigi a man taki efu a ben wani kisi libi, dan a ben musu hori ensrefi na den komando fu Gado. Di a man aksi en na sortu komando a ben musu hori ensrefi, dan Yesus taigi en: „We, no kiri sma, no du sutadu, no fufuru, no lei gi sma, lespeki yu papa nanga yu mama, èn lobi tra sma leki fa yu lobi yusrefi.” Disi ben de den moro prenspari komando na ini a Wet di Gado ben gi Moses. Ne a man taki: „Mi du ala den sani disi; ma san mi no e du ete?”—Mateyus 19:16-20.

Yesus „kon firi lobi gi en”, èn a taigi en: „Wan sani de ete di yu no e du: Go seri den sani di yu abi èn prati a moni gi den pôtisma, dan yu sa kisi wan gudu na hemel; kon nanga mi èn tron wan bakaman fu mi.”—Markus 10:17-21.

Wantronso a man kon si taki a ben musu teki wan prenspari bosroiti. San a ben o du? A ben o de klariklari fu libi den gudu fu en fu tron wan bakaman fu Yesus? Noso a ben o tan hori den gudu fu en? A ben o tan suku gudu na grontapu, noso a ben o suku gudu na hemel? A no de fu taki dati a ben muilek gi en fu teki wan bosroiti. A ben de krin fu si taki a ben wani anbegi Gado na wan getrow fasi, bika a ben e hori ensrefi na a Wet, èn a ben aksi san a ben musu du ete so taki Gado ben kan feni en bun. Sortu bosroiti a teki? A „gowe nanga bigi sari, bika a ben abi furu gudu”.—Markus 10:22.

A yongu tiriman ben teki wan don bosroiti. Efu a ben tron wan getrow bakaman fu Yesus, dan a ben kan kisi a sani di a ben e suku, namku têgo libi. Bijbel no e taki san pasa nanga a yonguman dati. Ma wi sabi taki sowan fotenti yari baka dati, den legre  fu Rome pori Yerusalem èn wan bigi pisi fu Yudea. Furu Dyu lasi den gudu fu den, èn sosrefi den libi.

Tra fasi leki a yongu tiriman, na apostel Petrus nanga tra disipel teki wan bun bosroiti. Den „gowe libi ala sani”, èn den tron bakaman fu Yesus. A no de fu taki, dati a bosroiti dati tyari furu wini kon gi den! Yesus ben taigi den taki den sani di den ben o kisi, ben o furu moro leki den sani di den ben libi na baka. Boiti dati, den ben o kisi têgo libi. A bosroiti di den ben teki no meki den sari bakaten.—Mateyus 19:27-29.

Wi alamala musu teki bosroiti na ini wi libi. Son leisi wi musu teki bosroiti di no de so prenspari, ma tra leisi baka wi musu teki prenspari bosroiti. San Yesus ben taki fu den bosroiti disi? Yu sa teki a rai fu en? Te yu e du dati, dan yu sa kisi furu wini. Meki wi go luku now fa wi kan waka baka Yesus, èn fa wi kan kisi wini fu den sani di a ben taki.