Wan tumusi sari sani pasa

OWEN, wan boi fu tu nanga afu yari, ben de na oso e prei na ini a wasi-oso. En papa nanga mama ben abi wan hei kasi na ini a wasi-oso pe den ben e poti dresi fu di den ben denki taki a no ben man doro drape. Ma toku Owen feni wan fasi fu kren go na a kasi pe a si wan batra di ben hari en prakseri. A opo a batra èn a dringi a sani di ben de na ini. Ne wan tumusi sari sani pasa.

A sani na ini a batra ben de wan sortu tranga swa di pori na heri inibere fu Owen, èn a sari fu taki dati a yongu Owen ben kon lasi libi. En papa nanga mama ben e sari srefisrefi. En papa, Percy, go suku trowstu na en kerki. A aksi: „Fu san ede disi pasa?” A kerki fesiman piki en: „Gado ben wani wan tra pikin engel na ini hemel.” Sari ben e moro a papa disi trutru èn a ben e firi taki disi a no wan reti sani kwetikweti. A de so trutru taki Gado ben wani taki a tumusi sari sani disi ben o pasa? Fu di Percy ben firi brokosaka srefisrefi, meki a bosroiti fu no abi noti fu du nanga a kerki fu en moro.

Te Percy ben e prakseri fu san pasa, dan a ben aksi ensrefi: ’A pikin boi fu mi e nyan pina ete? Oiti mi sa si en baka?’

Kande yu aksi yusrefi tu san e pasa te wan sma dede èn efu a kan taki na ini a ten di e kon, yu sa miti baka nanga den lobiwan fu yu di dede. Gado Wortu, a Bijbel, e gi piki tapu den aksi disi. A e gi krin piki di e gi trowstu na ala sma di kisi fu du nanga den srefi sortu sari sani disi. Boiti dati, a e fruteri fu wan heri moi sani di Gado pramisi gi a ten di e kon, namku na opobaka.

Grantangi, leisi na artikel di e kon baka a wan disi fu kon sabi moro fu a tumusi moi howpu disi.